O Le A le Taua ia i Tatou o Lo Tatou Lava Ola e Faavavau?

A o tatou faamanatuina le mea aupito sili na tupu i le talafaasolopito o le tagata i lenei Eseta, e liliu atu o tatou loto i lo tatou Faaola o Iesu Keriso. Tatou te manatuaina Lana Togiola e Le I‘u, Lona soifua atoatoa, o Lana misiona paia, ma Lona toetu mamalu. E faaalia lo tatou faafetai mo “tala lelei o le olioli tele” (Luka 2:10) na tautino mai e agelu i Lona soifua mai, ma mānu mai ai le taunuu mai o le Alo o le Atua, le Faaola o le lalolagi. O le taimi nei, e faaauau ai pea ona tatou olioli i talalelei o loo folafola mai e perofeta soifua, tagata vaai ma tali faaliga, o loo tapenaina i tatou mo le toefoi manumalo mai o Iesu Keriso, lo tatou Togiola.

Ua tatou ola i taimi faigata (2 Timoteo 3:1–13) e pei ona valoia e le Aposetolo anamua o Paulo. Na muai lapataia i tatou e uiga i mala i nei aso e gata ai, ae e le o tuua i tatou e aunoa ma se faamoemoe. O loo aoao mai e le talalelei toefuatai a Iesu Keriso i tatou i mea uma e tatau ona tatou iloa ma faia e saunia ai i tatou mo mea o loo faamalumalu mai. Mai le talalelei, ua tatou aoao ai e uiga i le Fuafuaga o le Fiafia a lo tatou Tama Faalelagi agalelei ma le alofa (2 Nifae 2), lea na folasia mai ia i tatou i le muai olaga. I lena fono sili, na tauaao mai ai e le Tama Lana fuafuaga, ma sa ofoina mai ai e Lona Alo Pele o Ia lava e faataunuuina. O le mea e faanoanoa ai, sa fouvale Lusifelo, ma sailia lona lava mamalu, ma sa tuliesea ai, ma ave ai se tasi vaetolu o o tatou uso ma tuafafine o e na filifili e mulimuli ia te ia (Mose 4:1-4). E maeu lo tatou faamanuiaina i lo tatou filifili e mulimuli ia Iesu Keriso, o le sa taliaina ma le lotomaualalo le finagalo o le Tama, ma faia le taulaga laualuga e togiola mo i tatou.

Sa taua tele i le Tama Faalelagi, ma o loo taua pea lo tatou faaolataga ma le faaeaga. Sa Ia auina mai Lona Alo Pele e Toatasi, “Aua ua faapea lava ona alofa mai o le Atua i le lalolagi, ua ia aumai mai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.” (Ioane 3:16) Sa taua, ma o loo taua pea ia Iesu Keriso lo tatou ola e faavavau. Sa afio mai o Ia i le lalolagi e fai le finagalo o le Tama, ma ofoina mai Lona soifua ina ia mafai ai ona tatou ola e faavavau. Afai ua matuai tuuto le Tama ma le Alo i lo tatou faaolataga, e tatau la ona tatou fesili ifo ia i tatou lava: O le a le taua ia i tatou lava o lo tatou lava ola e faavavau?

Sa faamamafa mai e le Faaola lava Ia le taua o le aveesea o soo se mea mai o tatou olaga, o loo faalavelaveina ai la tatou malaga agai atu i le ola e faavavau. Na Ia fetalai i le Mareko 9:43-47:

“Afai e faatausuaiina oe e lou lima, ina tutu ese ia; e lelei ona e sao i le ola a ua e lima mutu, ae leaga ona lima lua, ae alu i kena. . . . A faatausuaiina foi oe e lou vae, ina tutu ese ia; e lelei ina e sao i le ola ua pipili, ae leaga ona lua ni vae, ae lafoina i kena. . . . A faatausuaiina foi oe e lou mata, ina sali ese ia; e lelei ina e sao i le malo o le Atua ma le mata e tasi, ae leaga ona lafoina oe ma ou mata e lua i le afi o kena.”

Pe o tatou naunau e lafoai le agasala ma faalavefau faalelalolagi e mulimuli ai ia te Ia ma le loto atoa?

