Ko ha Fepōtalanoaʻaki mo Lili fekauʻaki mo Hono Vahevahe ʻo e Ongoongoleleí

ʻOku ou manako ke hiva maʻu pē, pea ʻoku ou saiʻia foki ʻi he hulohulá. Ko e taimi ʻoku ʻikai ke u hiva mo hulohula aí, ʻoku ou saiʻia ke u ʻi tuʻa ʻi natula mo hoku ngaahi kaungāmeʻá. ʻOku ou saiʻia foki ke u laukonga.

ʻI he kolo ʻoku ou nofo aí, ʻoku ʻikai ha ʻiuniti ʻa e Siasí ai, ʻoku mau fononga miniti ʻe 30–40 ki he ngaahi fakataha ʻi he Sāpaté mo e ngaahi ʻekitivitī lolotonga ʻo e uiké. Ko ha kiʻi fakaʻuli lōloa, ka ʻoku ʻikai ke u tokanga au ki ai. Ko ha taimi lelei ia ke fanongo ai ki he mūsiká mo fakaʻitaʻi hoku ngaahi tokouá mo e tuongaʻané, haha.

Ko au toko taha pē foki ʻa e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi hoku ʻapiakó. ʻOku ou ako ʻi ha ʻapiako faka-Kalisitiane pea mo feohi fakakaungāmeʻa lelei mo hoku ngaahi kaungāakó. ʻOku poupouʻi au ʻe heʻeku kau faiakó mo e ngaahi kaungāmeʻá kotoa ʻi heʻeku tui fakalotú, pea te u lava ʻo loto-toʻa ke moʻui ʻaki mo vahevahe ʻeku tui fakalotú.

ʻI ha ʻaho ʻe taha ʻi he akó, naʻá ku tangutu ʻi ha sea ʻo lau ʻa e Tohi ʻa Molomoná. Naʻe fehuʻi mai ʻe ha taha ʻo hoku kaungāakó fekauʻaki mo e tohí. Naʻá ku talanoa ki ai mo ia peá u vahevahe ange ʻeku ngaahi ongo fekauʻaki mo e ʻuhinga ʻoku ou saiʻia ai ke lau iá. Naʻá ku toe fakaʻaongaʻi foki ʻa e faingamālie ko iá ke vahevahe ai ʻeku fakamoʻoni fekauʻaki mo Sīsū Kalaisí.

Tokanga taha ki hono ongoʻi ʻa e Laumālie Māʻoniʻoní. Feinga ke ongoʻi ia. Te ke ʻiloʻi ʻi he momeniti ko ia ʻokú ke fiemaʻu ai ke ke leá.