“Mateuteu ke ʻAʻeva mo Sīsū,” Ko e Kaumeʻá, Sānuali 2026, 4–5.

Mateuteu ke ʻAʻeva mo Sīsū

Ko ha ongo māhanga fefine ʻokú na pukepuke ha tatau ʻo e pulusinga ʻo e Ko e Papitaisó mo e Hilifakinimá ʻi he makasini Ko e Kaumeʻá

Mālō e lelei!

Ko e ongo māhanga fefine kimaua ko Heili mo Vaioleti mei ʻAlesona, USA. ʻOkú ma loto ke muimui ki he sīpinga ʻa e Fakamoʻuí, ko ia ʻokú ma mateuteu ke papitaiso!

Ongo tamaiki fefine ʻokú na tuʻu ʻi ha vaitafe mo ʻena faʻeé mo e tamaí

ʻOkú ma saiʻia ʻi he luelue ʻi he veʻe vaitafe ʻoku ofi ki homau ʻapí. ʻI he taimi ʻe papitaiso ai kimauá, te ma kamata ha ʻaʻeva fakalaumālie foʻou mo Sīsū! ʻE ʻiate kimaua ʻa e Laumālie Māʻoniʻoní ʻi heʻema feinga ke muimui ki he Fakamoʻuí ʻi he ʻaho takitaha.

Ongo tamaiki fefine ʻokú na tānaki ngeʻesi fingota ʻi he veʻe vaitafé

Ko e taimi ʻe niʻihi ʻokú ma tānaki ha fanga kiʻi ngeʻesi fingota ʻi he veʻe vaitafé. ʻOkú na fakamanatu mai ha meʻa naʻe talaʻofa mai ʻe he Fakamoʻuí: “Neongo ʻa e tatau ʻo hoʻomou angahalá mo e kulaʻahoʻahó, ʻe hoko ia ke hinehina ʻo hangē ko e ʻuha hinaekiakí” (ʻĪsaia 1:18). Koeʻuhí ko Sīsū Kalaisi, te tau lava ʻo fakatomala mo toe maʻa hili haʻatau fai ha fili ʻoku hala. Te tau tui foki ha vala hinehina ʻi hotau ʻaho papitaisó ke manatua ʻeni.

Ko e ongo tamaiki fefine ʻoku tolo maka ʻi he vaitafé mo ʻena tetí

ʻOku poto ʻaupito ʻema tetí ʻi he tolo ʻo e fanga foʻi maka lafalafá ʻi he vaitafé! ʻOkú ne akoʻi kimaua ʻi he founga ke fai ai iá, pea ʻokú ma kiʻi poto ange ʻi he taimi kotoa pē ʻokú ma feinga aí. ʻOku tatau ʻeni mo e founga ʻoku hoko ai ʻa Sīsū Kalaisi ko e Faiako haohaoá. ʻOkú Ne finangalo ke tokoniʻi kitautolu ke tau ako mo tupulaki.

Ongo tamaiki fefine ʻokú na luelue ʻi he vaitafé lolotonga ʻena pikinima mo ʻena faʻeé

ʻOku hekeheke ʻa e ngaahi foʻi maka ʻi he vaitafé, pea ʻoku tokoni ʻema piki ki he nima ʻema faʻeé. ʻOku ʻi ai maʻu pē ʻa Sīsū ke tokoniʻi kitautolu ʻi he taimi ʻoku tau fiemaʻu tokoni aí. Pea ʻi he taimi te ma papitaiso aí, te ma palōmesi ke tokoniʻi ʻa e niʻihi kehé ʻi he founga naʻá Ne mei fakahokó!

ʻOkú ma saiʻia ʻi he luelue ʻi he veʻe vaitafé mo homa fāmilí. ʻI he taimi ʻoku tau papitaiso aí, te tau ʻi he hala ʻo e fuakavá ʻa ia ʻoku fakatau ki hotau ʻapi fakalangí. Te tau lava ʻo toe fakataha mo hotau ngaahi fāmilí ʻo taʻengata!

ʻOku ou fiefia ke papitaiso he ʻoku ou loto ke muimui ʻi he sīpinga ʻa Sīsuú. ʻOku ou fakahā ai ki he Tamai Hēvaní ʻoku ou loto ke tauhi ʻa e ngaahi fekaú.

Vaioleti W., taʻu 7, ʻAlesona, USA

ʻOku ou fakaʻamu ke muimui kia Sīsū Kalaisi. Hili ʻeku papitaisó, te u lava ʻo maʻu ʻa e Laumālie Māʻoniʻoní, pea ʻe lava ke tokoniʻi au ʻe he Laumālie Māʻoniʻoní ke u loto-toʻa.

Heili W., taʻu 7, ʻAlesona, USA