O Lou Salamo E Le Lafo Ai se Avega ia Iesu Keriso; E Faateleina Ai Lona Olioli

O le asō ou te fia tautala atu ia i tatou o ē lagona i nisi taimi, “O le salamo ma le faamagaloga e foliga e aoga mo tagata uma vagana ai a’u.” …

Sa ou aoaoina e faapea, afai e te faatalitali seia lava lou mamā po o lou atoatoa e te alu ai i le Faaola, e te le o malamalama i le taula’iga autu! …

Ou te ta’utino atu, e ui ina popole le Atua e uiga i a tatou measese, e sili atu Lona āno i le mea e tupu pe a mavae ona tatou faia o se sese. Pe o le a tatou liliu atu ma saga liliu atu pea ia te Ia? …

O le valaaulia ia salamo o se faailoaga o le alofa o le Atua.

O le fai atu ioe i lena valaaulia o se faailoaga o lo tatou alofa. …

Tatou te le tumau i luga o le ala o feagaiga e ala i le lē faia lava o se mea sese. Tatou te tumau i luga o le ala i le salamo i aso uma.

Ma a tatou salamo, e faamagalo mai le Atua e aunoa ma le faamāina o i tatou, faatusatusa i tatou i se isi lava, pe ‘otegia foi i tatou ona o le mea lava lea e tasi na tatou salamo ai i le vaiaso ua te‘a.

E sagisagi fiafia o Ia i taimi uma e silasila mai ai o tatou tootutuli. E fiafia o Ia e faamagalo i tatou ona iā te Ia, o i tatou o ni tagata olioli tele!

E te lē o lagona ea e moni lena mea?

Aisea ea la e faigata tele ai ona tatou talitonu?! O Satani, le tautuua’i sili ma le taufaasese, e faaaogaina le maasiasi e taofia ai i tatou mai le Atua. …

… O lou taua e “taua i le silafaga a le Atua,” i taimi uma, po o fea lava e ave i ai oe e au faaiuga. …

Ou te tu atu iinei e molimau atu o Iesu Keriso e tuuina atu le malamalama ia i latou o ē nonofo i le pogisa. … Savali e ki le Moli—lo tatou Susulu Atoatoa o le Faamoemoe.