Eja, Më Ndiq – Veprimtaritë

Të rivendosësh diçka do të thotë ta bashkosh sërish. Lexo dokumentin “Rivendosja e Plotësisë së Ungjillit të Jezu Krishtit: Një Proklamatë në Dyqindvjetor drejtuar Botës” te Gospel Library [Biblioteka e Ungjillit] për të mësuar më shumë rreth mënyrës se si u rivendos Kisha. Pastaj luaj një lojë për rivendosjen! Gjej ose vizato një figurë dhe prite në pjesëza si një figurëformuese. Shkëmbeji figurëformueset me një pjesëtar të familjes dhe rivendosni figurat e njëri-tjetrit. Pse ishte e rëndësishme që Jozef Smithi të rivendoste ungjillin e Jezu Krishtit?

Ati Qiellor na flet nëpërmjet profetëve të Tij (shihni te Doktrina e Besëlidhje 1:38). Thjesht na nevojitet të dëgjojmë! Ushtrojeni të dëgjuarit duke luajtur një lojë. Një person luan muzikë dhe të gjithë kërcejnë ndërsa muzika vazhdon. Kur muzika ndalon, të gjithë ngrijnë. Kushdo që ngrin i fundit tregon një arsye pse i do profetët. Luani derisa çdo person të ketë pasur radhën për të folur!

Ati Qiellor dhe Jezu Krishti iu shfaqën Jozef Smithit (shihni te Joseph Smith – Historia 1:15–20). Ne e quajmë këtë ngjarje Vegimi i Parë. Shko te faqja 13 për të bërë maketin tënd të Vegimit të Parë dhe më pas përdore atë për t’ia treguar dikujt tjetër historinë.

Kur mësojmë më shumë për paraardhësit tanë, ndihemi më afër tyre dhe Atit Qiellor (shihni te Doktrina e Besëlidhje 2). Kërkoji një pjesëtari të familjes të të tregojë një ndodhi nga jeta e vet ose nga jeta e njërit prej paraardhësve të tu. Më pas rikrijoje historinë si dramë ose vizatim!