E Aoga Moni Lava Tusitusiga Paia

I le maea ai o le polokalama faigaluega o se enisinia e faapipiiina masini, sa faafaigaluegaina a‘u i le Nofoaga o le Rockhampton Power i Kuiniselani, Ausetalia. O se nofoaga vevela ma palapala e faapipii ai afi koale, ae sa ou aoaoina ai le tele o mea i lenei galuega ma sa le na o le galuega.

Ona o a‘u o se “talutalufou” sa tuuina mai ai ia te a‘u ni galuega sili ona leaga. E tele lava o pa‘usisi pāū, tapunipuni ma o nisi taimi ou te tau talosagaina ai isi e pasi mai ia te a‘u meafaigaluega ou te moomia.

O le isi tamaloa, o le atalii o le pule, sa foliga e fiafia e faafaigata lo‘u olaga i le mea e gata ai. E tele ina tago faasusū a‘u i vai, ma o le isi taimi, a ou galue i luga o se ulu e tafu ai vaivevela i si tama‘i avanoa, sa ia tutuina se ieie suauua ma togi mai ia te a‘u. Ona o le fefe nei o‘u mu, sa ou faafetai ina ua mafai ona ou tapēina e aunoa ma so‘u manu‘a. Na matuai faateleina lo‘u inoino i lenei tamaloa—na avea o ia ma o‘u fili i la le tino.

Sa aoaoina a‘u e le aunoa e faapea, o tali i faafitauli uma lava e mafai ona maua i tusitusiga paia. Sa tonu ia te a‘u e faapea, o le tulaga o la‘u galuega o se faafitauli e moomia ai se vaifofo, o lea sa amata ai ona ou faitauina le Feagaiga Fou. Sa le tau tuli ina mamao la‘u faitau ae ou maua le Mataio e 5:43–44.

“Ua outou faalogo, na fai mai, Ia e alofa atu i le lua te tuaoi, a ia inoino i le ua ita mai ia te oe. “Ae ou te fai atu a‘u ia te outou, ia outou alolofa atu i e ua ita mai ia te outou, faamanuia i e ua fetuu mai ia te outou, ia agalelei atu i e ua inoino mai ia te outou, ma tatalo foi mo e ua tuuai fua mai ma faasaua mai ia te outou;

O lenei fuaitau na ou matua aafia tele ai. O le tamaloa i le galuega sa foliga moni lava o lo‘u fili, o le sa inoino ma faasauaina a‘u. Afai e moni le mau, o lona uiga ua moomia ona ou sui.

O lea la, o le aso na sosoo ai—ma mo le tele o masina na sosoo ai—sa ou vaavaai mo avanoa e avea ai ma se tagata muamua e fesoasoani i lenei tamaloa. Afai sa tauivi e sii se mea, ou te tamoe i ai ma fesoasoani ia te ia. Afai sa ia moomia se meafaigaluega, sa ou taumafai ia ou muamua e tuu atu ia te ia. O po uma sa ou tatalo ai ia faaleleia mea, ma ia aua nei tele so‘u sauaina. O le mea malie, a o amata ona tuuitiitia le aula‘iga o mea, sa lei uma ai.

I le mavae ai o masina e ono, sa ou tuua lena galuega ae ou alu i le kolisi i se isi taulaga ese. O lo‘u aafiaga lafulafuā i le nofoaga o le malosiaga, sa uunaia ai a‘u e tauivi mo se olaga e sili atu, o lea sa ou maua ai se sikolasipi e avea ai ma se faiaoga i se aoga maualuga ma sa matuai lelei le tulaga o a‘u suesuega.

I se tausaga muilimuli ane, sa ou toe foi ai i le nofoaga o le malosiaga e asiasi i “au paaga tuai” ma autilo ai le tamaloa lea sa faia lo‘u olaga faigaluega ia faigata, sa ou naunau e fia iloa po o le a sana mea o le a fai ia te a‘u i le taimi nei.

Sa i ai o ia i le faatausiusiuga o le falefaigaluega ina ua ou savali atu i totonu. O le taimi lava na ia iloa mai ai a‘u, sa ia tamo‘e agai mai ia te a‘u ma sa ou vave saunia loa a‘u lava mo se mea le manuia.

O le mea e ofo ai, sa aapa mai o ia e faatalofa ma fesili mai pe o a mai a‘u. Sa ia fai mai, ua ia misia lava a‘u ma sa fesilisili e uiga i la‘u aoga faafaiaoga. Sa leai se mea le manuia i le taimi lea, ae sa ou lagonaina se mafanafana ou te lei mauaina muamua mai ia te ia.

Ina ua ou tuua, sa ia faamanuia mai ia te a‘u ma valaaulia au ou te toe foi atu pe a mafai. O iina na ou iloaina ai e aoga moni lava tusitusiga paia. Na pau la tatou mea e fai o le sailia lea o le tali ma faaaoga le mataupu faavae o loo aumaia ai.

Mataupu Faavae ma Feagaiga 130:20–21 o loo aoao mai ai e faapea, o faamanuiaga uma e maua i le usiusitai i lena tulafono ua faavae ai i luga. E le faigofie ona alofa ia i latou e faasaua ia te oe, ae sa ou ola usiusitai i lena mataupu faavae o le Feagaiga Fou ma iu ai ina ou maua le filemu i lo‘u fili.