“Kuo Papitaiso ʻEni Koe. Pea Hā Leva?” Ko e Kaumeʻá, Sānuali 2026, 36–37.

Kuo Papitaiso ʻEni Koe. Pea Hā Leva?

Kuo ʻosi papitaiso nai koe? ʻOku tōatu ia! ʻOku fiefia ʻaupito ʻa e Tamai Hēvaní mo Sīsū Kalaisi ʻi hoʻo fai ʻa e fili ko ia ke muimui kiate Kinauá.

Ko e papitaisó ko e taha ia ʻo e ngaahi ʻuluaki sitepu ʻi hoʻo fononga ki ha vā fetuʻutaki fakafuakava fakaofo mo e Tamai Hēvaní pea mo hoʻo Fakamoʻuí. Ko ha ngaahi meʻa ʻeni ʻe niʻihi ke ke hokohoko atu hono faí pe kamata fakahoko ʻi he taimí ni ʻi he ʻosi ko ʻeni hono papitaiso koé.

Fakafanongo ki he Laumālie Māʻoniʻoní

Manatuʻi ʻa e taimi naʻá ke maʻu ai ʻa e meʻafoaki ʻo e Laumālie Māʻoniʻoní hili ho papitaisó? Te Ne lava ʻi he taimí ni ke ʻiate koe maʻu ai pē ʻi hoʻo fili ʻa e totonú. ʻOku faʻa fetuʻutaki mai ʻa e Laumālie Māʻoniʻoní kiate kitautolu ʻo fakafou ʻi he ngaahi fakakaukaú mo e ngaahi ongó. ʻE tokoniʻi koe ʻe hoʻo fakafanongo ki he Laumālie Māʻoniʻoní ke ke fai ha ngaahi fili ʻoku leleí mo maʻu ʻa e fiefia moʻoní.

Fakakaukau Ki Ai: Ko e fē nai ha taimi naʻá ke ongoʻi ai ʻa e Laumālie Māʻoniʻoní? ʻE lava pē ko ha aʻusia mahuʻinga ʻaupito pe ko ha aʻusia maʻamaʻa pē ia!

Fakatomala

ʻI he taimi naʻe fakalelei ai ʻa Sīsū Kalaisi maʻa ʻetau ngaahi angahalá, naʻá Ne ʻai ke tau lava kotoa ʻo fakatomala. ʻOku ʻuhinga ʻa e fakatomalá ki he tafoki mei he ngaahi fili halá ʻo hanga ki he Tamai Hēvaní mo Sīsū Kalaisi. ʻOkú Na fiefia ʻaupito ʻi heʻetau fili ke fakatomalá koeʻuhí he ʻoku tokoni ia ke tau toe ofi ange ai kiate Kinaua.

Fakakaukau Ki Ai: Ko e hā ha meʻa ʻe taha te ke lava ʻo fai ʻe tokoni ke ke tafoki ai ki he Tamai Hēvaní mo Sīsū Kalaisí?

Maʻu ʻa e Sākalamēnití

Hili ho papitaisó, ʻoku toe makehe ange ʻa e sākalamēnití. ʻI hoʻo maʻu ʻa e sākalamēnití ʻi he taimi ní, ʻokú ke fakafoʻou ai ʻa e fuakava naʻá ke fai ʻi he papitaisó ke tauhi ʻa e ngaahi fekaú mo muimui ʻia Sīsū Kalaisí. ʻI he taimi ʻoku ʻikai ke haohaoa ai hoʻo tauhi ʻa e ngaahi palōmesi ko ʻení, ʻoku hoko ʻa e sākalamēnití ko ha fakamanatu fakauike ʻoku tuʻunga ʻia Sīsū Kalaisi ʻa ʻetau lava ʻo fakatomala pea fakamolemoleʻi kitautolú.

Fakakaukau Ki Ai: Ko e hā ha founga ʻe taha te ke lava ai ʻo ʻai ke makehe ʻa e sākalamēniti ʻi he uike ní?

Teuteu ki he Temipalé

Ko e temipalé ko e fale māʻoniʻoni ia ʻa e ʻOtuá. ʻI he taʻu ʻe hoko ai ho taʻu 12, te ke lava ʻo ʻalu ki he temipalé ʻo tokoniʻi ʻa e niʻihi kehé ʻaki hono fakahoko ʻa e papitaiso maʻá e kau pekiá. Te ke lava ʻo fakahoko ʻamui ha ngaahi fuakava lahi ange ʻaʻau pē mo e Tamai Hēvaní. ʻE tokoni atu ʻa e meʻa ʻokú ke ako ʻi he temipalé ke ke hoko ʻo hangē ange ko e Tamai Hēvaní mo Sīsū Kalaisi!

Fakakaukau Ki Ai: Ko e hā ha meʻa ʻe taha te ke lava ʻo fai ʻi he taimí ni ke ke teuteu ai ke ʻalu ki he temipalé?