O Le Manumalo o lo Tatou Faaola Pele

I lo’u valaauga o se Aposetolo, sa tele ina ou malaga ma maua le avanoa e feiloai ai i tamaiti, autalavou, ma tagata matutua i le tele o le lalolagi. E i ai taimi o le olioli tele i le olaga, ae o le mea e tasi ua ou vaaia i o’u lava mata ma lagonaina i le taele o lo’u loto e faapea, e faaopoopo atu i le fiafia ma le olioli, o le olaga e i ai taimi o le loto nutimomoia ma mafatiaga.

O le a le galo lava ia te au le nofonofo ai ma se fanau laiti e toafa o o latou matua na faamutaina o laua ola i se faalavelave i lo latou lava fale a o momoe tamaiti, po o le feiloai ma se tamaitai sa sauaina o se teineitiiti e se tagata faatuatuaina o le aiga, po o le nofo i autafa o le moega o se teineitiiti talavou o le sa aafia i se manuaga o le faiai ina ua pa’u mai se uila vilivae ma e le o toe mamao ona oti lea, po o le faalogo atu i le masūsū o se tamaitai na faalataina o ia e lona toalua ma ana feagaiga o le malumalu i se auala e ese mai ai mo le tele o tausaga.

Ua ou lagonaina le tiga o se ulugalii ua le toe talitonu le la tama matua i upumoni o le talalelei ma saili e faavaivaia le faatuatua o isi i le aiga. Ua ou asiasi atu i matua ma uo popole o se alii talavou ua faatumulia i folafolaga o lē na faamutaina lona lava ola. Ua ou lagonaina le faanoanoa faaleatua o i latou o e na faia le agasala ma mananao moni lava e salamo ma le faatafunaga o i latou na aafia i le agasala.

Ua ou vaai i le loto nutimomoia o gasegase faalemafaufau mo le tagata o loo mafatia ma mo i latou o e mafatia le leoa a o latou vaavaai atu ma sina tomai e fesoasoani ai. Ua ou vaai i le mafatia e le o le tagata lava ia na mafua mai i mala faalenatura, lologa, afa, afi, ma mafuie. Ua ou molimauina le vevesi i atunuu mai afa faaupufai, taua, ma le faatafunaga, ma mafatiaga e oo mai pe a lafo atu e e lei faamoemoeina i luga o i latou o e mama ma saili e fai le mea sa’o.

Lima Faamalolo, saunia e Kolby Larsen, e le mafai ona kopiina

E Fesoasoani Mai le Faaolla ia i Tatou

I le saunoa ai e uiga i le Togiola a Iesu Keriso, na saunoa ai Peresitene James E. Faust (1920–2007), Fesoasoani Lua i le Au Peresitene Sili: “E tatau i e manunua ona faia mea latou te mafaia e galulue ai i o latou tofotofoga, ma o le a fesoasoani le Faaola i ona tagata e tusa ma o latou vaivaiga’ [Alema 7:12]. O le a Ia fesoasoani ia i tatou e tauave a tatou avega. O nisi manu’a e matua tiga lava ma loloto e le mafai ona faamaloloina e aunoa ma le fesoasoani mai se mana sili atu ma le faamoemoe mo le faamasinoga tonu ma le faaatoatoaina i le olaga a sau. E malamalama o Ia i o tatou tigā ma o le a savali faatasi ma i tatou e oo lava i o tatou taimi sili ona pogisa.”

Ou te lagona le faateleina o le tosina atu i le alofa o le Faaola ma faamanuiaga e le gata ua folafola mai ia i tatou e ala i le Togiola a Iesu Keriso. Na te lei puipuia i tatou mai aafiaga faigata o le olaga lea e aumaia ai tiga e le mafuatiaina, ae sa Ia puipuia i tatou mai mafatiaga tumau-faavavau ma le vavaeeseina mai le Tama Faalelagi ma faatagaina i tatou, e ala i Ona puapuaga e le mafuatiaina, ina ia maua le avanoa i le olioli atoatoa ma le fiafia e faavavau i le afioaga o le Atua.

