Faataitai le Alofa Sili Atu i Lenei Eseta ma Aso Uma

Saunia e J. Anette Dennis

Fesoasoani Muamua i le Au Peresitene Aoao o le Aualofa

O le soifuaga o Iesu Keriso ma le taulaga togiola na avea ma faatusa silisili o lo Laua alofa e le iu ma le Tama oi le Lagi mo i tatou taitoatasi.

“E le sili lava le alofa o se tasi i lenei alofa, ia tuuina atu e se tasi lona ola e sui ai ana uo” (Ioane 15:13). E leai se tasi na faaalia le alofa sili atu mo Ana “uo”—o afafine ma atalii o le Atua—nai lo lo tatou Faaola pele, o Iesu Keriso. E leai se isi faataitaiga sili atu i le lalolagi atoa o le alofa sili atu. Ma o lena alofa sili atu sa ia te Ia mo Lona Tama oi le Lagi ma mo i tatou taitoatasi na mafai ai e Ia ona onosaia puapuaga ma le oti e le mafaamatalaina ma faataunuu ai Lana Togiola e le iu. Sa Ia ofofua mai Lona soifua mo i tatou taitoatasi ma, i le faia o lena mea, na faaalia ai le alofa e le iu.

Ae sa le gata i Ketesemane ma Kalevaria lea na faaalia ai e lo tatou Faaola lena alofa sili atu. Na aoao mai Elder Tad R. Callister (1945–2025), o le sa auauna atu o se Fitugafulu Pulega Aoao ma o se Peresitene Aoao o le Aoga Sa: “O le alofa o le Faaola sa le na o se alofa mo na o e amiotonu; sa le o se alofa mautinoa; pe sa faaalia foi e se tasi o galuega maoae o le ositaulaga ma e leai se isi mea e sili atu. I se isi itu, sa o se alofa i lea aso ma lea aso, itula i lea itula, e oo lava i lea taimi ma lea taimi! O le alofa na faaloaloa mai le muai olaga i le faavavau. … O se alofa na faamanuiaina ai tamaiti laiti, faamalolo i e mama’i, ma ofoina atu le faamoemoe i e ua leai se faamoemoe. O se alofa sa aapa atu i tagata uma e pei ona sa i ai o ia ma siitia i latou i se tulaga maualuga atu. Sa faaalia le alofa i taimi mataalia uma, ma ala i lona olaga faaletino. Na tafe mai le alofa mai ona pu afu uma, mafaufauga uma, faatinoga uma. E pei lava ona masani ai ma e le aunoa a o tatou saili atu i le ea, sa ia saili e faamanuia. Sa faafia ona i ai i na taimi o le vaivai faaletino ma le fetaomi atu i ‘mataupu talanoaina’ sa i ai o ia iina mo le tasi—ia faalogo, ia alofa, ma faamanuia. O lona soifuaga atoa o se faateleina o faatinoga o le alofa, sa faatumuina i le mea aupito sili ona taua o mea uma—o lana taulaga togiola.”

O Le Faataitaiga Sili

O Iesu Keriso o lo tatou faataitaiga sili o le alofa sili. Sa Ia aoaoina i tatou e ala i Ana afioga ma galuega i le ala e mulimuli ai i Ana faataitaiga ma avea ai ma Ona soo moni.

“E pei ona Ou alofa atu ia te outou, Ia… fealofani foi outou.

“O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:34–35).

Ua tatou maua le avanoa i aso taitasi o o tatou olaga e mulimuli ai i le faataitaiga a le Faaola o le alofa sili atu i le ala tatou te fegalegaleai ai ma taulimaina i latou o siomia i tatou, e aofia ai i latou atonu e agaleaga mai ia i tatou. A o tatou tauaveina Lona suafa i o tatou luga ma mulimuli i Lana faataitaiga o le taulimaina o isi ma le alofa sili atu, o le a tatou lagonaina Lona alofa sili atu mo i tatou, lea o le a siitia ai i tatou ma suia i tatou ina ia iu ina avea e faapei o Ia.

Loto faafetai mo le Faaola

Tau ina ia tatou faamanatuina le Eseta i Aso Sa taitasi a o tatou manatua lo tatou Faaola ma le Togiola pele—o Lona soifuaga ma Lana taulaga togiola mo i tatou—e ala i le saunia mo, ma le aai ma feinu i faatusa o lena taulaga e ala i le sauniga o le faamanatuga. Tau ina ia tatou faaali atu ia te Ia lo tatou lotofaafetai tele mo Lana taulaga alofa mo i tatou e ala i le mulimuli i Lana faataitaiga o le alofa ma le auauna atu i isi, e tusa lava po o le a le le talafeagai. Ma e pei lava ona sa Ia faia, ia tatou saili e le aunoa e faia le finagalo o lo tatou Tama (tagai Ioane 6:38).

Ou te matuai faafetai lava mo lo’u Faaola, o Iesu Keriso. O Lana taulaga togiola mo i tatou na avea ma faatusa aupito sili o le alofa e le gata o Ia ma lo tatou Tama i le Lagi mo i tatou taitoatasi, ma e faatasi ai ma faatusa totino o lena alofa ma le taulaga—o faailoga i lima, ma vae, ma le itu o le Faaola—o loo tumau ai pea tusa pe ua mavae Lona Toetu mai (tagai Isaia 49:15-16). ”E le sili lava le alofa o se tasi i lenei alofa.” Tau ina ia tatou faaalia le alofa sili atu mo Ia i lenei vaitau o le Eseta, ma taimi uma, e ala i le faaalia o le alofa sili atu mo isi (tagai Mataio 25:40).