Ngaahi Tokoni Fakafolofolá: Fuakava Motuʻá
Talateú
ʻOku fakataumuʻa ʻa e maʻuʻanga tokoni ko ʻení ke tokoni ke mahino lelei ange ki he kau akó ʻa e Fuakava Motuʻá. ʻOku fakataumuʻa ia ke tokoni ʻi he ako folofolá—kae ʻikai fetongi ia. ʻOkú ne ʻomi e ngaahi tokoni ko ʻení:
-
Fakamatala puipuituʻa. Ngaahi ‘ilo fakahisitōlia, fakafonua, mo fakasiokālafi ʻoku nau ʻomi ha puipuituʻa ki he ngaahi talanoá, ngaahi akonakí, mo e tokāteline ʻo e ngaahi folofolá.
-
Ngaahi fakamatala ʻo e lea fakafonuá. Fakamahinoʻi ha ngaahi fakalea faingataʻa, ngaahi lea fakakuongamuʻa, mo ha ngaahi liliu ʻoku fakapuputuʻu.
-
Tokoni ʻi he ngaahi potufolofola faingataʻa pe puputuʻú. Ngaahi folofola ʻo e Fakafoki Mai ʻo e Ongoongoleleí, ngaahi lea ʻa e kau palōfita mo e kau ʻaposetolo ʻo onopōní, ngaahi ʻilo falalaʻanga ke tokoni ʻo fakamahino e ʻuhinga ʻo e ngaahi potufolofola faingataʻá.
-
Ngaahi leá mo e ngaahi fakamatalá. Ko ha konga “Ako Lahi Ange” mo ha ngaahi pōpoaki mei he kau taki ʻo e Siasí pea mo ha ngaahi fakamatala naʻe faʻu ʻe he Siasí ʻoku fekauʻaki mo e ngaahi talanoa mo e ngaahi akonaki ʻoku ʻi he ngaahi folofolá.
-
Mītiá. Ngaahi ʻīmisi mo e ngaahi vitiō ʻe lava ʻo tokoni ki he kau laukongá ke nau sioloto mo mahino kiate kinautolu ʻa e feituʻú, ʻū fakatātaá, fakataipé, mo e ngaahi talanoa ʻo e folofolá.
Fakatokangaʻi ange: Ko hono fakaʻaongaʻi ha maʻuʻanga tokoni ʻoku ʻikai pulusi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku ʻikai ʻuhinga ia ʻoku poupouʻi ʻe he Siasí ia pe ko e taha naʻá ne faʻú pe te ne fakafofongaʻi ʻa e tuʻunga fakaʻofisiale ʻo e Siasí.
ʻI hoʻo feinga ko ia ke mahino lelei ange ʻa e Fuakava Motuʻá, manatuʻi ʻa e mahuʻinga ʻo hono ako ʻo e ngaahi meʻa ʻoku akoʻi ʻe he kau palōfita mo e kau ʻaposetolo moʻui ʻa e Fakamoʻuí. ʻI hoʻo akó, feinga ke ke ʻilo ʻa e founga ʻoku fakaʻuhingaʻi, fakamatalaʻi, mo fakaʻaongaʻi ai ʻe he kau tamaioʻeiki ʻa e ʻEikí ʻa e folofolá (vakai, “Ko Hono Fakaʻaongaʻi ʻo e Ngaahi Akonaki ʻa e Kau Taki ʻo e Siasí ke Mahino ʻa e Ngaahi Folofolá” ʻi he Ngaahi Taukei Ako Folofolá).
Kamata hoʻo ako ʻo e folofolá ʻaki ha lotu. Kolea e fakahinohino ʻa e Laumālie Māʻoniʻoní, ʻa ia ʻoku mātuʻaki mahuʻinga ʻi hoʻo fekumi ki he moʻoní. ʻI he hoko ʻa e Laumālie Māʻoniʻoní ko ha mēmipa ʻo e Toluʻi ʻOtuá, ʻokú Ne fakamoʻoniʻi ʻa e Tamaí mo e ʻAló, akoʻi ʻa e moʻoní, mo fakamāʻoniʻoniʻi kitautolu. ʻOku fakamanatu mai ʻe he Laumālié ha ngaahi meʻa, ʻomi ha fakafiemālie, fakafonu kitautolu ʻaki e ʻamanaki leleí, mo fakahā mai ʻa e founga ke fakaʻaongaʻi ai ʻa e meʻa ʻoku tau akó.