O Lo’u Alofa mo le Faaola o La’u “Mafuaaga”

Pe ua outou matauina ea le tuuina mai pea lava pea e lo tatou perofeta pele, o Peresitene Russell M. Nelson ia valaaulia ia i tatou? E le o se mea e ofo ai, lona valaaulia o i tatou e suesue ma mafaufau loloto i savali na faasoa mai i konafesi e lua talu ai. Ia Aperila 2024, na ia saunoa ai, “Ou te faamoemoe o le a outou suesue pea i savali o lenei konafesi i masina o gasolo mai.” Ona oo lea ia Oketopa 2024, na ia saunoa ai: “Ou te uunaia outou e suesue i savali [a le au failauga].” Faaaoga savali e pei o se suesuega i potu suesue faasaienitisi e uiga i mea e moni ma mea e le moni i le isi ono masina e sosoo ai.”

E mafai ona faaopoopo nei valaaulia i valaaulia faaperofeta ua tatou mauaina i le gasologa o o tatou olaga, e aofia ai aemaise valaaulia na tatou mauaina i tausaga talu ai nei. Atonu tatou te lagona pe mafaufau i nei valaaulia o se isi mea e moomia ona faaopoopo ia tatou lisi o mea e fai, ona sa valaaulia pe talosagaina i tatou e fai. Ae mata e i ai nisi mea e sili atu i lo lena?

O le mafaufau loloto i lenei mea ma valaaulia uma ua tatou mauaina, ua ou toemanatua ai se mea sa ou aoaoina ma fai ai la’u faaiuga i tausaga ua leva. O loo ou taumafai e faia nei mea, ia e tatau ai mo a’u ona ou te alofa ia te Ia; ou te alofa i lo’u Faaola. O le mafuaaga moni lea ma le aupito mamana ou te faia ai mea ua ou faia, ona faafesoota’ia ai lea o lenei mea ma lo’u alofa mo outou, o’u uso e ma tuafafine.

I le avea ai ma o outou uso, ou te faamoemoe o le a outou faitaulia a’u upu o se valaaulia faamaoni e saili ia malamalama i le avanoa e faafesootai ai mea uma tatou te faia ma lo tatou alolofa mo le Faaola.

O le faia o lenei mea o le a fesoasoani tatou te malamalama ai i le “mafuaaga” moni i tua atu o mea uma tatou te faia o ni soo o le Faaola. O le a fesoasoani lenei mea ia i tatou e faamalolosia ai a tatou sootaga faalefeagaiga ma le Atua, malamalama ai i Ana upumoni paia ma faavavau—Ana upumoni faavavau ma moni a’ia’i ia o le a lē suia lava. O upumoni faavavau e pei o le “Aua ua faapea lava ona alofa mai o le Atua i le lalolagi, ua ia aumai mai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”

E uiga ese i nisi taimi ona tatou te faia pea lava pea ia mea e o’o ai ina liua e avea ma tumasani, ma tatou faatagaina ai nei tumasani po o gaoioiga e faatonufolau ai a tatou taumafaiga e fausia le faatuatua ia Iesu Keriso. E foliga mai ua tatou faia nei mea ona ua tele tausaga o tatou faia lava e aunoa ma le mafaufau i le aafiaga ai o la tatou sootaga faalefeagaiga ma le Faaola.

I lo tatou lalolagi, e masani ona tatou taulai i mea tatou te fai ma le faataunuuina pea lava pea o galuega ma sini. I lenei siosiomaga faaleagaga, ua tatou maua ai le avanoa e o’o atu ai i talaatu o le na ona faia o mea pe faataunuuina sini e ala i le malamalama i le mafuaaga ua tatou faia ai na mea. A mafai ona tatou malamalama ma faafesootai faapea o le mafuaaga i tua atu o a tatou faatinoga, e fesootai i lo tatou alolofa mo le Faaola ma lo tatou Tama Faalelagi, e ala i le faaaoga o nei avanoa o le a tatou malamalama e ui ina tatou faia mea amiotonu e pei o gaoioiga po o tumasani faaleEkalesia, ma faia ma le talafeagai o se mea lelei, ae, pe a tatou faafesoota’ia ma le pe “aisea,” o le a faamanuiaina i tatou e malamalama i le mafuaaga. O le a lē na ona faia o mea lelei po o le faia sa’o; ae o le a tatou faasa’oina foi na mea.

