Moto. Visu. Kucheza Dansi. Na Injili.

Dansi ya Kisamoa ya fireknife, au ailao afi, ni ya kisasa iliyotokana na ngoma ya jadi ya vita. Ni kipaji cha kipekee, aina ya sanaa na maonyesho, na, kwa wengi, ni njia ya kuheshimu utamaduni wao.

Hivi ndivyo vijana watatu kutoka Hawaii, Marekani, wanavyoelezea:

Vivian, 18: “Kitamaduni, ilikuwa ni kitu ambacho mashujaa walifanya kwa kisu pekee. Baadaye, moto na kuzunguka viliongezwa. Ni sawa na kifimbo cha kuzungusha, kikiwa tu na moto kwenye ncha zote.”

Tui, 12: “Dansi ya Fireknife inahusisha joto jingi. Ni mizunguko mingi pia. Unarusha hata kisu na kukizungusha wakati kinapozunguka.”

Joseph, 18: “Wakati moto unapotembea, upepo unapiga filimbi, na ngoma zinapigwa, ni kelele nyingi sana. Lakini kusema ukweli, ni aina ya wakati wa ukimya wa kiroho kwangu, kwa sababu ina maana kubwa kwangu. Fireknife ni njia ninayounganika na familia yangu na utamaduni wangu.”

Kwa vijana hawa, dansi ya fireknife sio tu talanta ya kushangaza na nadra. Imewafundisha pia masomo mengi ya thamani ya maisha kuhusu kubaki karibu na Bwana kwa kuishi injili na kuwasaidia wengine.

Unapocheza dansi ya fireknife, mambo mengi yanaweza kwenda vibaya. Petroli inaweza kutapakaa kote kwenye mshikio na kuufanya uteleze. Upepo pia unaweza kubadilisha vitu na kufanya kisu kuwa vigumu kukidaka. Kumtumaini Bwana wakati nacheza dansi kumekuwa msaada mkubwa kwangu.

Mojawapo ya maandiko ninayoyapenda ni Mithali 3:5, ambayo inazungumzia kumtumaini Bwana kwa moyo wako wote. Nadhani hiyo ni muhimu kwa sababu wakati wa kucheza unatambua kwamba unajumuisha mazoezi hayo yote, lakini kwa kweli inarudi kwako, kwa fireknife, na kwa Baba wa Mbinguni.

Ninapenda kusali kwa Baba wa Mbinguni, “SAWA”, nimefanya mazoezi, sasa tafadhali ongoza mikono yangu.”

Kuna maandalizi mengi ambayo huenda katika mashindano ya fireknife. Ninafanya mazoezi kila siku kwa takribani miezi sita inayokaribia mashindano.

Inaweza kuwa vigumu, pia, kwa sababu ratiba yangu ina mambo mengi sana. Lakini mimi daima hutengeneza nafasi kwa ajili ya Bwana kwa kwenda kanisani, kwenye shughuli za Wavulana, na seminari na kwa kusoma maandiko yangu na kusali. Ninapofanya mambo haya, ninaona tofauti katika siku yangu. Kila kitu Kinafanikiwa.

Kwa hakika ninahisi kwamba Kristo yupo pale kwa ajili yangu. Ikiwa unamtumaini Bwana na kujitahidi kumweka Yeye kwanza, Yeye atakusaidia kwa chochote unachohitaji kufanya.

Wakati nakua, niliwatazama wajomba zangu na binamu zangu wakicheza fireknife. Nilifikiri ilikuwa vizuri sana, lakini sikujua kama ningeweza kufanya hivyo mimi mwenyewe. Katika shule ya upili, niliifanya kuwa mojawapo ya malengo yangu ya kujifunza jinsi ya kufanya hivyo. Baada ya kujifunza, nilifanya lengo langu kuwa mahususi zaidi: Nilitaka kushindana katika mashindano ya fireknife.

Fireknife imenisaidia kupata ujasiri ndani yangu. Unapocheza dansi, kuna hatua fulani ambapo unatupa kisu juu, unakitazama hewani, na kisha unakidaka. Nilikuwa nikikimbia makali ya kisu baada ya kukirusha juu. Baba yangu alinifundisha kwamba nilihitaji kujitolea kwa dhati kwenye hatua hiyo na kujiamini mimi mwenyewe.

