Fiefia Fakauike ʻi he Folofolá

Hivá: “Talamai ʻa e Ngaahi Talanoa ʻo Sīsū” (Tohi Hiva ʻa e Fānaú, 36)

Folofolá: ʻĪsaia 9:5

ʻEkitivitií: Te tau lava ʻo ako fekauʻaki mo Sīsū Kalaisi ʻi heʻetau lau ʻa e Fuakava Motuʻá. ʻAlu ki he peesi 49 ke fakahoko ha ʻekitivitī fekumi fakataha ʻi he folofolá. Pe ko e fili ha taha ʻo e ngaahi potufolofolá ke lau fakataha.

Hiva: “Fānau Au ʻa e ʻOtuá” (Tohi Hiva ʻa e Fānaú, 2)

Folofolá: Mōsese 1:4

ʻEkitivitií: Naʻe folofola ʻa e ʻOtuá kia Mōsese, “Ko hoku foha koe” (Mōsese 1:4). Ko e fānau kotoa kitautolu ʻa e Tamai Hēvaní! Fakakaukau ki ha taha ʻokú ne fiemaʻu ha fakamanatu ko e fānau ia ʻa e ʻOtuá. Hivaʻi pe tā ange ʻa e foʻi hiva “Fānau Au ʻa e ʻOtuá” (Tohi Hiva ʻa e Fānaú, 2).

Hiva: “ʻOku ʻOfa ʻEku Tamai Hēvaní ʻIate Au” (Tohi Hiva ʻa e Fānaú, 16)

Folofola: Mōsese 2:1

ʻEkitivitií: ʻI he malumalu ʻo e fakahinohino ʻa e Tamai Hēvaní, naʻe fakatupu ʻe Sīsū Kalaisi ʻa e māmaní (vakai Mōsese 2:1). Ko e hā ha ngaahi fakatupu fakaʻofoʻofa ʻokú ke houngaʻia ai? Fakahoko ʻa e ngāue fakameaʻa fekauʻaki mo e māmaní ʻi he peesi hono hokó! Te ke lava ʻo tā ha ʻū tatau lahi ange maʻa ho fāmilí. Kosi kinautolu ʻo tautau ʻi ha feituʻu ke fakamanatu atu naʻe fakatupu ʻe he ʻOtuá ʻa e māmaní maʻau koeʻuhí he ʻokú Ne ʻofa ʻiate koe.

Hiva: “Fili e Hala Totonú” (Tohi Hiva ʻa e Fānaú, 82)

Folofola: Mōsese 4:3

ʻEkitivitií: Naʻe ʻomi ʻe he ʻOtuá ʻa e meʻafoaki ʻo e tauʻatāina ke filí kiate kitautolu (vakai Mōsese 4:3). Ko e tauʻatāina ke filí ko e mālohi ia ke fai ha ngaahi filí. Te ke lava ʻo fai ha ngaahi fili ʻoku lelei ʻaki hoʻo muimui kia Sīsū Kalaisi mo tokoniʻi e niʻihi kehé. Tokoniʻi mo ho fāmilí ha taha. Tā leva pea kosi ʻo toʻo ha fakatātā ʻo ha laʻinima, hiki ai ʻa e meʻa naʻá ke faí pea ʻave ki he Ko e Kaumeʻá! Ako lahi ange ʻi he peesi 13.