Ponotio Pilato: “O Le A le Upumoni?”

Na saunia e Alison Wood

Mekasini a le Ekalesia

O se vaega tele o le mulimuli ia Keriso i aso nei o le fesili “O le a le upumoni?” ma le saili ia maua.

O Ponotio Pilato o se tagata na faia ni fesili se tele.

Na fesili Pilato e uiga i le Faaola:

“O oe ea o le Tupu o Tagata Iutaia?” (Mataio 27:11).

‘E te le gagana mai ea ia te a’u? Po ua e le iloa, o ia te au le pule e faasatauro ia te oe, o ia te au foi le pule e tatala ia te oe?’ (Ioane 19:10).

Mai tagata i le tausamiga, na fesili atu ai Pilato:

“Po o ai tou te loto iai ou te tatalaina atu ia te outou? O Parapa ea, po o Iesu le ua igoa ia Keriso?” (Mataio 27:17).

“Pe se a foi se leaga ua ia faia?” (Mataio 27:23).

“Ou te faasatauro ea i lo outou Tupu?” (Ioane 19:15).

I lona aliali puupuu lava i le Feagaiga Fou, o le tele o upu ua tusi faamaumauina a Pilato o ni fesili. O ia o se tagata o loo tauivi ia malamalama: Aisea e mananao ai Iutaia e faasatauro lenei tagata lea na ia maua “ou te lei iloa se mea e sala ai o ia”? (Ioane 18:38). Aisea o le a latou mananao ai e faasaoloto ia Parapa, o se gaoi ma se fasioti tagata? Ma aisea o le a le toe faafoi ai e lenei tagata tuuaia, o Iesu Keriso, Ana afioga pe tautala foi i Lona lava puipuiga?

I se isi faaupuga, a o fesili Pilato i le Faaola, “O le a le upumoni?” (Ioane 18:38).

Faaiuga a Pilato

I le faaiuga, ua filifili Pilato o le upumoni e le afaina tele e pei o manatu o tagata lautele. Ina ua ia vaai e le mafai ona ia suia manatu o tagata, sa tuu loa lona toe faia o ni fesili. Sa Ia “fafano ai ona lima i luma o le motu o tagata, ua faapea atu, Ou te mama a’u i le toto o lenei tagata amiotonu: faitalia lava outou” (Mataio 27:24).

E foliga mai e le ioe Pilato i manatu o le au faatupu faalavelave e uiga i le Faaola. I se taumafaiga faaiu e faaali atu i tagata o Ierusalema na te lei mauaina se mea sese ia Iesu, ua toe aumai ai e Pilato o Ia i luma mo se taimi se tasi. “Ona maliu atu lea o Iesu i fafo, ua pale i le pale tuitui, ma ofu i le ofu pauli. Ua fai atu foi Pilato ia te i latou, Faauta i le Tagata!” (Ioane 19:5).

Ua tusia foi e Pilato o le faailoga “O Iesu le Nasareta o le Tupu o tagata Iutaia,” e tuu i luga o le satauro o Keriso, ma musu e sui (Ioane 19:19–22). Ina ua fesili atu Iosefa le Arimataia mo le tino o Iesu, ua faataga e Pilato o ia e ave (tagai Mareko 15:43–45).

E le mafai ona tatou iloa faamoemoega tonu o Pilato, ae e foliga mai e talitonu o Iesu e le o se tagata solitulafono. Ua ia iloa na tuuina atu Keriso ia te ia ona o le lotoleaga (tagai Mataio 27:18). Tatou te le iloa tonu foi le mea sa ia mafaufau i ai e uiga i le Alo o le Atua, ae e foliga mai ua iloa e Pilato e i ai se mea e ese e uiga ia te Ia.

Ae peitai, ua ia tuuina atu lava le Faaola ina ia faasatauroina.

O Le A Faapefea ona Tatou Tali Atu i Ai?

E tele mea e mafai ona tatou aoaoina mai i tauiviga a Pilato. O se vaega tele o le mulimuli ia Keriso i aso nei o le fesili “O le a le upumoni?” ma saili ia maua. O se vaega o aso taitasi o lo tatou avea ma soo o le taumafai lea e faalogo i Lona Agaga i luga o leo leoleoa o le lalolagi, i latou tatou te fetaiai faafesagai ma luga o le initoneti.

Ua saili e Pilato le upumoni, ae na te le o iloa o loo iai tonu i ona luma—o Iesu Keriso, “o le ala ma le upu moni, ma le ola” (Ioane 14:6; faaopoopo le faamamafa). E le mafai ona Ia “vaai i le tagata” po o ai moni lava o Ia.

Na molimau mai Elder Dieter F. Uchtdorf o le Korama a Aposetolo e Toasefululua, “Ma o le aso aupito sili ona taua i lou soifua ma lo’u olaga o le aso sa tatou aoao ai e “vaai i le tagata”; ina ua ta vaai ia te Ia i Lona tagata moni; ina ua tatou faaaogaina ma o tatou loto ma mafaufau atoa Lona mana togiola, ina ua tatou tautino atu e mulimuli ia te Ia ma le naunautaiga ma le malosi ua faafouina.”

I le tala a Ponotio Pilato, tatou te maua ai ni valaaulia se lua mo lo tatou lava avea ai ma soo: ia saili le moni o le paia o Iesu Keriso, ma o le taimi lava tatou te maua ai la tatou tali, aua lava nei lafoaia lena upumoni.

Pe a tatou iloa Iesu Keriso—pe a tatou vaai moni ia te Ia—o le a tatou “iloa le mea moni, e tuusaoloto foi outou e le upumoni“ (Ioane 8:32).