O Le A Se Mea e Faapitoa Tele ai le Eseta? Alofa

Ae ou te lei avea ma se soo o Iesu Keriso, sa ou mafaufau pe aisea na avea ai le Eseta ma se aso malolo tele i nisi o tagata.

Ae o lenei ua ou iloa o le Eseta o se faatusa o le alofa—o le alofa o Iesu Keriso mo le Tama Faalelagi ma mo i tatou taitoatasi.

O le Eseta e faaalia ai se sootaga loloto i le va o le Tama ma le Alo. A aunoa ma le vavega o le Togiola a Iesu Keriso ma le Toetu mulimuli ane, o le a leai se ala tatou te toe foi atu ai i lo tatou Tama Faalelagi. Sa alofa Iesu Keriso i le Tama ma i tatou taitoatasi i le tele o mea sa Ia onosaia “tiga ma puapuaga ma faaosoosoga o ituaiga eseese uma” (Alema 7:11) ina ia mafai ai ona tatou toe foi atu i le Tama Faalelagi.

O le savali tutotonu o le Eseta o le alofa. E manaomia ona tatou alolofa atu i isi i le ala e alolofa ai le Tama Faalelagi ma Iesu Keriso ia i tatou. Ua faamanatu mai e le Eseta ia i tatou ia iloa moni mea e manaomia e isi.

Alofa atili. Faamagalo atili. Auauna atu atili.

E pei ona faasoa mai e Elder Dieter F. Uchtdorf o le Korama a Aposetolo e Toasefululua: “Tatou te faapotopoto mai fanau uma a le Atua o e ua loto ina ia potopoto ma saili i le upumoni. E le o o tatou foliga vaaia faaletino, manatu faaupufai, aganuu, po o ituaiga e aumaia faatasia i tatou. … Ae o lo tatou faamoemoega tutusa, o lo tatou alolofa mo le Atua ma tuaoi, la tatou tautinoga ia Iesu Keriso ma Lana talalelei toefuataiina.”

E le silasila mai le Atua i o tatou tulaga faaagafesootai ae pe o ai i tatou o ni tagata taitoatasi. O le iloaina o lenei mea ma le lagonaina o Lona alofa e ala i lenei aso malolo matagofie ua mafai ai foi ona ou manao e faasoa atu i isi.

O lea la ua ou auauna atu o se peresitene o le korama a toeaina, ma ua ou maua se avanoa e tuuina atu ai lea lava alofa e tasi sa ou oo i ai i isi tagata o la’u uarota.

I le avea ai ma se uarota, ua matou matauina a laa ese tagata mai mataupu faavae o le talalelei, latou te feagai ma le tele o faaosoosoga leaga.

Ina ia faafetaiaia lenei mea, sa fatuina ai e lo matou epikopo ni asiasiga masani lea tatou te filifilia ai se aiga ma o atu i lo latou fale e aoao atu ma aoao faatasi. O nei asiasiga ua suia ai le tele o olaga aua e i ai se agaga o le olioli ma le fiafia. E mafai ona e iloa le tele o le fiafia o tagata e ala i le tilotilo i o latou mata. O se mea e viia moni lava, ma o loo matou galulue malosi i ai.

E tuputupu ae malosi lo’u faatuatua i aso taitasi. A o ou auauna atu i isi, aemaise lava i le taimi o nei asiasiga, ou te lagonaina i taimi uma le fesootai atu i le Faaola, o lē na laveaiina i tatou taitoatasi e ala i Lona naunau e faatino Lana Togiola. Pe a ou taumafai e taulima isi e pei ona Ia faia, e aoaoina au e i Laua ma le Tama Faalelagi ma faamalosia lo’u faatuatua.

O Iesu Keriso o lo’u faaolataga. Sa Ia tuuina mai ia te au le avanoa e avea ai ma se tagata ese. Sa alofa o Ia ia te a’u, ma sa Ia faaali mai Ia te a’u Lona alofa. O Iesu Keriso ma Lana vavega o le Eseta o faatusa o le alofa, migao, faaolataga, naunautai, ma le lotomaualalo.

O lo o soifua Iesu Keriso. E galue o Ia i o tatou olaga e ala i soo o e auauna atu o ni Ona aao agaalofa. Sa toetu o Ia ina ia mafai ona tatou toe foi atu e mau faatasi ma lo tatou Tama Faalelagi.

Opogi o Ia.

Opogi Lana vavega o le Eseta.

Opogi Lona alofa.

Ma faasoa atu lena alofa atoatoa ia i latou o siomia oe.