Mo se faataitaiga, a e faatuina se sini e faitau ia tusitusiga paia, faia tatalo faamaoni, pe tapena se gaoioiga mo lou aiga po o le uarota, pe o le sini moni ea o le tau ina faataunuu nei galuega? Pe, o nei ea faatinoga o ni auala, po o ni meafaigaluega ua e maua e faataunuu ai le sini moni? Pe o le faamoemoega ia na ona fai o se gaoioiga ona ua tele tausaga o tatou faia pea, ona maka faasa’o lea o le pusa faapea ua mae’a ona tatou faia? Pe, o auala ea nei tatou te faaaogaina e aoao ai, lagona, ma fesootai ai ma le Faaola?

Faamolemole aua ne’i faaluafesasi ia te outou la’u tala e uiga i le faia o gaoioiga ma tumasani po o le faatutuina o sini ma galulue malosi ia ausia; e leai lava se mea o afaina ai lea mea. Ae peitai, ou te valaaulia outou ia tatala o outou loto ma mafaufau i le avanoa ma faamanuiaga o le malamalama i le mafuaaga tatou te faia ai nei mea, ma le ala tatou te faatino ai lo tatou talitonuga faalelotu.

O se faataitaiga autu o tumasani e totonugalemu ia Keriso o le lu’i lea na tuuina mai e Peresitene Dallin H. Oaks ia i tatou uma e fai ai ma sui o le Au Peresitene Sili. Na saunoa Peresitene Oaks: “A o tatou ulufale atu i lenei tausaga fou, ia tatou tapenapena mo se faamanatuga o le Eseta o le taulaga togiola a Iesu Keriso. … E le afaina po o a mea e talitonu ai isi pe fai, e ao ona tatou faamanatuina le Toetu Mai o lo tatou Faaola soifua e ala i le suesueina o Ana aoaoga ma fesoasoani e faavae ni tumasani o le Eseta i lo tatou sosaiete atoa, aemaise i totonu lava o o tatou aiga.” Ua outou tagai la i ai, ua le na o se valaaulia ia fai ni tumasani. Ae, ia tatou faaaogaina nei tumasani o ni auala e aoao atili ai e uiga i le Faaola ma manatua Lona Toetu Mai.

O le tele e mafai ai ona tatou faafesoota’ia le mafuaaga ma lo tatou alolofa mo le Faaola, o le tele foi lea o le a mafai ai ona tatou mauaina mea tatou te moomia pe o loo sailia. Na saunoa mai Peresitene Nelson, “Po o a lava au fesili po o faafitauli o i ai, e maua lava le tali i le soifuaga ma aoaoga a Iesu Keriso.” Ona ia tuuina mai lea o le valaaulia lenei: “Aoao atili e uiga i Lana Togiola, Lona alofa, Lona alofa mutimutivale, Lana aoaoga faavae, ma Lana talalelei toefuataiina o le faamalologa ma le alualu i luma. Liliu Atu ia te Ia! Mulimuli ia te Ia!”

Manatunatu i lenei mea i o outou loto ma mafaufau: Pe e te talitonu o le valaaulia a Peresitene Nelson o loo i ai le faamoemoega e fesoasoani ia i tatou e saunia se lisitulitatao o le a tatou faaputuputu ai se malamalama atili ma faamae’a ia galuega fai ina ia mafai ai ona tatou maka esea lenei valaaulia mai a tatou lisi o mea e fai? Pe o ia valaaulia i tatou e mafaufau i itu o nei upumoni faavavau ma mataupu faavae o se avanoa e malamalama ai i le mafuaaga ma faafesoota’i ai le alofa faalefeagaiga o le Faaola mo i tatou i la tatou malaga faaleso’o i le olaga atoa?

Sei ou faapupula atua le mataupu faavae o loo ou taumafai e faamatala atu. O se tasi mea e filifili ai, lea atonu e tele na’ua, o le faitauina lea o savali uma mai le konafesi aoao i le taimi e tasi; a mae’a la ona ou faia, o le a ou makaina lea valaaulia ua uma mai la’u lisi o mea e fai e aunoa ma le faia o se isi lava mea i mea sa ou faitauina. Ou te malamalama o se tulaga matautia lenei, ae e le mo’i. Atonu, e toatele o loo tutū i le va o nei tulaga matautia.

O le valaaulia o le, suesue ma mafaufau loloto i savali mai le konafesi aoao ma faaaoga e filima’oti ai ma malamalama i mea e mafai ona tofu fai e i tatou e faaleleia ai.

