Faamamaina e le Malamalama

Ata na tusia e Elia Sampo; e le mafai ona kopiina

Pe a faatinoina sauniga i totonu o le malumalu, e faamaumau e tagata faigaluega o le malumalu ia sauniga taitasi ma fai se faailoga faasa’o i se penitala lanumumu i luga o le kata o le igoa. I se tasi aso, ina ua uma ona faia se sauniga, sa ou tuuina le penitala i totonu o le taga o lo’u peleue paepae. Ina ua ou toe foi atu i le ofisa, sa ou tuueseina le penitala.

Mulimuli ane, ina ua ou taina le peleue, sa oo mai ua pisia i le lanu mumu! Sa ou iloa ai ua gau le mata o le penitala lanumumu i le taga o le peleue. Sa ou le talitonu o se si mea itiiti o le mata o le penitala e mafai ona mafua sea ituaiga o leaga.

Sa ta’u mai e lo’u toalua ua leaga le peleue, ae sa ou filifili e taumafai e faamama ese pisia mumu. Ae peitai, ina ua ou aveesea le peleue mai fafo o le vailaau fai pisia, ua suia i le lanu samasama.

Sa ou tatalo, “Tama Faalelagi, o le a se mea e tatau ona ou faia nei?” I lo’u mafaufau, sa mafai ona ou iloa atu le palau lanumumu a le uso o lo’u tama, lea sa faaaluina lona taimi atoa i le la i le fanua. Sa ou manatuaina o le la e tafia ai le tele o lanu. O lea, sa ou tuuina ai lo’u peleue i le la susulu, ma faaaliali ma le faaeteete le eria sili ona samasama i le malamalama. O le mea na faateia ai, ina ua mavae le tele o aso, sa toe liu papae foi.

O le la, lea e faamalamalamaina le pogisa, na toe faasinasinaina lo’u suti. O le Alo, o lē e faamalamalamaina le lalolagi (tagai Mataupu Faavae ma Feagaiga 88:6–13; Ioane 8:12), e mafai ona toe faamamaina i tatou. E pei ona folafola mai e le Alii e ala mai ia Isaia, “E ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:18).

Ua faamalamalama mai e Alema lenei mataupu faavae: “Ou te fai atu ia te outou, o le a outou iloa i lena aso e lē mafai ona faaolaina outou; ona e leai se tagata e mafai ona faaolaina sei vagana ai ua tatā faasinasina ona ofu; ioe, e ao ina faamamaina ona ofu seia oo ina ua mama mai pisia uma, e ala i le toto o ia o lē na tautala mai ai o tatou tamā, o lē o le a afio mai e togiola ona tagata mai ia latou agasala” (Alema 5:21).

Ua ia i tatou le avanoa paia o le salamo ma le mama e ala i le Togiola a Iesu Keriso. A tatou salamo, e aveesea e Ia lo tatou pisia i le agasala po o soo se isi lava mea e faalavelavea ai lo tatou alualu i luma faaleagaga.

O le Eseta o se avanoa faapitoa e manatua ai le mana faamama o Keriso o galue i o tatou olaga. E pei lava ona toe paepae le peleue o lo’u suti i le la, tatou te faamanatuina foi le mea moni e faapea, o le taulaga togiola a le Alo o le Atua o le a faasinasinaina ai a tatou agasala e pei o fulufulu mamoe.