“Ko e Lue ki he Lotú,” Ko e Kaumeʻá, Fēpueli 2025, 16–18.
Ko e Lue ki he Lotú
Naʻe saiʻia ʻa Kupa ʻi he ʻaho Sāpaté.
Ko ha talanoa moʻoni mei Simipāpuē.
Naʻe fanafana ange ʻa Kupa, “Mama, ʻā hake.”
Naʻe mamao ʻa Mama. “ʻOku teʻeki hopo ʻa e laʻaá. He ʻikai lava ke ke toe kiʻi mohe lōloa ange?”
Naʻe pehē ange ʻe Kupa, “ʻOku ou fuʻu loto-vēkeveke. Ko e ʻaho Sāpate ʻeni, pea te tau lava ʻo ʻalu ki he lotú!”
Naʻe pehē ange ʻe Mama, “Sai. Ke mālohi koe. Ka te u fiemaʻu hoʻo tokoní ke teuteuʻi ho ongo tehiná.”
Naʻe saiʻia ʻa Kupa ke tokoni kia Mama. Naʻe kamata ʻaki ʻene haka ʻa e konimilá ke ngaohi ha satisā (sadza) maʻa hono ongo tehina ko ʻAkanesi mo Silá. Hili ʻenau kaí, naʻe tokoni ʻa Kupa ki hono fakamaaú.
Naʻe tui ʻe Kupa hono kofu manakó peá ne fili ʻa e vala maʻa hono ongo tehiná. Naʻa nau makiʻikiʻi ʻi heʻene tokoni ke na teuteú. Naʻá ne fuʻu fiefia ʻaupito!
Naʻe talaange ʻe Mama, “Ko ha tokotaha tokoni lelei koe Kupa.”
Naʻe pehē ange ʻe Kupa, “Mālō!”
ʻI heʻenau kamata hū ki tuʻa ʻi he matapaá, naʻe haʻi ʻe Mama ʻa Sila ki hono tuʻá ʻaki ha tupenu. Naʻá ne talaange kia Kupa mo ʻAkanesi, “ʻOku ou fiefia ʻaupito ʻi hoʻomo lalahi feʻunga ke mo lué.”
Naʻe puke ʻe Mama ʻa e nima ʻo Kupá, pea kamata ke nau lue ʻi he hala kelekelé. Naʻe lava ʻa Kupa ʻo sio mei he mamaʻó ki he temipale naʻe lolotonga langa ʻi Halalé. Naʻe pehē ʻe Kupa, “ʻOku ou saiʻia ʻi he sio ki he temipalé.”
Naʻe talaange ʻe Mama, “Tatau pē mo au. ʻOku tau monūʻia ke nofo ʻi ha feituʻu ʻoku lava ke tau mamata ai ki hono langá.”
Naʻa nau hū loto atu ʻi ha loto ngoue koane. ʻI he taimi ʻe niʻihi, naʻa nau tuʻu ʻo mālōlō mo tuku hifo ʻa Sila ke ngaungaue mo faofao. Naʻa nau talanoa, hiva ha ngaahi hiva, mo fanongo ki he fanga manupuná. Hili ʻenau luelue ʻi ha houa ʻe taha mo e kongá, naʻe fiefia ʻaupito ʻa Kupa ke sio ki he ʻapisiasí.
Naʻe lau ʻe Kupa ʻa e fakaʻilongá: “Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Naʻe talaange ʻe Mama, “Kuo tau aʻu mai.” Naʻá ne vete ʻa e tupenu naʻe haʻi ʻaki ʻa Silá.
Naʻe lea fiefia ange ʻa Kupa, “Pea ʻoku tau toe vave mai!”
Naʻe ʻikai fuoloa kuo talitali fiefia ʻe Kupa mo Mama ʻa e niʻihi kehé ʻi heʻenau hū mai ki he falé. Naʻe saiʻia ʻa Kupa ke feohi mo e kakai ʻi he lotú. Naʻá ne ongoʻi naʻe ʻofeina ia ai.
Naʻe maʻu ʻe Kupa mo hono fāmilí ha feituʻu ke nau tangutu ai. Naʻe ongo lelei ʻa e mālōlō hono ongo vaʻé. ʻI he taimi naʻá ne maʻu ai ʻa e sākalamēnití, naʻá ne fakakaukau kia Sīsū Kalaisi. Hili iá naʻá ne fakafanongo fakalelei ʻi hono fakamatalaʻi ange ʻe he pīsopé ko e Sāpate ʻaukaí ia pea naʻá ne fakaafeʻi ʻa e kakaí ke vahevahe ʻenau fakamoʻoní.
Naʻe mamata mo fakafanongo ʻa Kupa ki he haʻu ʻa e niʻihi kehé ki muʻa ʻi he falelotú ke vahevahe ʻa e meʻa naʻa nau tui ki aí. Naʻá ne fiemaʻu ke nau ʻiloʻi kotoa naʻe ʻi ai foki mo ʻene fakamoʻoni. Naʻe lue ʻa Kupa ki muʻa ʻi he lokí. Naʻá ne kiʻi ongoʻi manavasiʻi, ka naʻá ne ʻiloʻi ʻa e meʻa naʻá ne fie lea ʻakí.
Naʻá ne mihiʻi lahi ʻene mānavá, tuʻu hangatonu, mo pehē ange, “ʻOku ou saiʻia ke sio ki he temipalé. ʻOku ou ʻilo ko ha feituʻu makehe ia ke ako ai ki he palani ʻa e Tamai Hēvaní. Ko ʻetau moʻuí ko ha meʻaʻofa mahuʻinga ia meiate Ia. ʻOku ou ʻiloʻi ʻoku moʻoni ʻa e ngaahi folofolá. ʻOku ou ʻilo ʻoku ʻofa ʻa e Tamai Hēvaní mo Sīsū ʻiate au. ʻOku ou feinga ke angaʻofa mo tokoni ʻo hangē ko Sīsuú. ʻOku ou ʻilo ʻoku moʻoni ʻa e Siasí. ʻI he huafa ʻo Sīsū Kalaisí, ʻēmeni.”
Naʻe sio atu ʻa Kupa ki he kakai ʻi he lokí. Naʻa nau malimali mai kiate ia. Naʻe mamali ʻa Kupa peá ne foki atu ki hono seá. Naʻe fāʻofua ki ai ʻa Mama ʻi heʻene tangutu ki laló. Naʻe fiefia ʻa Kupa ʻi heʻene maʻu ʻa e loto-toʻa ke vahevahe ʻene fakamoʻoní. Naʻe saiʻia ʻa Kupa ʻi he ʻaho Sāpaté.
Ngaahi tā fakatātā ʻa Fotini Tikkou