Parley at Thankful Pratt

May pananampalatayang sundin ang Espiritu

Sina Parley Pratt at Thankful Pratt ay mga magsasaka sa Ohio. Isang araw, nadama ni Parley na sinabihan siya ng Espiritu na umalis sa kanyang tahanan para turuan ang mga tao tungkol sa Biblia.

Mga Banal, 1:105

Sina Parley at Thankful na papaalis para magturo tungkol sa Biblia.

Ipinagbili nina Parley at Thankful ang kanilang sakahan. Hindi nila alam kung saan sila pupunta, pero nagtiwala sila na pagpapalain sila ng Diyos dahil sa paglilingkod nila sa Kanya.

Mga Banal, 1:105

Si Parley na bumaba mula sa barko sa New York.

Nagdala sina Parley at Thankful ng ilang damit at sapat na pera at sumakay ng barko. Habang naglalayag sila papuntang New York, sinabi ng Espiritu kay Parley na bumaba ng barko. Sinabi ni Parley kay Thankful na magpatuloy nang wala siya. Nangako siya na babalikan ito agad. Pakiramdam niya ay may isang bagay na gustong ipagawa sa kanya ang Diyos sa New York.

Mga Banal, 1:105–106

Nalaman ni Parley ang tungkol sa Aklat ni Mormon.

Malayo ang nilakad ni Parley. Sa wakas ay nakarating siya sa tahanan ng isang mangangaral. Sinabi ng mangangaral kay Parley ang tungkol sa isang kakaibang aklat na ibinigay sa kanya ng isang tao. Ito ay nagmula sa mga laminang ginto at matagal nang isinulat. Tinatawag itong Aklat ni Mormon. Isinalin ito ng isang lalaki sa New York gamit ang kapangyarihan ng Diyos.

Mga Banal, 1:106

Nagkaroon ng patotoo si Parley tungkol sa Aklat ni Mormon.

Sobrang interesado si Parley. Ipinakita ng mangangaral kay Parley ang aklat. Dahil sa tuwa, binuksan ito ni Parley at nagsimulang magbasa. Lumipas na ang ilang oras, pero hindi niya mapigilan ang pagbabasa, ni hindi man lang siya kumain o natulog. Sinabi sa kanya ng Espiritu ng Panginoon na totoo ito.

Mga Banal, 1:106

Pinag-uusapan nina Parley at Hyrum Smith ang Aklat ni Mormon.

Gustung-gusto ni Parley ang Aklat ni Mormon, nais niyang hanapin ang lalaking nagsalin nito. Naglakad siya papunta sa sakahan ng pamilya Smith, kung saan nakilala niya si Hyrum, ang kapatid ni Joseph. Nag-usap sila nang halos buong magdamag. Sinabi ni Hyrum kay Parley na totoo ang Aklat ni Mormon. Ibinigay niya kay Parley ang kanyang sariling kopya ng aklat.

Mga Banal, 1:106–107

Patuloy na binabasa ni Parley ang Aklat ni Mormon.

Habang patuloy siyang nagbabasa, nalaman ni Parley na dumalaw noon si Jesucristo sa mga tao sa Amerika. Nakita ni Parley na mas mahalaga ang Aklat ni Mormon kaysa sa lahat ng mga kayamanan ng mundo. Sabik na siyang balikan si Thankful at ibahagi sa kanya ang nalaman niya.

Mga Banal, 1:107; 3 Nephi 11:1–12

Ibinabahagi ni Parley ang Aklat ni Mormon kay Thankful at sa kanyang pamilya.

Ikinuwento ni Parley kay Thankful at sa iba pang mga miyembro ng kanyang pamilya ang tungkol sa Aklat ni Mormon. Sinabi niya sa kanila ang itinuturo nito tungkol kay Jesucristo. Nagpasalamat si Thankful na sinunod ni Parley ang Espiritu at natagpuan ang gawaing nais ng Diyos na gawin niya. Tulad ni Parley, nalaman ni Thankful para sa kanyang sarili na ang Aklat ni Mormon ay totoo.

Mga Banal, 1:112–13