Migao mo Mea Paia

I le tusi o Esoto, tatou te malaga ai ma Mose i malifa o le Mauga o Orepa, a o ia faataatia ese ona atugaluga faaleaso—o se mea e ao ia i tatou uma ona naunau e fai—e vaai atu i le laautalatala na mu ae lei faaumatia. A o faalatalata atu o ia, “Sa valaau le Atua ia te ia mai totonu o le laautalatala, ma fetalai mai, Mose, Mose. Sa ia fai atu, O a‘u lenei. Sa fetalai atu [le Atua], ina to ese ia ou seevae i ou vae, aua ua sa lava le eleele o loo e tu ai nei.” I le migao tele, lotomaualalo, ma le maofa, sa to ese ai e Mose ona seevae ma saunia o ia lava e faalogo i le afioga a le Alii ma ia iloa Lona afio ai ma le paia.

O lena aafiaga paia i le mauga, sa o se aafiaga e tumu i le migao ma le musuia maoa’e, na fesootai atu ai Mose i lona faasinomaga paia ma o le mea moni, o se elemene autu o lona liua mai se leoleo mamoe faatauvaa i se perofeta mamana, ma taitai atu ai o ia e savali i se ala fou o le olaga. E faapena foi, e mafai foi e i tatou taitoatasi ona suia lo tatou avea ai ma so’o i se mamanu maualuga atu o le faaleagaga, e ala i le avea o le mana o le migao o se vaega paia o o tatou uiga faaleagaga.

O le upu migao e maua mai i le veape Latina o le revereri, o lona uiga o le “tu atu ma le ofo i le.” I le uiga faaletalalelei, o lenei faauigaga e lualuagia faatasi ma se lagona po o se uiga o le faaaloalo maoae, alofa, ma le lotofaafetai. O lena faailoaga mo le paia, e i latou e i ai se loto momomo ma se tuuto loloto i le Atua ma Iesu Keriso, e aumaia ai le olioli faateleina i o latou agaga.

O le migao mo mea paia, o se faailoaga silisili lea o se uiga auaumama faaleagaga taua; o se fua lea o lo tatou fesootai i le paia ma atagia ai lo tatou alolofa mo, ma le latalata atu i lo tatou Tama Faalelagi ma lo tatou Faaola, o Iesu Keriso. O se aafiaga aupito faaeaina foi lea o le agaga. O lena mana e tata’i atu ai o tatou mafaufauga, loto, ma olaga i le Atua. O le mea moni, o le migao e le na o se itu o le faaleagaga; o le ute lea—o le faavae e fau ai i luga le faaleagaga, e fatuina ai se sootaga patino i le lagi, e pei ona aoao mai e a tatou fanau pe a latou pepese: “A ou migao, ou te iloa i lo’u loto ua lata mai le Tama Faalelagi ma Iesu.”

I le avea ai ma soo o Iesu Keriso, ua valaaulia i tatou e atia’e le meaalofa o le migao i o tatou olaga ina ia tatala atu ai i tatou lava i se fesootaiga loloto atu ma le Atua ma Lona Alo o Iesu Keriso, ma faamalolosia ai foi o tatou tagata faaleagaga. A tele atu na lagona i o tatou loto, o le a le taumate le sili atu o lo tatou olioli ma le fiafia i o tatou olaga, ma o le a itiiti ai se avanoa e faavauvau ma faanoanoa ai. E tatau ona tatou manatua o le faaali atu o le migao mo mea paia, e faamatala ai le tele o mea tatou te faia i aso taitasi ma faamalolosia ai o tatou lagona o le lotofaafetai—maofa musuia, faaaloalo, ma le alolofa mo mea maualuluga ma paia atu.

Ae paga lea, ua tatou ola i se lalolagi ua matuai faateleina ai le lē masani e faaalia le migao mo mea paia. O le mea moni, e patipatia e le lalolagi mea e lē migao, i soo se faaaogaina o mekasini matautia, o polokalama televise, po o mea e faaalia i le initoneti. O le leai o se faaaloalo mo mea paia e fanau mai ai se faateleina o le faasamasamanoa i uiga faaalia ma le faatalalē i le amio, lea e afua ai ona vave ona lē popole le tasi tupulaga ma matua’ia ai ona faanoanoa le isi tupulaga.

O le lē migao foi e mafai ona ta’ita’iese ai i tatou mai noataga e maua mai feagaiga ma le Atua ma faaitiitia ai o tatou lagona o le tali atu i luma o le Atua. O le taunuuga, e lamatia ai i tatou i le na o le manatu i lo tatou lava lelei; ma faamalie ai o tatou lava mana’oga e lē mataofiofia; ma i’u ai ina taunuu i nofoaga e lē paia o le inoino i mea paia, e oo lava i le Atua, ma faapena ai lo tatou natura paia o fanau a le Tama Faalelagi. O le lē migao i mea paia, e atili faateleina ai faamoemoega o le fili e ala i le faalavelaveina o o tatou ala o faaaliga ia e taua mo lo tatou tumau faaleagaga i lo tatou taimi.

