Chineke chọrọ ikwuuru gị okwu.

Mmụọ ahụ na-eduru gị rute nʻebe Nna nke Eluigwe na Jizọs Kraịst nọ. Nke a bụ ọrụ dị mkpa nke Mmụọ Nsọ nwere. Ọ ga-akpalitekwa gị ịchegharị ma soro Jizọs Kraịst ka ị nwee ike nata ngọzi niile nke Aja mgbaghara mmehie Ya. Dịka ị na-echegharị, Mmụọ ahụ ga-asacha gị ma nyere gị aka gbanwee.

Mmụọ Nsọ na-ekwuru uche gị na obi gị okwu. Ozi niile sitere na Mmụọ ahụ nwere ike ịbịa nʻuche gị nʻụzọ ndị dị iche iche—site na echiche ndị mmụọ kpalitere, ịdọ aka na ntị, nghọta doro anya, na mbunisi niile nke ime mmụọ. Mmuọ Nsọ ahụ pụrụ ikwuru obi gị okwu site na mmetụta ndị na-ebuli elu dịka nkasị obị, obisiike, udo, ịhụnaanya, ọn̄ụ, obi ekele, obi ekele, na ndidi.

“Nata Mmuọ Nsọ ahụ.” Okwu ndị a ka ekwuru mgbe a na-eme gị onye otù nke Nzukọ nsọ Kraịst. Kedụ otu isi anata Mmụọ Nsọ ahụ? Site nʻirube isi na nkuzi niile nke Jizọs Kraịst. Ọ bụ ume gị. Isoro Ya na-akpọbata Mmụọ Nsọ niime ndụ gị.

Chọọ Nna gị nke Eluigwe nʻekpere. Wụkwasa obi gị na Ya. Kelee Ya maka ọtụtụ ngọzi niile dị ịtụnaanya nke O nyeworo gị. Kọọrọ Ya ọn̄ụ gị niile, nchegbu gị niile na ajụjụ gị niile. Nọrọ jụụ ma gee ntị maka azịza Ya, nke nwere ike ịbịa dịka mmetụta udo, echiche niime uche gị, ma ọ bụ mkpali ime otu ihe.

Nụrụ olu nke Chineke niime akwụkwọ nsọ. Akwụkwọ nsọ niile bụ okwu Chineke nye gị! Siri na ha mụta ike kwa ụbọchị iji chọpụta olu Ya ma nwee mmetụta ịhụnaanya Ya. Dịka ị na-agụ, tụgharịa uche ihe O nwere ike na-akụziiri gị, ma detuo mkpali niile na-abịa nʻuche. Mee ya ka ọ bụrụ agwa gị ụbọchị niile ịmụ akwụkwọ nsọ—tụmadị Akwụkwọ nke Mọmọn—ogologo ndụ gị niile.

Tinye mmetụta ime mmuọ ahụ ị na anata nʻọrụ. Ọ bụrụ na ọ nwere otu echiche ma ọ bụ mmetụta ịme otu ihe dị ebere nke ga-agọzi mmadụ, mee ya! Ihe ọma niile na-abịa site na Chineke. Gosi Nna gị nke Eluigwe na O nwere ike ịtụkwasị obi na gị na ịga esoro mmetụta niile sitere nʻaka Ya.

Mmụọ Nsọ na-akasi obi ma na-edu gị. Ama Ya ama dịka Onye Nkasi obi. Ọ ga-akwado gị nʻoge niile nke mnwale. Ọ ga-enyere gị aka mata ihe ị ga-ekwu na ihe ị ga-eme. Site nʻike mmetụta Ya, i nwere ike ịkọta ndịiche dị nʻetiti ihe bụ eziokwu na nke bụ asị. Ọ pụrụ inyere gị aka chọta ezi ihe niime ndị ọzọ ma niime onwe gị. Mmụọ pụkwara ịdọ gị aka na ntị maka ihe egwu. Ọ ga-eduru gị rute nʻebe Jizọs Kraịst nọ ma pụọ site na mmehie.

Ị nwere ike ịnata onyinye niile nke ime mmụọ. Enwere ọtụtụ onyinye nke Chineke na-enye ụmụ Ya site na Mmụọ Ya. Ụfọdụ akpọrọ aha niime akwụkwọ nsọ gụnyere mkpughe, ịkwere na Jizọs Kraịst, nkuzi, nghọta, na amamiihe. Kpee ekpere ịjụ Nna nke Eluigwe ajụjụ banyere onyinye niile nke ime mmụọ O nyeworo gị, otu ị nwere ike iji wulite ha, ma otu Ọ chọro ka ijiri ha gọzie ndị ọzọ.