“Faatumulia i le Faamoemoe ma le Filemu,” Liahona, Aperila 2026.
O Leo o le Au Paia o Aso e Gata Ai
Faatumulia i le Faamoemoe ma le Filemu
Po o a lava tofotofoga tatou te feagai, e mafai ona tatou maua le filemu e ala ia Iesu Keriso.
Ata na tusia e Elia Sampo; e le mafai ona kopiina
A o ou faalogologo i le Aufaipese a le Tapeneko i le Lotoa o le Malumalu o loo lagiina le “It Is Well with My Soul” i le taimi o le konafesi aoao ia Aperila 2025, sa faatumulia lo’u loto i le Agaga. Sa le na o le musika—o le migao loloto ma le faamaoni i pesega na ou lagona ai e pei o loo ou tu i le afioaga o le Faaola. Sa ou tagi ona o le matagofie o musika, lea na faamanatu mai ai ia te au e ala ia Iesu Keriso ma Lana Togiola, e mafai ai ona ou maua le filemu e ui lava i o’u tauiviga.
A o ou taina viiga mo le sauniga faamanatuga, sa masani ona ou lagonaina o musika o se ituaiga o tatalo, o se auala e valaaulia ai le Agaga ma fesootai ai ma le Atua. Ae o le faalogoina o lenei viiga na usuina ma le matagofie e le aufaipese, sa ou lagonaina ai se sootaga loloto atu i lena upumoni. Sa pei o musika, na tuufaatasia ma le Agaga, na siitia ai lo’u agaga ma faamanatu mai ai ia te au le mana o le alofa tunoa o le Faaola i lo’u olaga.
“Aua e fiafia lo’u agaga i le pese o le loto; ioe, o le pese a e amiotonu o se tatalo mai ia te a’u, ma o le a talia ma se faamanuiaga i luga o o latou ulu” (Mataupu Faavae ma Feagaiga 25:12).
O lenei folafolaga e lagona le moni ia te au. E ala i musika, tatou te ofoina atu ai o tatou loto i le Alii. O le taui, Na te faatumuina o tatou agaga i le faamoemoe ma le filemu. A o ou faalogologo i le viiga, sa faamanatu mai ia te au e tusa lava po o a tofotofoga tatou te feagai—i o tatou olaga patino, a tatou sootaga, po o a tatou tauiviga ma le faatuatua—e mafai ona tatou maua le filemu e ala ia Keriso. I na taimi, e lelei moni lava i o tatou agaga.
O lenei aafiaga ua faalolotoina ai lo’u fiafia i viiga ma le matafaioi o loo latou faia i o tatou olaga faaleagaga. E le na o ni pese. O tatalo, savali o le faamoemoe, ma auala e valaaulia ai le alofa o le Faaola i totonu o o tatou loto. Ou te faafetai mo le auala e mafai ai e le mana o musika ona siitia ma faamalosia i tatou, aemaise lava pe a sili ona tatou manaomia.