O le uiga ma le taua o le migao mo mea e paia, o loo matuai otooto lelei mai i tusitusiga paia uma. O se tasi o faataitaiga i le Mataupu Faavae ma Feagaiga o le a foliga ai e ta’u mai ai o le migao i lo tatou Tama Faalelagi ma Lona Alo o Iesu Keriso, o se itu e tatau ai mo i latou e mauaina le malo selesitia.

I le avea ai o se ekalesia, tatou te finafinau e tuu le Tamā ma le Alo i le paia aupito maualuga ma le faaaloalo i ona itu uma, e aofia ai le ala tatou te faaalia ai o La’ua foliga. O le taitaiga a le Agaga Paia o se vaega taua i le filima’otia ai o le auala e ao ona atagia ai le natura paia o nei foliga, amio, ma uiga faaleatua o le Tamā ma le Alo. Tatou te matua faaeteete lava ia aloese le faaalia o elemene e ono tata’iese ai mai lo tatou taula’iga muamua i lo tatou Tama Faalelagi ma Lona Alo o Iesu Keriso ma a La’ua aoaoga, e aofia ai le auala tatou te faaaoga ai meafaigaluega faama’ite ua aumaia e le tekinolosi, e pei o le faaaogaina o le atamai faafoliga (AI) e fatu ai anofale ma ata.

O le mataupu faavae lava lenei e faaaoga i soo se faapogai o faamatalaga e maua e ala i alaleo aloaia o fesootaiga a le Ekalesia. O lesona uma, tusi, tusilesona, ma savali ua atina’e ma le faaeteete ma ua faamaonia i lalo o le taitaiga a le Agaga ia mautinoa ai o tatou tausisia le avanoa taua, o tulaga faatauaina, ma tulaga faatonuina o le talalelei a Iesu Keriso. I se savali talu ai nei mo talavou matutua o le Ekalesia, na aoao mai ai Elder David A. Bednar, “Ina ia faatautaia le faauilavea faigata o le faaleagaga ma tekinolosi, e ao i le Au Paia o Aso e Gata Ai ona faailoa ma le agaga tatalo (1) mataupu o le talalelei e mafai ona taiala ai lo latou faaaogaina o le atamai faafoliga ma le (2) taumafai malosi ma le faamaoni mo le faapaaga a le Agaga Paia ma le meaalofa faaleagaga o faaaliga.”

O’u uso e ma tuafafine pele, po o le a le atamai faalelalolagi ua oo i ai tekinolosi faaonapo nei, ae le mafai ai lava ona natia le maoa’e, maofa, ma le ofotele e maua i le ituaiga o migao e fanau mai le tosinaga a le Agaga Paia. I le avea ai o ni soo o Keriso, e manaomia ona tatou faaeteete ia aua nei faavaivaia la tatou sootaga ma le Atua ma Lona Alo e ala i le faaaogaina ma le lē tatau o le ‘anofale ma ata fatu faafoliga. E ao ina tatou manatua o le faalagolago i se “lima o le tagata” faatekinolosi faaonapo nei, o se suitulaga lē talafeagai ma le lē faaaloalo lea mo musumusuga, faamalamalamaga, ma le molimau lea e na o le mana o le Agaga Paia e mafai ona maua ai. E pei ona ta’ua e Nifae, “Le Alii e, ua ou faalagolago ia te oe, ma o le a ou faalagolago pea ia te oe e faavavau. O le a ou lē tuu atu loʼu faalagolago i le lima o le tagata.”

I se isi faaaliga, sa faatonuina ai le Perofeta o Iosefa Samita e faapea, o malumalu e faatutuina i le Alii e ao ona avea o se nofoaga o le migao ia te Ia. I Lana misiona atoa, sa faamamafa malosi mai ai e lo tatou perofeta pele, o Peresitene Russell M. Nelson, lo tatou tapuai ai i le migao i malumalu paia. I le maota o le Alii, e aoaoina ai i tatou e uiga i le ulufale atu i le afioaga paia o le Tamā ma le Alo. Ou te mauaina pea i taimi uma le aoga ma le musuia, o se tasi o uluai mea tatou te faia i le ulufale atu i le malumalu o le tapenaina lea o i tatou lava e auai e faatino sauniga paia iina, o le aveese lea o o tatou seevae ma sui i o tatou laei papa’e. Faapei o Mose, afai tatou te faia ma le loto i ai, e mafai ona tatou iloaina o le aveesea o o tatou seevae faalelalolagi o le amataga lea o le la’a atu i eleele sa ma ua suia ai i ala maualuluga ma paia atu.