Baada ya muda, nilianza kujipa ujasiri zaidi nilipokuwa nikitumbuiza na katika kila kitu kingine. Ni vizuri sasa kwa sababu wakati mwingine wasichana huja kwangu baada ya maonyesho na kusema walivutiwa na pia wanataka kujaribu kucheza fireknife. Ninasisimka sana kwamba ninawatia moyo watu wengine kufanya kitu walichofikiria labda wasingeweza kufanya.

Ninapofanya onyesho, sijisikii wasiwasi. Ninahisi kusisimka. Nimejifunza kwamba hata kama nikikosea, ninaweza kugeuza makosa kuwa kitu kizuri. Ni kama vile kuchora. Wakati mchoraji anapofanya kosa, wanaweza kulifanya kuwa kitu kipya. Wakati mwingine ninaangusha fireknife yangu, lakini ninaichukua na kuendelea kucheza.

Kujitia moyo kumenisaidia sana dhidi ya hofu zangu. Badala ya kuwa na mawazo kama, “Je, kama nikikosea?” Ninajaribu kuwa na mawazo zaidi kama vile, “Sawa, vipi kama nikifanya vyema!”

Pia imekuwa utaratibu kwangu kusema sala fupi kila wakati kabla ya onyesho la fireknife. Kusali kunanilinda na hunisaidia kuwa na dansi nzuri. Ninaposali, ninahisi kujiamini kwamba nitafanya vizuri.

Kabla sijatumbuiza fireknife, kwa kawaida ninakuwa mwenye wasiwasi. Kila wakati kabla sijaendelea, ninasali. Wakati fulani, kabla sijaendelea nilisali, na nilihisi vizuri na sikuogopa. Nilipocheza dansi, nilihisi kama mtu alikuwa amesimama kando yangu.

Sala kwa kweli hunisaidia nisijisikie woga. Baada ya kusali, ninatambua kwamba ninaburudika tu!

Msimu huu wa joto uliopita, tulifanya onyesho la fireknife huko Romania na Bulgaria. Baba yangu daima ametufanya tujifunze wimbo wa “Upendo Nyumbani” (Nyimbo za Dini, na. 166) katika lugha ya nchi tunazotembelea. Tunafanya hivi ili tuweze kuimba pamoja kama familia baada ya maonyesho.

Nadhani ujumbe wa upendo nyumbani ni muhimu kwa sababu unatukumbusha kuwa na upendo kila mahali tunapoenda. Ninahisi kama ninawainua watu wengine na kuwafanya wawe na furaha. Na ingawa wakati mwingine hawawezi kuzungumza lugha yangu, ninajua kwamba wamehisi injili tuliyoshiriki kupitia talanta zetu.

Nainoa A., 13

Ujumbe wa upendo nyumbani ni muhimu kwa sababu kama watu hawajui kwamba kuna upendo karibu yao, basi wanaweza kuwa na huzuni. Wakati kunapokuwa na upendo nyumbani kwangu, ninahisi amani na utulivu.

Dansi ya fireknife ni njia mojawapo ambayo vijana hawa huangaza nuru yao na kushiriki vipaji vyao kwa wengine. “Ninapata kufanya maonyesho na kushiriki vipaji vyangu ulimwenguni kote nikiwa na familia yangu. Inanifanya nijisikie furaha ndani kujua kwamba ikiwa unashiriki vipaji vyako, basi utawainua wengine,” Nainoa anasema.

Kaka mkubwa wa Nainoa, Kawiki, anasema dansi ya fireknife inamkumbusha jinsi nuru inavyozidi giza. Kwake, kushiriki talanta zake ni kama kushiriki nuru yake kwa wengine.

Joseph anasema kwamba tunapong’ara, tunang’aa kwa ajili ya Baba wa Mbinguni. “Tunaposhiriki kile tulicho nacho, siyo tu tunajibariki wenyewe, au kuwabariki wale ambao tunashiriki nao talanta zetu, bali pia tunatoa sifa kwa Baba yetu wa Mbinguni.”

Vivian anasema babu yake daima anashiriki maandiko Mathayo 5:16, ambayo yanazungumzia kuhusu kuruhusu nuru yetu iangaze mbele ya watu. “Nadhani ni andiko zuri kwa sababu huna haja ya kuwa mzuri kwenye fireknife ili kushiriki injili. Unaweza kuwa mzuri katika kitu chochote na kutumia talanta zako kushiriki injili kwa njia hiyo.”