Na faamanatu maie Peresitene Dallin H. Oaks ia i tatou: “O le mea mautinoa, o le fesoasoani faaletino aupito malosi a le Atua o Lona saunia lea o se Faaola, o Iesu Keriso, o lē o le a puapuagatia e totogi le tau ma saunia le faamagaloga mo agasala e salamoina. Ua faamatalaina e lena Togiola alofa mutimutivale ma le mamalu, le mafuaaga ua avea ai le faatuatua i le Alii o Iesu Keriso ma uluai mataupu faavae o le talalelei. O Lana Togiola ‘ua aumaia le toetutu mai o e ua oti’ (Alema 42:23ma ua ‘togiola mo agasala a le lalolagi’ (Alema 34:8), ma faamama uma ai a tatou agasala e salamoina ma tuuina atu ai i lo tatou Faaola le mana e fesoasoani ai ia i tatou i o tatou vaivaiga i le olaga nei.”

Faamatalaga mai le Tatalo i Ketesemane, saunia e Del Parson, e mafai ona kopiina mo na o le faaaogaina e le Ekalesia

Mea Taua na Tupu i le Faavavau

Pe a ou mafaufau i puapuaga ua ou vaai patino i ai, lea e matua laitiiti lava pe a faatusatusa ia i latou uma o e ua i ai pe o le a savavali i le lalolagi, e le mafai, i soo se upu ou te iloa, ona faamatala lagona i lo’u loto mo mea atonu na tutupu i le loto ma le mafaufau ma le tino ma le agaga o le Faaola i Ona taimi paia o mafatiaga uma mo agasala ma tiga o tagata uma.

O le mea taua na tupu i le faavavau atoa na amata a o afio atu Iesu “i se nofoaga ua ta’ua o Ketesemane” (Mataio 26:36) i le Mauga o Olive i fafo atu o pa o le aai o Ierusalema. Na Ia fetalai atu i Ona soo, “Ua matua tiga lo’u loto e oo i le oti’ (Mataio 26:38).

Sa tatalo o Ia ma faapea atu, “Lo’u Tama e, afai e mafai, ia ave ese lenei ipu ia te au; ae aua le faia lo’u loto, ao lou finagalo” (Mataio 26:39). Sa toe foi atu o Ia i Ona soo, ma maua atu i latou ua momoe, toe alu ese, ma tatalo mo le taimi lona lua. “Lo‘u Tama e, a le mafai ona aveese o lenei ipu ia te au seia ou inu ai, ia faia lou finagalo.” Ma sa tatalo [o Ia] i le taimi lona tolu, ma fai atu ia lava upu e tasi” (Mataio 26:42, 44).

Sa inu e Iesu le ipu oona ma puapuagatia i talaatu o lo tatou malamalama faaletino i le faatoaga ma luga o le satauro. E aunoa ma se agasala, na Ia tauaveina i Ona lava luga a tatou agasala uma, a tatou o mai ia te Ia ma salamo, o le a aveesea a tatou agasala ma avega mai ia i tatou (tagai 2 Korinito 5:21).

Ua leva ona faamoemoeina mafatiaga, maliu, ma le taulaga togiola a Iesu. I le talanoa ai i le 700 tausaga a o lei soifua mai Iesu, sa valoia ai e Isaia e faapea “ua faaoo ia te ia e Ieova le amio leaga o i tatou uma” (Isaia 53:6). Na fetalai Iesu e uiga i le tuuina atu o Lona soifua o se “togiola” (Mataio 20:28; tagai foi 1 Timoteo 2:6) “mo le faamagaloina o agasala” (Mataio 26:28) mo i latou uma o e o le a talitonu ia te Ia ma salamo ia latou agasala. Sa faamatala e Peteru le ala na Ia “puapuagatia ai mo a [tatou] agasala” (1 Peteru 3:18), e ala mai i Ona faalavalava ua faamaloloina ai i tatou (tagai 1 Peteru 2:24). Sa Ia faia le mea e leai se isi e mafai ona faia e faataga ai i tatou e toe foi atu i le afioaga o lo tatou Tama. Sa “momomo o Ia ona o a tatou amioletonu” (Isaia 53:5).

