Vākovi mo e Kaungāmeʻá

Naʻe ʻakahi ʻe Meti ha foʻi maka ʻi heʻene lue ki ʻapí. Naʻe ʻikai ke mahino kiate ia. Ko e hā ʻa e ʻuhinga naʻá ne ongoʻi taʻeoliʻia aí?

Naʻá ne feohi maʻu pē mo hono kaungāmeʻa ko Siosefá. Ka naʻe hangē kuo taʻeoliʻiá ʻa Siosefa, pea naʻe iku ʻo foki vave ʻa Meti ki ʻapi ʻo kehe ia mei he meʻa naʻá ne palani ki aí.

Naʻe fakakaukau ʻa Meti, Mahalo ko e anga pē ia ʻeku fakakaukaú. Mahalo pē naʻe ʻikai ongoʻi fiefia ʻa Siosefa.

ʻI he ʻalu ʻa Meti ki he akó ʻi he ʻaho hono hokó, naʻá ne sio kia Siosefa ʻoku talanoa ki ha ngaahi kaungāmeʻa. Naʻe ui atu ʻa Meti ʻo taʻalo kiate ia. Naʻe sio mai ʻa Siosefa ki he feituʻu naʻe ʻi ai ʻa Metí, ka naʻe ʻikai ke ne taʻalo mai kiate ia. Naʻá ne tafoki ki hono ngaahi kaungāmeʻá.

Naʻe fakakaukauloto pē ʻa Meti, Naʻe ʻikai sio mai ʻa Siosefa ia kiate au.

ʻI he hokosia ʻa e taimi ke ngāue fakakulupu ai ʻi he kalasí, naʻe lue ʻa Meti kia Siosefa. “Te ke loto ke ta hoa?” Ko Meti ange ia.

Naʻe hangē naʻe ʻikai pē fanongo ange ʻa Siosefa kiate iá. Naʻe pehē ange ʻe Siosefa ki he tamasiʻi naʻe tangutu ʻi hono tafaʻakí, “Haʻu, Maiki. Ta lue taua ki hē ʻo ngāue ai.”

Naʻe mavahe leva ʻa e ongo tamaikí. Naʻe ongoʻi taʻefiemālie ʻa Meti. Naʻe mahino naʻe ʻi ai ʻa e meʻa naʻe ʻita ai ʻa Siosefa. Ka ko e hā nai?

Naʻe ʻikai ke ʻilo ʻe Meti pe ko e hā nai ha meʻa naʻá ne fai ke ʻita ange ai ʻa Siosefa. ʻOku ʻi ai pē taimi ʻe niʻihi ʻokú na faʻa vaʻinga peisipolo ai ʻi ha timi kehekehe lolotonga ʻa e mālōlō siʻí. Ka ʻokú na faʻa tā nima maʻu pē ʻi he tuku ʻa e vaʻingá. Ko e hā ʻa e ʻuhinga ʻoku ne ongoʻi ai naʻe fili ʻe Siosefa ke ʻi he timi fehangahangaí ʻi he meʻa kotoa pē?

Naʻe fakakaukau ʻa Meti, Ko e koloá pē ke u lava ʻo talanoa mo Siosefa ʻi he mālōlō siʻí.

ʻI he mālōlō siʻí, naʻe lele ʻa Meti ki he tamaiki kehe ʻi he loto malaʻé.

Naʻe ui atu ʻa Meti, “Hei, Siosefa!, ʻE lava ke ta talanoa ʻi ha kiʻi miniti?”

Naʻe talaange ʻe Siosefa, “ʻOku mei kamata ʻa e vaʻingá.”

Naʻe pehē ange ʻe Meti, “Sai, te u vaʻinga tautuaʻā mo koe kae lava ke ta talanoa.”

Naʻe talaange ʻe Siosefa, “ʻOkú ke tōmui koe. Kuo ʻosi fonu ʻemau tafaʻakí” mo ne lele ke kau fakataha mo ʻene timí.

Naʻe sio pē ʻa Meti ʻi he kamata ke vaʻinga ʻa e tokotaha kotoa. Kuo teʻeki ai faʻa hohaʻa ʻa Siosefa kimuʻa ki he fuʻu tokolahi ʻa e timí. Naʻe talitali lelei maʻu pē ʻa e tokotaha kotoa.

Ka naʻe ongoʻi moʻoni ʻe Meti ʻoku ʻikai talitali lelei ia ʻe Siosefa. Ko e hā ʻa e ʻuhinga naʻe anga peheni ai ʻa Siosefá? Ko e hā ʻa e ʻuhinga ʻoku ʻikai ke ne fakakau ai iá? Kuo teʻeki ke fai ʻe Meti ha meʻa hala!

Naʻe talaange ʻe Meti ki heʻene ongomātuʻá ʻi he kai efiafí, “Ko Siosefa ʻoku fai halá. ʻOku ʻikai teitei fie lea mai ia kia au ʻo talamai ʻa e ʻuhinga ʻoku ʻita aí!”

Naʻe pehē ange ʻe Mami, “ʻOku ngali faingataʻa moʻoni ia.”

Naʻe ongoʻi ʻe Meti ʻene fakatē loʻimatá. “ʻOku hangē kuo ʻikai ke toe fie kaungāmeʻa ia mo aú pea ʻoku ʻikai ke u ʻilo pe ko e hā ʻa e ʻuhingá.”

Naʻe talaange ʻe Teti, “ʻOku ou fiefia ʻi hoʻo feinga ke talanoa kiate iá. Mahalo pē te ke lava ʻo feinga ke talaange ki ai ʻa e ongo ʻokú ke maʻú pea ʻokú ke loto ke tokoni.”

Naʻe fakaʻilonga fehuʻi ʻa Meti. ʻI he founga naʻe fakafōtunga mai ʻaki ʻe Siosefá, naʻe ʻikai fakapapauʻi ʻe Meti pe ʻe fie fanongo ange ʻa Siosefa kiate ia.

Naʻe kuku ʻe Mami ʻa e nima ʻo Metí. “Te ma lotu atu maʻau, pea mo Siosefa.”

ʻI he teuteu ʻa Meti ʻi he pō ko iá ke mohé, naʻá ne fakakaukau ki he meʻa naʻe lea ʻaki ʻe Mami mo Tetí. Naʻá ne ʻosi lotua hono ngaahi kaungāmeʻá kimuʻa ʻi he taimi naʻa nau loto-mamahi pe faingataʻaʻia aí. Ka naʻe kehe ʻeni ia, ʻikai ko ia? Ko Siosefa ia naʻe angakovi ange kiate iá.

Ko e hā leva ʻa e ʻuhinga naʻe lotua ai ʻe he ongomātuʻa ʻa Metí ʻa Siosefá? ʻOku totonu nai ke ne lotua mo ia ʻa Siosefa?

Naʻe tūʻulutui ‘a Meti ʻi hono veʻe mohengá. Naʻe lotu ʻa Meti ʻo pehē, “Tamai Hēvani, ʻoku faingataʻa ke ʻikai ʻita kia Siosefa. ʻOku ou ʻilo ʻokú ne ʻita, ka kuo teʻeki ke ne talamai ʻa e meʻa ʻokú ne ʻita aí.”

Naʻe kiʻi longo ai ʻa Meti. “ʻOku ou fie talanoa mo ia, ka ʻoku ʻikai ke u fakapapauʻi pe te ne talamai ʻa e meʻa ʻoku hokó. Kātaki ʻo tokoniʻi ia ʻi he meʻa pē ʻokú ne ʻita aí. Pea ko e hā pē meʻa ʻe hokó, kātaki ʻo tokoni mai ke u kei angaʻofa pē kiate ia.”

ʻI he lotu ʻa Metí, naʻá ne kamata ongoʻi fiemālie ʻi hono lotó. Naʻá ne ʻiloʻi ko e Tamai Hēvaní mo Sīsū Kalaisi ʻa hono ongo kaumeʻa lelei tahá. Te Na lava ʻo tokoniʻi ia ke ne ʻofa ʻia Siosefa, ʻo tatau ai pē pe ko e hā ʻa e meʻa ʻe fili ʻe Siosefa ke faí. Pea te Na ʻi ai maʻana neongo kapau he ʻikai ke ne toe kaungāmeʻa mo Siosefa.

Naʻe malimali ʻa Meti. Tā ko e fakakaukau lelei ke lotu maʻa Siosefa.

ʻŪ tā fakatātā ʻa Mark Robison