Naglakbay si Jane Manning Papunta sa Nauvoo

Sa lugar kung saan nakatira noon si Jane Manning, may mga taong hindi maganda ang pakikitungo sa kanya dahil sa kulay ng kanyang balat. Isang araw, narinig niya ang pagtuturo ng isang missionary. Kalaunan, nabinyagan siya.

Bininyagan din ang pamilya ni Jane. Nais nilang lahat na makasama ang mga Banal sa Nauvoo. Kaya nagsimula silang maglakbay.

Nais ng pamilya ni Jane na maglakbay sakay ng bangka bilang bahagi ng paglalakbay, pero wala silang sapat na pera. Kaya kinailangan nilang maglakad ng 800 milya (1,300 km).

Kinailangan nilang tumawid sa isang malalim na batis at matulog sa labas kahit maginaw. Pero determinado silang makarating sa Nauvoo. Pinasaya nila ang kanilang sarili sa pamamagitan ng pagkanta habang naglalakad.

Patuloy na naglakad si Jane at ang kanyang pamilya hanggang sa mapudpod ang kanilang mga sapatos at sumakit ang kanilang mga paa. Pero nang manalangin sila sa Diyos para humingi ng tulong, pinagaling Niya ang kanilang mga paa.

Tinulungan nila ang mga taong nakilala nila sa kanilang paglalakbay. Tumulong din sila sa pagpapagaling ng isang batang may sakit dahil sa kanilang pananampalataya.

Sa wakas, nakarating din si Jane at ang kanyang pamilya sa Nauvoo! Nang marinig ni Joseph ang lahat ng pinagdaanan nila, sinabi niya kay Jane, “Pagpalain ka ng Diyos. Kayo ay nasa piling ngayon ng inyong mga kaibigan.”