Ina ua mavae puapuaga i Ketesemane, sa faaauau pea Ona mafatiaga—o le faalataina e se tasi sa savavali faatasi ma Ia, o le tauemuga i luma o taitai amioletonu, o le tiga o Lona tino sa sasaina, o le pale tuitui na oomi atu i Lona ao e fitafita agaleaga ma le le alofa (tagai Ioane 18:2–3, 12–14; Mareko 15:15–20), ma le laau mamafa na sasau atu i luga o le aano masae o Lona tua a o agai atu o Ia i Kolokota (tagai Ioane 19:16–17).

I luga o le satauro, sa toe foi atu ai le lagona tiga ogaoga sa lagonaina i Ketesemane ma se matuitui e leai se tagata e mafai ona onosaia. O Iesu Keriso, le Alo o le Atua, na tuuina mai ma le mausali le poloaiga paia a Lona Tama e tuuina atu Lona soifua. Sa le mafai e fitafita ma taitai ona aveesea mai ia te Ia (tagai Ioane 10:18). I le migao ma le lotomaualalo, sa punou ifo ai le ao o Iesu ma fetalai atu, “Ua mae’a” (Ioane 19:30).

O le taimi mulimuli o Lona soifuaga faaletino ua mae’a. E leai ni upu e faamatala ai le maoae o Lana meaalofa faapelepele. O le a le manaomia lava e se isi. Sa puapuagatia Iesu Keriso “fai faatasi ” (Eperu 10:10).

Faatasi ai ma Lana misiona paia ua faataunuuina, o le a avea nei o Ia ma tagata muamua i le talafaasolopito uma o tagata soifua e toetu mai le tuugamau i le tino ola pea (tagai 1 Korinito 15:21–23).

I fafine i le tuugamau, na fai atu i ai agelu:

“Se a le mea tou te saili ai le ua soifua i e ua oti?

“E le o iinei o ia, a ua tu” (Luka 24:5–6)).

I Ana Aposetolo, Na Ia fetalai i ai, “Ia outou vaavaai mai i o’u lima ma o’u vae, aua o a’u lava lenei” (Luka 24:39). Mulimuli ane, “sa vaaia o ia [e le siilia ma le] lima selau … i le taimi e tasi” (1 Korinito 15:6). O molimau vaaitino na vaai i le Faaola toetu. Sa le o maliu o Ia. Ua soifua o Ia!

Na motusia e Iesu Keriso ia filifili ma nonoa o le nofopologa e faavavau o le oti mo tagata uma o e sa ola pe o le a ola i le lalolagi (tagai 1 Korinito 15:22). Sa Ia faatoilaloina lo tatou fili na aofia uma ai; o le fili o le oti sa faavavau ona mou ese atu.

Na saunoa Peresitene Russell M. Nelson (1924–2025): “Sa ave e Iesu Keriso i Ona lava luga au agasala, o ou tiga, o ou lototiga ma ou vaivaiga. E te lē tau tauaveina na mea na o oe! O le a Ia faamagalo oe pe a e salamo. O le a Ia faamanuia oe i mea e te manaomia. O le a Ia faamalolo i lou agaga ua faamanu’alia. A e tauamo atu oe lava ia ia te Ia, o le a e lagonaina le māmā atili o au avega. Afai o le a e osia ma tausia feagaiga e mulimuli ia Iesu Keriso, o le a e iloaina o taimi tiga o lou olaga e le tumau. O ou puapuaga o le a ‘faatumuina i le olioli o Keriso’ [Alema 31:38]”

I le avea ai ma se tasi o Ana Aposetolo faauuina, ua ou oo ai i taimi faaleagaga ma faaletagata lava ia na aumaia ai ia te au se molimau moni ma le mautinoa o loo soifua o Ia. I lenei vaitau o le Eseta, tau ina ia tumau lemu nei upu i o tatou mafaufau ma loto: “Aua ne’i galo ia te a’u, Le Faaola e, na e tafetotoi ma maliu mo a’u,” a o tatou olioli i le pepese: