Ko ʻEku Ngaahi Lea ʻi he Ongoongoleleí

Ko e lakanga fakataulaʻeikí ko e mafai mo e mālohi ia ʻo e ʻOtuá ʻokú Ne foaki mai ke tokoniʻi kitautolu ke tau fakahoko ʻaki ʻEne ngāué ʻi he māmaní.

Ko e fuakavá ko ha palōmesi ia ʻoku tau fai mo e Tamai Hēvaní ke talangofua ki Heʻene ngaahi fekaú. ʻI heʻetau fakahoko mo tauhi ʻa e ngaahi fuakavá, ʻoku tāpuekina kitautolu ʻe he Tamai Hēvaní.

Ko e taimi ʻoku papitaiso ai koé, ʻokú ke fakahoko ha fuakava mo e ʻOtuá. ʻOkú ke palōmesi ʻokú ke loto fiemālie ke toʻo kiate koe ʻa e huafa ʻo Sīsū Kalaisí, tauhi ʻa e ngaahi fekau ʻa e ʻOtuá, pea tauhi maʻu pē kiate Ia. ʻOku fakahoko ʻe ha tokotaha maʻu lakanga fakataulaʻeiki ha lotu makehe, fakauku kakato koe ʻi he vaí, peá ne toe ʻohake koe ki ʻolunga. ʻOku fakafofongaʻi ʻe he meʻá ni ʻa hono siʻaki hoʻo ngaahi angahalá pea toe fanauʻi foʻou ko ha tokotaha muimui ʻo Sīsū Kalaisi.

Hili hono papitaiso koé, ʻoku hilifakinima koe ʻe ha tokotaha maʻu lakanga fakataulaʻeiki ke ke hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Te ke toe maʻu foki mo e meʻafoaki ʻo e Laumālie Māʻoniʻoní, ʻa ia ko hono ʻuhingá ʻe lava ke ʻiate koe maʻu ai pē ʻa e Laumālie Māʻoniʻoní.

Ko e Fakalelei ʻa Sīsū Kalaisí ko e feilaulau ia naʻá Ne fakahoko maʻatautolú. ʻI he Ngoue ko Ketisemaní, naʻá Ne mamahi koeʻuhi ko ʻetau ngaahi angahalá pea ongoʻi ʻetau mamahí kotoa. Naʻá Ne pekia ʻi he kolosí. Naʻá Ne toe tuʻu leva mei he maté. ʻOku tau lava kotoa ʻo fakatomala pea fakamolemoleʻi kitautolu mei heʻetau ngaahi angahalá koeʻuhí ko Sīsū Kalaisi.