Pe a tatou taliaina le valaaulia, malamalama i le “mafuaaga” i tua atu, o le a tatou maua nisi avanoa e latalata atili ai i le Faaola. O le a amata ona tatou malamalama faapea, ona ou te alofa i le Faaola, ua ou manao ai e aoao atili e uiga ia te Ia e ala i le suesueina o upu a perofeta soifua. Ma ona ou te alofa foi i o’u uso a tagata, o lea o le a ou faasoa atu ai aoaoga a perofeta, tagatavaai, ma talifaaaliga i isi, e amata atu i ē pele ia te au.

I ia faataitaiga uma e lua, o loo e faia se mea amiotonu. O le tasi, o le sini e foliga mai o le faaaogaina o auala ua tuuina mai e le Tama Faalelagi ma le Faaola ia i tatou, o savali ia na faasoa mai i le taimi o le konafesi aoao. O le lona lua o loo aofia ai faamanuiaga maoae o le mauaina o le malamalamaaga i mafuaaga o loo ta’oto ai, o loo aumaia ai se ala faataoto e malamalama ai i upumoni faavavau ma faamanuiaga ua folafola mai ia i latou uma ua avea aoaoga ma le soifuaga o lo tatou Faaola o Iesu Keriso, ma itu e taulai i ai o latou olaga.

Ou uso e ma tuafafine pele, ou te faamoemoe ua mafai ona outou lagona ma vaai i le taua o le faafesoota’i o a tatou faatinoga ma lo tatou alolofa mo le Faaola. I se lalolagi ua fesootai i fefaatauaiga, fesootaiga, ma tekinolosi, e tele leo o le a taumafai e faatosina oe ma, afai e mafai, o le a ta’ita’i oe ia talitonu faapea o nisi o mea moni faavae o le talalelei toefuatai a Iesu Keriso ua le tatau ona i ai. O nei leo e amata i le upumoni e tatau ai e uiga i le manaomia o se toefuataiga i nei aso e gata ai, e aofia ai le tatau ona i ai o le malo o le Atua i le lalolagi, lea ua suitulaga ai le Ekalesia toefuatai a Iesu Keriso o le Au Paia o Aso e Gata Ai.

Tou te faalogoina ni leo o tauanau mai pea ua na o se sootaga patino po o se malamalama i le Faaola ua lava lea, ma o se talitonuga faalelotu po o le Ekalesia toefuataiina e le moomia pe e le tatau ai. Ou te valaaulia outou ia faateletelegese ona mafaufau, pe ia teena le tosina atu i nei manatu taufaasese ma ia vave ona manatua mea sa ta’u mai e le Faaola ma aoao ai i tatou talu mai ona po anamua—e amata i le alofa o le Tama Faalelagi ma Iesu Keriso mo i tatou ma faafesoota’i lo tatou alolofa mo i La’ua o le mafuaaga lea e mulimuli ai ia te i La’ua

Na afifio mai le Atua le Tama ma Lona Alo ma talanoa atu ia Iosefa Samita ina ia toefuatai mai le Ekalesia a Iesu Keriso ma amata le tisipenisione o le atoaga o taimi, o Lona Malo i le lalolagi. O le mea lea, O Le Ekalesia a Iesu Keriso o le Au Paia o Aso e Gata Ai o le auala lea na faatuina e le Tama Faalelagi e maua ai feagaiga e mafai ai e i tatou ona toefoi atu i le aiga. O lea, tatou te manaomia isi mea nai lo le na o se sootaga patino ma le Tama Faalelagi ma Lona Alo; tatou te manaomia sauniga e tatau ai faaleperisitua ia tatou te osifeagaiga ai ma i La’ua. O lea mea e saunia ai se sootaga faalefeagaiga ma i La’ua ma tatou maua ai le avanoa i lo La’ua alofa faalefeagaiga, ma mafai ai ona tatou maua le malo aupito maualuga o le mamalu ua saunia mo i latou o e tumau ma faamaoni ia latou feagaiga.

Faatasi ai ma le malosi atoa o lo’u agaga, ou te molimau atu i le moni ma le paia o lo tatou Faaola o Iesu Keriso. E alofa o Ia ia te oe. Ua ia silafia mea o loo tutupu i lou olaga. O loo faamafola mai Ona aao, ma tuuina mai le valaaulia “Ia outou o mai ia te au, … o au foi e malolo ai outou.”

Ou te alofa i le Faaola, ma o lo’u alofa ia te Ia o la’u “mafuaaga” lea. I le suafa o Iesu Keriso, amene.