“Hiva ʻa Saniteí,” Ko e Kaumeʻá, Fēpueli 2025, 4–5.
Laukonga Faingofua
Hiva ʻa Saniteí
Naʻe maʻu ʻe Sanitei ha fakakaukau! “Te ke fie haʻu ki hoku papitaisó?”
Ko ha talanoa moʻoni mei he ʻOtu Filipainí.
Naʻe vaʻinga ʻa Sanitei mo hono kaungāmeʻa ko ʻEimí ʻi he ʻahó kakato. Naʻá na akoako ʻa e tākisí ʻi tuʻa peá na vaʻinga mo ha fanga kiʻi monumanu tamapua. Naʻe fakalata, ka naʻe fiemaʻu ke foki ʻa Sanitei ki ʻapi.
Naʻe ʻeke ange ʻe ʻEimi, “Te ke toe fie vaʻinga ʻapongipongi?”
Naʻe ʻikai ʻilo ʻe Sanitei ko e hā ʻa e meʻa ke lea ʻakí. ʻOku ʻamanaki ke fai hono papitaisó ʻapongipongi! Naʻe ʻikai ke kau ʻa ʻEimi ki he Siasí. ʻE talaange fēfē nai ʻe Sanitei fekauʻaki mo hono papitaisó?
Ka ko ʻEimí ko e kaungāmeʻa ia ʻo Sanitei. Mahalo pē ʻe sai pē.
Naʻe talaange ʻe Sanitei, “He ʻikai ke u lava ʻo vaʻinga ʻapongipongi koeʻuhí ʻe papitaiso au ai.”
Naʻe fehuʻi ange ʻe ʻEimi, “ʻOku ʻuhinga nai ia ki he hā?”
Naʻe talaange ʻe Sanitei, “Ko ha meʻa ia ʻoku mau fakahoko ʻi homau siasí. Naʻe papitaiso ʻa Sīsū Kalaisi, pea ʻoku ou loto ke u papitaiso kae lava ke u muimui kiate Ia.”
Fakafokifā kuó ne maʻu ha foʻi fakakaukau! “Te ke fie haʻu? ʻOku ou hiva foki.”
Naʻe malimali ʻa ʻEimi. “ʻIo, te u fie ʻalu atu!”
ʻI he ʻaho hono hokó, naʻe siofi ʻe Sanitei ʻa e haʻu ʻa e kakaí ki hono papitaisó. Pea naʻá ne sio atu leva kia ʻEimi! Naʻe taʻataʻalo ange ʻa ʻEimi kiate ia. Naʻe malimali ʻa Sanitei peá ne taʻataʻalo atu.
ʻIkai fuoloa kuo taimi ke nau kamata. Naʻe fai ʻe Mami ha kiʻi lea nounou. Naʻá ne pehē ko e taimi ʻe papitaiso ai ʻa Saniteí, te ne palōmesi ke muimui kia Sīsū Kalaisi mo tauhi ʻa e ngaahi fekaú. Pea ʻe hilifakinima leva ia. Ko hono ʻuhingá, ʻe tāpuakiʻi ia ʻaki ʻa e meʻafoaki ʻo e Laumālie Māʻoniʻoní.
Naʻe talaange ʻe Mami, “Te tau lava kotoa ʻo ongoʻi ʻa e Laumālie Māʻoniʻoní. Ka ʻi he taimi ʻoku hilifakinima ai kitautolú, ʻe lava ke ʻiate kitautolu maʻu pē ʻa e Laumālie Māʻoniʻoní.”
Naʻe hokosia leva ʻa e taimi ke hiva ai ʻa Saniteí. Naʻá ne lue ki muʻa ʻi he lokí ʻo mihiʻi ʻene mānavá. Pea kamata leva ke ne hivaʻi ʻa e “ʻI heʻeku Papitaisó.”
Ke maʻa ʻeku moʻuí hangē ko e māmaní
Ke u feʻunga ke toe nofo mo e ʻOtuá
ʻI heʻene ʻosí, naʻe ongoʻi fiefia lahi ʻa Sanitei. Naʻá ne ʻiloʻi ko e ongo ko ʻení, ko e Laumālie Māʻoniʻoní ia. Naʻá ne sio kia ʻEimi ʻoku malimali mo loʻimataʻia.
Naʻá ne fakakaukau, ʻOku ou tui ʻoku ongoʻi foki ʻe ʻEimi ʻa e Laumālie Māʻoniʻoní.
Hili ʻa e papitaiso mo hilifakinima ʻo Saniteí, naʻá ne fetaulaki mo ʻEimi.
Naʻe talaange ʻe ʻEimi, “Fakamālō atu ʻi hono fakaafeʻi aú. Naʻá ku ongoʻi fiefia ʻaupito. ʻOku ou fiefia maʻau.”
Naʻe malimali ange ʻa Sanitei. Naʻá ne talaange, “Fakamālō atu ʻi hoʻo hoko ko hoku kaungāmeʻá.” Naʻá ne fiefia ʻi heʻene maʻu ʻi he taimí ni ha kaungāmeʻa lelei ʻe toko ua—ʻEimi pea mo e Laumālie Māʻoniʻoní.
Ngaahi tā fakatātā ʻa Nathaniel Eckstrom