Ngaahi ʻEkitivitī ʻo e Haʻu, ʻo Muimui ʻIate Aú

Te tau lava ʻo muimui kia Sīsū Kalaisi ʻaki hotau lotó kotoa (vakai, Tokāteline mo e Ngaahi Fuakava 4:2). Kosi ʻo toʻo ha ngaahi foʻi haati pepa iiki ʻe 10. Tohi ʻi he foʻi haati takitaha ha founga ʻe taha te ke lava ai ʻo muimui ki he Fakamoʻuí. Hili femahiliaki ʻa e ngaahi foʻi hātí ʻi ha siakale pea kuluuʻi maʻu ʻi hono tuʻuʻangá ke hoko ko ha pale teuteu.

ʻE lava ke ʻomi ʻe he ʻOtuá kiate kitautolu ʻa e ngaahi tali ki heʻetau ngaahi fehuʻí ʻo fakafou ʻi he Laumālie Māʻoniʻoní (vakai, Tokāteline mo e Ngaahi Fuakava 6:23). Ko e taimi ʻe niʻihi ʻoku fiemaʻu ke tau tokanga ʻaupito kae lava ke mahino ʻa e pōpoakí. ʻOmi ha kasa pea tamateʻi ʻa e ʻuhila ʻi he lokí. ʻE fakaʻaongaʻi ʻe ha tokotaha ʻa e kasá ke tā ʻaki ha fakatātā pe mataʻitohi ʻi he holisí. ʻE feinga ʻa e toengá ke nau mateʻi pe ko e hā ia. ʻOku faitatau fēfē nai ʻa e kasá mo e Laumālie Māʻoniʻoní?

ʻOku akoʻi mai ʻe he folofolá ʻoku totonu ke tau lotu maʻu pē ki he Tamai Hēvaní (vakai, Tokāteline mo e Ngaahi Fuakava 10:5). Fakaʻaongaʻi ha vali pe peni fakaʻilonga ke teuteuʻi ha foʻi maka hamolemole ʻaki ha ngaahi foʻi lea pe fakatātā ʻokú ne fakamanatu [ʻa e Tamai Hēvaní] kiate koe. Ko ʻene mōmoa pē ʻa e maká, tuku ia ʻi ho veʻe mohengá ke fakamanatu atu ke ke lotu ʻi he pongipongi mo e pō kotoa pē.

ʻOku pehē ʻe he folofolá ʻoku totonu ke tau tokoni ke “ʻomai ʻa e ngaahi laumālie [kia Kalaisi]” (Tokāteline mo e Ngaahi Fuakava 16:6). ʻOku ʻuhinga ia ke tokoniʻi ʻa e niʻihi kehé ke nau ako fekauʻaki mo e Tamai Hēvaní mo ʻEne palani maʻatautolú. Kosi ʻa e ʻū kaatí mei ha laʻipepa pea hiki ai ha potufolofola. ʻOange ha kaati ki ha faiako, kaungāmeʻa, pe mēmipa ʻo e fāmilí ke vahevahe ʻa e ongoongoleleí mo kinautolu.