E fesoasoani le talalelei toefuatai tatou te aloese ai mai le faaseseina e manatu ma agaifanua a tagata: “Ma ona sau lea o le amioleaga e toatasi lena, ma aveese mai le fanauga a tagata le malamalama ma le upumoni, e ala i le le usiusitai, ma ona o le uputuu a o latou tama” (Mataupu Faavae ma Feagaiga 93:39). Na maliu Iesu Keriso mo i tatou ina ia mafai ai ona tatou ola e faavavau. Na ia muai alofa ia i tatou, (1 Ioane 4:19) ma o lea ua Ia talosagaina i tatou ia muai alolofa ia te Ia—nai lo oa o le lalolagi, galuega, fiafiaga, ma faalavefau. Ua Ia valaaulia i tatou ia “taofi mai ia [tatou] upu faatauvaa uma, . . . mai o [tatou] manao tuinanau uma, mai lo [tatou] faamaualuga uma ma manatu māmā uma” (Mataupu Faavae ma Feagaiga 88:121). O le faasamasamanoa i lo tatou tulaga faalesoo e tau atu ai i manu‘aga faaleagaga. Ua poloaiina i tatou ia alofa i le Alii ma lou loto atoa, agaga, ma le mafaufau atoa (Mataio 22:37).

Tatou te faaalia manino lo tato alolofa e ala i le tausia o Ana poloaiga, faamamalu a tatou feagaiga, ma taumamafa i le faamanatuga ina ia manatua ai pea o Ia. Tatou te manatuaina o Ia e ala i le tapuai atu ia te Ia i o tatou aiga, i le lotu, ma i le malumalu. Tatou te faaalia le tuuto e ala i le totogiina o sefuluai ma taulaga, tatalo ma anapogi, sueuse i tusitusiga paia, ma auauna atu i o tatou valaauga. Tatou te tausia le paia o le aso Sapati, auauna atu i isi, ma tausi i latou e moomia. Tatou te manatua o Ia e ala i le avea o lo tatou avea ma soo o sa tatou faamuamua aupito maualuga. Tatou te vaavaai atu ia te Ia i mafaufauga uma (Mataupu Faavae ma Feagaiga 6:36) ma savavali faatasi ma Ia (Mose 6:34) i laa taitasi uma, talitonu i Lana folafolaga o le a Ia taitai i tatou i le ala (*Mataupu Faavae ma Feagaiga 78:18) ma “o le a le tuua lava i [tatou], e le tuulafoaiina foi i [tatou]” (Eperu 13:5) ma e tatou te “tautalatala e uiga ia Keriso, tatou te olioli ia Keriso, tatou te talai atu Keriso, tatou te vavalo e uiga ia Keriso, tatou te tusitusi foi e uiga ia Keriso e tusa ma tatou valoaga, ina ia mafai ona iloa e a tatou fanau po o le a le puna e mafai ona tatou tepa taulai i ai mo se faamagaloga o a latou agasala” (2 Nifae 25:26)

O le Eseta lenei, tatou te olioli ai i le tuugamau avanoa, aua ua toetu o Ia! Ou te molimau atu o loo soifua Iesu Keriso. O Ia o lo tatou Faaola ma le Togiola, ma o le a toefoi mai o Ia i le lalolagi o le Tupu o tupu ma le Alii o alii. O loo i ai le mana i Lona suafa e faamalolo ai, e faamafanafana ai, ma aumaia ai le filemu, aua ua Ia fetalai, “Ou te tuuina atu ia te outou le manuia, o lo‘u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).

Ia tatou manatu mamafa i lo tatou olaga e faavavau—ia lava le mamafa e tumau ai e oo i le iuga, ia tatou taunuu i le faitotoa o le a faafetaiai ai i tatou e Le Paia e Toatasi o Isaraelu i upu, “Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou Alii” (Mosaea 25:23). O le malo ua ia outou ma o ona faamanuiaga ua ia outou, ma o ‘oa o le faavavau ua ia outou ia” (Mataupu Faavae ma Feagaiga 78:18).

Ua ou iloa e moni nei folafolaga, ma ua avanoa mo tagata uma o e manatu mamafa i lo latou olaga e faavavau. I le suafa paia o lo tatou Alii ma le Faaola, o Iesu Keriso, amene.