“Kuo ʻOsi Hoko ko ha Faifekau,” Ko e Kaumeʻá, Fēpueli 2025, 44–45.
Kuo ʻOsi Hoko ko ha Faifekau
Ko ha talanoa moʻoni mei he USA.
Naʻe tokoni ʻa Tati kia Mami ke fokotuʻutuʻu ʻa e tēpilé ki he maʻu meʻatokoni efiafí. Naʻe ʻeke ange ʻe Tati, “ʻE lava nai ke u tui hoku vala lotú ʻapō? Koeʻuhi ʻoku haʻu ʻa e ongo faifekaú ki he maʻu meʻatokoni efiafí?”
Naʻe malimali pē ʻa Mami. “ʻOku ou pehē ko e fakakaukau lelei ‘aupito ia.”
Kimuʻa ʻi he maʻu meʻatokoni efiafí, naʻe ʻalu ʻa Tati ki ʻolunga ke tui hono sote hiná mo e hēkesí.
Naʻe fehuʻi ange ʻe hono tuofefine lahi ko Minitií, “Ko e hā ʻa e ʻuhinga ʻokú ke tui hēkesi ai ʻi he ʻaho ní? ʻOku ʻikai ko ha ʻaho Sāpate ʻeni.”
Naʻá ne talaange, “ʻOku haʻu ʻa e ongo faifekaú. ʻOku ou fie hoko ʻo hangē ko kinauá!”
Naʻe tatangi ʻa e fafangu ʻo e matapaá, pea naʻe lele hifo ʻa Tati mo Minitī ki lalo. Naʻá na sio ki he hū mai ki loto ha ongo faifekau ʻe toko ua ʻokú na sote hina. Naʻá na tangutu ki lalo, tāpuakiʻi ʻa e meʻatokoní, pea kamata ke kai. Naʻe tokanga ʻa Tati ke ʻoua naʻá ne huaʻi ʻa e sipēketí ʻi hono sote hina maʻá.
Naʻe talaange ʻe ʻEletā Kauli, “ʻOku ou saiʻia ʻi ho hēkesí. ʻOkú ke hangē tofu pē ha faifekaú.”
Naʻe malimali ʻa Tati. “Te u ʻalu ʻo ngāue fakafaifekau ʻi heʻeku fuʻu lahí.”
Naʻe talaange ʻe ʻEletā Uekifila, “Ko ha taumuʻa lelei ia! Te ke lava foki ʻo kamata hoko ko ha faifekau ʻi he taimí ni.”
Naʻe tangutu hangatonu hake ʻa Tati ʻi hono seá. “ʻO fēfē?”
“Te ke lava ʻo hoko ko ha faʻifaʻitakiʻanga lelei ki he niʻihi kehé. Te ke lava ʻo ngāue tokoni ki ho fāmilí. Pea te ke lava ʻo hoko ko ha kaungāmeʻa lelei.”
Naʻe fakakaukau ʻa Tati ki ai. “Te u lava ʻo fakahoko ia.”
ʻI he ʻaho hono hokó, naʻe feinga mālohi ange ʻa Tati ke angalelei kia Minitī. Naʻá ne tokoni kia Mami ʻi he ngaahi ngāue fakaʻapí. Naʻá ne vahevahe ʻene ʻū meʻa vaʻingá ʻi he taimi naʻe haʻu ai hano kaungāmeʻa ke vaʻingá.
‘I he fakaʻosinga ‘o e ʻahó, naʻe fāʻofua ʻa Mami kiate ia. “Te ke hoko ko ha faifekau lelei ʻi ha ʻaho.”
Naʻe malimali ʻa Tati. “Kuó u ʻosi hoko au ko ha faifekau!”
ʻŪ tā fakatātā ʻa Melissa Manwill Kashiwagi