Uso e ma tuafafine, tatou te le tau fe’a’ei i le tumutumu o se mauga, pei ona sa faia e Mose, ia iloa ai le migao mo mea paia ma liua ai lo tatou avea ma soo i se tulaga loloto atu o le faaleagaga ma le tuuto. E mafai ona tatou iloa, mo se faataitaiga, a o tatou finafinau e puipuia le siosiomaga o o tatou aiga mai tosinaga faalelalolagi. E mafai ona faataunuuina lenei mea e ala i le tatalo ma le lotofaamaoni ma le naunautai i lo tatou Tama Faalelagi i le suafa o Iesu Keriso ma saili ia iloa atili lo tatou Faaola e ala i lo tatou suesue ma le filiga i le afioga a le Atua o loo maua i tusitusiga paia, ma i aoaoga a o tatou perofeta. E le gata i lea, o lena ituaiga o suiga faaleagaga e mafai ona oo mai pe a tatou finafinau e faamamalu feagaiga na tatou osia ma le Alii e ala i le ola i le usiusitai i poloaiga. O nei taumafaiga e mafai ona aumaia se toafilemu lē leoa ma le mautinoa i o tatou loto. O le taulai atu i na faatinoga, e mafai ona fesoasoani moni e suia ai o tatou fale i ni nofoaga migao o le sulufaiga faaleagaga—malutaga patino o le faatuatua e afio ai le Agaga, e faapei foi o le aafiaga o Mose i le mauga.

E mafai foi ona tatou o’o i lena ituaiga o suiga faaleagaga pe a tatou auai ma le faamaoni i sauniga tapuai a le Ekalesia, e aofia ai le liliu atu o o tatou loto i le Alii e ala i lo tatou lagiina ma le faamaoni o viiga paia. O le faatafa ese—pei o Mose—mai faasalavei faalelalolagi, aemaise o a tatou telefoni feavea’i po o se isi lava mea e le ogatasi ma lenei taimi paia, e mafai ai ona tatou tuu atu la tatou gauai uma i le taumamafa ai i le faamanatuga, ma o tatou mafaufau ma loto ua taulai atu i le Faaola ma Lana taulaga togiola faatasi ai ma a tatou lava feagaiga. O lena taulai atu i le faamanatuga o le a aumaia ai se taimi migao o le faafouina o a tatou fesootaiga ma le Faaola ma o le a avea ai le Sapati o se mea fiafia ma suia ai o tatou olaga.

O le taunuuga, e mafai ona tatou o’o i lenei suiga faaleagaga i lo tatou avea ai ma so’o a o tatou tapuai e le aunoa i le mauga o le maota o le Alii—o o tatou malumalu paia—ma finafinau e ola ma le mautinoa i feagaiga, aemaise ai pe a tatou fetaiai ma tofotofoga o le olaga nei.

Ua ma o’o patino ma lo’u toalua i nisi o taimi paia i le mauga, i le migao a o ma finafinau e faaaoga nei mataupu faavae i o ma’ua olaga, lea na afua ai se suiga ‘anoa i lo ma avea ai ma so’o. Ou te manatua e faapei o ananafi le savavali e ui atu i le fanuamaliu a’o le’i tanuina le ma atalii lona lua, o lē sa fanau lē āu ma e le’i ola, a o i ai pea lo’u toalua i le falemai. Ou te manatua le tatalo atu i le Atua ma le lotonaunau tele ma le migao, e talosagaina se fesoasoani ou te taulimaina ai lena tofotofoga faigata. I lena taimi, sa ou maua ai se faamautinoaga manino ma le mamana i lo’u loto: O le a lelei mea uma i o ma olaga pe afai ma te tutumau ma lo’u toalua, ma uumau i le olioli e oo mai i le ola ai i le talalelei a Iesu Keriso. O le mea sa foliga o se luitau lofutina, ma faanoanoa i lena taimi na liua i se aafiaga paia, migao, ma se taualuga na fesoasoani e lagolagoina ai lo ma’ua faatuatua ma sa maua ai le mautinoa i feagaiga sa matou osia ma le Alii, ma i Ana folafolaga mo a’u ma lo’u aiga.

O’u uso e ma tuafafine, o le migao mo le paia e aumaia ai le lotofaafetai faamaoni, e faalautele ai le fiafia moni, e tata’i atu ai o tatou mafaufau i faaaliga, ma aumaia ai le olioli sili atu i o tatou olaga. E tuuina ai o tatou vae i luga o eleele sa, ma siitia ai o tatou loto i le Atua.

Ou te molimau atu ia te outou, a o tatou finafinau e tuufaatasia lena mana i o tatou olaga i aso taitasi, o le a mafai ona tatou faateleina lo tatou lotomaualalo, faalautele lo tatou malamalama i le finagalo o le Atua mo i tatou, ma faamalolosia lo tatou talitonu mautinoa i folafolaga o feagaiga na tatou osia ma le Alii. Ou te molimau atu a tatou opoina lenei meaalofa o le migao mo mea paia—pe i le mauga o le fale o Ieova, i se faletapuai, pe i o tatou lava fale—o le a faatumuina i tatou i le maofa maoa’e ma tatou te ofo a o tatou fesootai atu i le alofa atoatoa o lo tatou Tama Faalelagi ma Iesu Keriso. Ou te molimau atu ma le migao i nei upumoni, i le suafa paia o lo tatou Faaola ma le Togiola o Iesu Keriso, amene.