O Le Misiona Na Te Lei Faamoemoeina

Ia Oketopa 2025, sa malaga mai ai Elder Hinckley Tanumafili I‘aulualo mai Samoa i le Nofoaga Autu e Aoao Ai Faifeautalai (MTC) e sauniuni ai mo lana misiona i Ueligitone, Niu Sila. Peitai, ina ua mapeva lona tapuvae i taaloga, sa faaalia i le toto na sueina, e maua o ia i le ma‘isuka ituagia 2, lea e lei iloa i ana suega faafomai a o le‘i amataina lana misiona.

Sa fautuaina malosi e lona fomai ia nofo ai pea i le taulaga mo le siakiina o lona soifua maloloina o lea na suia ai le tofiga o Elder I‘aulualo. Nai lo le talai i Ueligitone, o le a nofo nei o ia i Aukilani ma avea o se faifeautalai mo auaunaga.

E le fou Niu Sila ia Hinckley. Sa fanau o ia iina, ma sa tausia ai e matua o lona tina i Aukilani Sisifo. O le 2016, ina ua maliliu uma ona matua matutua, na siitia ai ma nonofo faatasi ma ona matua i Savaii, Samoa.

O lona tama o le epikopo o le latou uarota i le taimi lea, ma sa fautuaina pea lava pea le autalavou ia faamisiona. “Sa na o le toatasi le talavou o le [matou uarota] sa i le misiona,”‘na toe taua ai e Elder I‘aulualo. “Sa ou taulai tele i le aoga i lena taimi.” Ina ua maua sana sikolasipi i le Iunivesite o Samoa, sa fautuaina o ia e lona tama e alu muamua i le misiona. “Sa ou fai atu ia te ia e mafai ona faatali le misiona ona e moomia ona faamuamua la‘u aoga.”

Sa maua se tipeloma o Hinckley i mea tau komepiuta, ma sa fausia ai se matata faamanuiaina, ma maua ai se tupe tele i ana galuega taitasi. Ae na ia aoao ai i lena taimi ua tofia lona tama e avea o se peresitene o le siteki, ma sa iai se mea na suia. “Sa ou matua lagona le faanoanoa i le le faia o le mea sa ia manao ai,” o lana tala lea. “O lea sa ou faamavae ai mai la‘u galuega ae tuu i totonu o‘u pepa mo se misiona.”

A o lei tuua e ia mo Niu Sila, sa iloa ai e Hinckley o lona tama—lea e toavalu nai ona tei—sa na o ia le tagata o lana tupulaga na faamisiona. O le a na o Hinckley nei o ona foi tei e toa 7 o le a faamisiona, ma na o ia foi le lona lua i le talafaasolopito o lona aiga.

Sa faamoemoe atoa Elder I‘aulualo a maea lona aoaoina o se faifeaualai, o le a alu loa i Ueligitone. Ao faafefefe o ia i le mafaufau e tuitui i faitotoa, o le faataitai i le MTC na fausia ai lona talitonuga mautu. “Ua amata ona ou toafilemu...o la ua masani...ae sa ou manatu faapea e tatau lava ona faia tonu, e sa‘o? Ia [talitonu mautinoa].” Sa naunau o ia e amata.

Peitai, ona mapeva ai lea o lona tapuvae, ma sa suia ai mea uma. Ua i ai nei o ia i se misiona mo auaunaga - lea sa itiiti sona iloa i ai—ma sa aufaatasi atu i se ‘au toaitiiti e na o le toa 12 faifeautalai mo auaunaga ia Aukilani atoa.

E ui ina sa tumau le toatele o faifeautalai mo auaunaga i o latou lava aiga, o le tulaga o Elder I‘aulualo na moomia ai o ia e siitia i le fale o le uso o lona tama i Aukilani, lea sa ia maua ai le tele o fesoasoani e alu ai e fai ona togafitiga faafomai ma le soifua manuia. Nai lo le galulue ai ma se soa, sa galue a na o ia, e faaaoga ai ona tomai faakomepiuta e faafou ai utuofaamatalaga o faalapotopotoga o pitonuu ia e ono moomia le fesoasoani a le Ekalesia.

O isi faifeautalai mo auaunaga na faataunuuina le manaoga eseese, e pei o le gaugauina o lavalava mo le Salvation Army, auina o meaafale mo aiga, pe tuuina atu auaunaga faaenisinia mo faaleoteleleo mo se gaoioiga a se aoga i le lotoifale. E faapei o faifeautalai uma, o faifeautalai mo auaunaga e fai a latou pine o igoa, e mulimuli i taiala mo faifeautalai, ma vaavaai mo avanoa e faasoa atu ai a latou molimau e uiga i le Tama Faalelagi ma Iesu Keriso.

I le taimi muamua, sa tauivi ai Elder I‘aulualo. O lona loto lava o Ueligitone. Sa aoaoina o ia mo se soa, mo faitotoa, ma mo lesona. “Sa ou manao e avea o se faifeautalai e aoao atu,” o lana tala lea.

E ala i le tatalo ma le manatunatu loloto, ua amata ai ona ia malamalama i le mafuaaga ua toesuia ai o ia e le Tama Faalelagi. O lona nofo ai ma le tuagane o lona tina, na faalolotoina ai noataga faaleaiga. Na to‘alelei le faaleleia o lona soifua maloloina—ma ona o lena, e mafai ai ona maua le avanoa e galue ai i Ueligitone. Ma sa ia olioli le leoa i le faaaogaina o ona tomai i le komepiuta i le galuega a le Alii.

E tele ina mafaufau Elder I‘aulualo i se mau o le Tusi Paia mai le Faaaliga: “Ua ou iloa au galuega; faauta ua ou tuuina atu i ou luma le faitotoa ua avanoa, e leai foi se na te mafaia ona punitia, aua ua ia te oe sina malosi itiiti, ma ua e fausia la‘u upu, ma ua e le faafitia lo‘u igoa” (Faaaliga 3:8). Mo ia, na avea lea fuaiupu o se taula. Na tatala e le Atua le faitotoa sa‘o i le taimi sa‘o—tusa lava pe le o le faitotoa lea na tatou faamoemoeina.

O lana fautuaga mo tagata uma o loo sauniuni e auauna atu, aua nei noatia oe e ou faamoemoega. “Ia tatala mo se mea e sili atu nai lo le mea e te faananau i ai.” Na ia ioeina e faapea, o le misiona na te lei faamoemoeina atonu o le misiona tonu lea na ia moomia.