Ko ha Kamata Foʻou

Naʻe toe pē ha lau ʻaho pea hokosia ʻa e taʻu valu ʻo ʻĀlekisanituleí! Naʻá ne fuʻu fiefia ʻi he naʻá ne palani mo Teti ha kiʻi fakaneifua makehe ʻi hono ʻaho fāʻeleʻí ke ne kai ʻi he tuku ʻa e akó. ʻI he aʻu atu ʻa e ongo faifekaú ki he maʻu meʻatokoni efiafí, naʻe talanoa ange ʻe ʻĀlekisanitulei fekauʻaki mo e fanga kiʻi keke sokoleti iiki ifo naʻá ne filí.

“Te ma ʻomi ha fanga kiʻi keke ʻe valu ke nau taki taha ʻi he teʻelango, kae ʻoua toe ʻai ha foʻi keke ʻe taha mo e foʻi teʻelango ʻe valu!”

Naʻe kata ʻa ʻEletā Lauena. “ʻOku tōtōatu ia. Pea mai haʻaku!”

Hili ʻa e maʻu meʻatokoni efiafí, naʻe akoʻi ʻe he ongo faifekaú ha lēsoni fekauʻaki mo e papitaisó. Naʻe tafoki hake ʻa ʻEletā Toiʻani kia ʻĀlekisanitulei. “ʻI he taimi ʻe papitaiso ai koé, ʻokú ke palōmesi ke muimui kia Sīsū Kalaisi.” Naʻá ne fakamatala kia ʻĀlekisanitulei fekauʻaki mo hono papitaiso iá peá ne vahevahe ange ʻene fakamoʻoní. “Naʻe tokoniʻi au ʻe he Laumālie Māʻoniʻoní ke u ongoʻi fiefia ʻaupito koeʻuhí ko e ʻaho ia naʻá ku fili ai ke u muimui kia Sīsū Kalaisi.”

Naʻe ʻikai faʻa tatali ʻa ʻĀlekisanitulei ki hono ʻaho papitaisó!

Ka ʻi heʻene tokoto ke mohe ʻi he pō ko iá, naʻe faingataʻa ke ne mohe. Naʻá ne saiʻia ʻi he fakakaukau ʻo e moʻui maʻá mo e foʻoú. Ka ʻe anga fēfē haʻane moʻui maʻa hili ʻa e papitaisó?

ʻI he pongipongi hono hokó naʻe lue atu ʻa ʻĀlekisanitulei ki he akó mo Teti. Naʻe pehē ange ʻe Teti, “Kuó ke fuʻu fakalongolongo ʻaupito ʻi he pongipongí ni. Ko e hā ʻa e meʻa ʻoku hokó?”

Naʻe māpuhoi ʻa ʻĀlekisanitulei, “ʻOku ou fakaʻamu ʻe lava ke papitaiso tuʻo lahi au.”

“He ko e hā?” Ko e fehuʻi ange ia ʻe Tetí.

Naʻe ʻeke ange ʻe ʻĀlekisanitulei, “Ko e hā ha toe founga te u lava ai ʻo moʻui maʻa hili ʻeku papitaisó. ʻOku faʻa ngalo maʻu pē ha ngaahi meʻa ʻiate au—hangē ko e fakalea mālō e lelei mo e fakamālō ki he kakai lalahí pea mo e faʻa kātakiʻi hoku kiʻi tehiná. ʻOku ou ʻilo te u kei fai pē ha ngaahi fehalaaki. ʻOku tuʻo taha pē ʻete papitaisó, ko ia ai, he ʻikai pē ke u toe maʻa au.”

Naʻe tuʻu ʻa Teti peá ne sio ki he mata ʻo ʻĀlekisanituleí. “Masiʻi. Mahalo ʻoku kiʻi fakamafasia ia. ʻOkú ke manatuʻi ʻa e taimi naʻa tau talanoa ai fekauʻaki mo hono fai ha ngaahi palōmesi ʻi he papitaisó?”

Naʻe kamo pē ʻa ʻĀlekisanitulei. “ʻOku ou tui ki ai.”

“Ko e taimi ʻokú ke papitaiso aí, ʻokú ke fai ha fuakava mo e Tamai Hēvaní. ʻOkú ke palōmesi ke tauhi ʻEne ngaahi fekaú mo muimui kia Sīsū Kalaisi. Hili iá, ko e taimi kotoa pē ʻokú ke maʻu ai ʻa e sākalamēnití, te ke lava ʻo manatuʻi ʻa Sīsū mo e founga te Ne lava ai ʻo tokoniʻi koe ke ke fakatomalá.”

Naʻe ‘ohovale ʻa ʻĀlekisanitulei. “ʻA ia te u lava pē ʻo ongoʻi maʻa hangē ko e taimi naʻá ku papitaiso aí?”

Naʻe talaange ʻe Teti, “ʻAupito. ʻOku ʻafioʻi ʻe he Tamai Hēvaní ʻoku ʻikai ke ke haohaoa, pea kuo pau ke ke fai ha ngaahi fili hala ʻi he taimi ʻe niʻihi. Ka ʻi he taimi ʻokú ke faiangahala aí, te ke lava ʻo fakatomala mo kei feinga pē ke muimui ʻia Sīsū. Ko ha meʻa nai ia te ke lava ʻo fakahoko?”

Naʻe malimali ʻa ʻĀlekisanitulei. “ʻIo! ʻOku ou tui te u lavaʻi ia.”

ʻI he aʻu ki he ʻaho fāʻeleʻi ʻo ʻĀlekisanituleí, naʻe maʻu ʻe hono fāmilí ʻa e kiʻi meʻakai maʻamaʻa ʻi hono faiʻahó ʻi he tuku ʻa e akó. Naʻe ifo ia! Pea ʻi hono papitaisó, naʻe ongoʻi fiefia lahi ʻaupito ʻa ʻĀlekisanitulei ʻi hono lotó ʻi heʻene tuʻu hake mei he vaí. Kuó ne palōmesi ke muimui ʻia Sīsū Kalaisi, pea ko ha ongo fakalata ia!

ʻI he uike ko iá naʻe fai ʻe ʻĀlekisanitulei hono lelei tahá ke tauhi ʻene ngaahi fuakava foʻoú mo angalelei ki hono kiʻi tehiná. Ka ʻi he aʻu ki he Sāpate hokó, naʻá ne kiʻi loto-mamahi. Naʻá ne ongoʻi naʻá ne mei lava pē ʻo fai ha ngaahi fili lelei ange ʻi he uike ko iá.

ʻI hono tufa mai ʻo e sākalamēnití, naʻe kūnima ʻa ʻĀlekisanitulei mo punou hono ʻulú. Naʻá ne kole fakalongolongo ki he Tamai Hēvaní ke tokoniʻi ia ke ne toe lelei ange ʻi he uike kahaʻú. Naʻá ne fakakaukau ki he lahi ʻo e ʻofa ʻa Sīsū ʻiate iá mo e founga naʻá ne fiemaʻu ai ke tatau ange mo Iá.

ʻI hono toʻo ʻe ʻĀlekisanitulei ha konga mā Falanisē mei he laulau sākalamēnití, naʻá ne ongoʻi māfana mo nonga ʻi hono lotó. Naʻá ne maʻu ʻa e ongo tatau mo ia naʻá ne maʻu ʻi hono ʻaho papitaisó! Naʻe hili atu ʻe Teti hono nimá ki he uma ʻo ʻĀlekisanituleí ʻo ne malimali kiate ia.

Ko e kamata ʻeni ʻo ha uike foʻou, pea ʻe fai ʻe ʻĀlekisanitulei hono lelei tahá—ʻi he tokoni ʻa e Tamai Hēvaní.

Tā Fakatātā ʻe Toby Newsome