Nakita ng mga Saksi ang mga Lamina ng Aklat ni Mormon

Patuloy na isinalin nina Joseph, Emma, at Oliver ang mga laminang ginto sa bahay ng mga Smith sa Pennsylvania. Pero gusto silang patigilin ng mga tao sa kanilang bayan. May kaibigan si Oliver na nagngangalang David Whitmer na nakatira sa New York. Tinanong ni Oliver si David kung maaari silang lumipat at makitira sa pamilya Whitmer para matapos ang pagsasalin.

Mga Banal, 1:78

Pumayag si David at ang kanyang pamilya. Tinanggap nila sina Joseph, Emma, at Oliver sa kanilang tahanan. Ngayon ay mapayapa na nilang magagawa ang pagsasalin. Maraming tao ang nakatira sa bahay ng mga Whitmer. Ibig sabihin maraming trabahong dapat gawin, lalo na para sa ina ni David, si Mary.

Mga Banal, 1:78–81

Isang araw, habang nagtatrabaho si Mary, dinalaw siya ng anghel na si Moroni. Sinabi niyang alam niya na ang dagdag na gawain ay nakakapagod kay Mary. Gusto niyang palakasin ang pananampalataya nito. Binuksan niya ang isang bag at kinuha ang mga laminang ginto. Binuklat niya ang mga pahina at ipinakita kay Mary ang nakasulat. Nangako siya kay Mary na ito ay pagpapalain.

Mga Banal, 1:80–81

May mga taong hindi naniniwala na totoo ang mga lamina. Sinunod ni Joseph ang utos ng Panginoon na huwag ipakita ang mga lamina sa sinuman. Sinabi ng Panginoon na ipapakita Niya sa tatlo pang saksi ang mga lamina. Tinanong nina David Whitmer, Martin Harris, at Oliver Cowdery kung maaari silang maging mga saksi. Pinahintulutan sila ng Panginoon.

Doktrina at mga Tipan 5:11–12; 17; Mga Banal, 1:83

Sina Joseph, Martin, Oliver at David ay nagpunta sa kakahuyan. Lumuhod sila at nagsalitan sa pagtatanong sa Diyos kung maaari nilang makita ang mga lamina, pero walang nangyari.

Mga Banal, 1:83

Nadama ni Martin Harris na siya ang dahilan kung bakit hindi sinasagot ang kanilang panalangin. Umalis si Martin, at patuloy na nagdasal ang iba.

Mga Banal, 1:83

Pagkatapos ay nagpakita ang isang anghel na balot ng maningning na liwanag. Ipinakita niya kina Oliver at David ang mga laminang ginto at ang nakasulat dito. Narinig nila ang tinig ng Diyos na nagsasabi na isinalin ni Joseph ang mga lamina sa pamamagitan ng kapangyarihan ng Diyos at tama ang pagsasalin. Sinabi rin ng Diyos na dapat nilang sabihin sa lahat ang kanilang nakita at narinig.

“Ang Patotoo ng Tatlong Saksi”; Mga Banal, 1:83–84

Hinanap ni Joseph si Martin. Siya ay nagdarasal pa rin. Nanalangin si Joseph kasama niya. Pagkatapos ay nagpakita ang anghel at ipinakita ang mga lamina kay Martin, tulad ng ginawa niya kina Oliver at David.

Mga Banal, 1:84

Kasunod nito, hinanap ni Joseph ang kanyang mga magulang, na bumibisita kay Mary Whitmer. Sinabi niya sa kanila kung gaano siya kasaya na nakita ng ibang tao ang mga lamina. Ngayon ay masasabi ng mga saksi sa mga tao na nagsasabi ng totoo si Joseph. Sinabi ni Martin sa lahat kung gaano siya kasaya na pinayagan siya ng Diyos na maging isa sa mga saksi.

Mga Banal, 1:84–85

Makalipas ang ilang araw, sinabi ng Panginoon kay Joseph na ipakita ang mga laminang ginto sa walo pang tao—ang kanyang ama, dalawa sa kanyang mga kapatid, apat sa mga kapatid ni David, at bayaw ni David. Nahawakan nila ang mga lamina at nabuklat ang mga pahina nito. Alam nilang totoo ang mga lamina.

“Ang Patotoo ng Walong Saksi”; Mga Banal, 1:85

Ang pagsasalin ng Aklat ni Mormon ay natapos na. Ibinalik ni Joseph ang mga laminang ginto sa anghel na si Moroni. Panahon na para maglimbag ng mga kopya ng aklat para mabasa ito ng lahat at malaman pa ang tungkol kay Jesucristo.

Mga Banal, 1:85–86

Malaki ang nagastos sa pagpapalimbag ng Aklat ni Mormon. Ibinigay ni Martin Harris ang bahagi ng kanyang sakahan upang bayaran ito. Ginawa niya ito dahil alam niyang totoo ang Aklat ni Mormon. Bawat kopya ng aklat ay may patotoo ni Martin at ng iba pang mga saksi upang mabasa ng lahat. Hindi kailanman itinanggi ng mga saksi ang kanilang patotoo.

Doktrina at mga Tipan 19:26–27, 34–35; Mga Banal, 1:86–88