“O Le Loto Naunautai o Maria: O Le Auala e Mafai ai e le Faatuatua ona Faafaigofie Mea Faigata,” Liahona, Ape. 2026.
Sa Latou Iloa le Faaola
O Le Loto Naunau o Maria: O Le Ala e Mafai ai e le Faatuatua ona Faafaigofie Mea Faigata
E mafai ona tutupu vavega silisili pe a tatou filifili e faaogatusa o tatou loto ma le finagalo o le Atua.
Ata na tusia e Laura Serra; e le mafai ona kopiina
Ina ua ta’u atu e le agelu o Kaperielu ia Maria ua filifilia o ia e fanauina le Alo o le Atua, sa ia tuuina atu ia te ia se faamautinoaga mamana: “Aua e leai lava se mea e tasi e le mafaia e le Atua” (Luka 1:37). E le gata i le musuia o le faatuatua ma le lototele, o se upumoni foi lenei—o se upumoni e mafai ona iloa e Maria mo ia lava, pe afai e naunau o ia.
O le mea e lelei ai, sa naunau Maria ma filifili e talia le valaau a le Atua (tagai Luka 1:38), e tusa lava pe na te lei mauaina tali uma. Ma ona o lona faatuatua ma le lotomaualalo, o le fuafuaga o le faaolataga a le Atua—lea i lena taimi “sa faalagolago atoa i [ana] faatinoga”—sa mafai ai ona agai i luma.
Na te lei iloaina i lena taimi, ae o lenei tiutetauave paia o le a tatalaina ai Maria i aafiaga semanu e le maua e ia. O nisi na te faatauaina ma teuina i lona loto (tagai Luka 2:15–19, 41–51). O isi o le a mafua ai ona tiga o ia (tagai Luka 2:34–35). Ae o le a aumaia e tagata uma o ia ia latalata atili atu i le Atua ma le upumoni paia sa ia aoaoina o se tamaitai talavou e faapea “e leai lava se mea e tasi e le mafaia e le Atua.”
Ona sa Naunau o Ia
O le naunau o Maria e talia le finagalo o le Atua sa lei saogalemu ai o ia mai tofotofoga, faanoanoaga, po o le le fiafia. O le mea moni, sa feagai o ia ma luitau fou o le tina o le Mesia, e aofia ai le po o le soifua mai o le Faaola. E uiga i lena taimi, na aoao mai ai Peresitene Jeffrey R. Holland o le Korama a Aposetolo e To’asefululua:
“Lona lua i le tamaitiiti lava ia, o Maria o le tagata aupito sili, o le masiofo tupu, tina o tina—o loo uuina le tulaga tutotonu i lenei tulaga silisili o taimi maoae uma. Ma … vagana ai lona toalua pele, sa matua tuuatoatasi lava o ia.
“Sa ou mafaufau pe mata o lenei tamaitai talavou, o se tamaitiiti lava ia, o loo tuuina atu lana pepe muamua, atonu na moomoo i lona tina, po o se uso o lona tina, po o lona uso, po o se uo, ina ia latalata atu ia te ia i le taimi e tiga fanau ai. …
“Ae ua le o lea. Faatasi ai ma le fesoasoani a Iosefa e leai se poto masani, sa ia aumaia ai lona atalii ulumatua, ma aui o ia i ofu laiti sa ia aumaia ma le iloa i lana malaga, ma atonu na ia faataoto o ia i luga o se aluga o vaovao mago.”
Sa faaauau pea luitau a Maria a o avea ma se tina talavou ina ua la sosola ese ma Iosefa mai lo la nuu moni mo Aikupito e puipuia ai le soifua o Iesu. Sa tatau foi ia te ia ona aoao po o le a le uiga o le tausia o se Atalii i se misiona paia lea na foliga mai na vave ai ona matua o Ia ma poloaiina ai le tele o Lona taimi o se tagata matua (tagai Mataio 12:46–50).
I le avea ai ma Lona tina, sa maua e Maria le avanoa e mafuta vavalalata ai ma Iesu ma vaai atu ia te Ia o faia mea e foliga mai e le mafai. Sa ia vaavaai atu ia te Ia o aoao atu tagata aoaoina i le malumalu ina ua na o le 12 ona tausaga (tagai Luka 2:41–51; Faaliliuga a Iosefa Samita, Luka 2:46 [i le Luka 2:46, vaefaamatalaga i]). Sa ia iloa e mafai ona ia valaau atu ia te Ia mo se vavega (tagai Ioane 2:1–11). Ma sa tu o ia i tafatafa o Ia i le satauro a o Ia faaauau pea ona faia mea faigata e ala i le puapuagatia mo agasala uma, faanoanoaga, ma tauiviga a tagata (tagai Ioane 19:25–27).
Ma o lea, o upu a le agelu o Kaperielu e faapea “e leai lava se mea e tasi e le mafaia e le Atua” ona tauaveina se uiga fou. E le gata ina mafai e le Atua ona aumaia le ola fou i le lalolagi, ae e mafai ona Ia aumaia le ola i le lalolagi e ala i le taulaga togiola a Iesu Keriso.
Gauai Atu O Tatou Loto i le Atua
O le saunia o Maria e talia le finagalo o le Atua, na mafai ai e ia ona ausia lona gafatia paia, ma toe faaleo atu ai le saunia o Iesu lava Ia e talia le finagalo o Lona Tama, ma faatagaina ai o Ia e faataunuu Lana misiona paia o le Faaola. O se taunuuga o le lotomaualalo o Iesu, o mea e foliga mai e faigata—e aofia ai Lona manumalo i le oti e ala i le Toetu—na tupu, ma faamanatu mai ai ia i tatou afai tatou te mananao e ausia o tatou gafatia ma maua mea e le mafai ona tupu i o tatou olaga, e tatau ona liliu atu o tatou loto i le Atua.
Na aoao mai Elder Ulisses Soares o le Korama a Aposetolo e Toasefululua: “E moomia ai se loto e toa ma le naunautai e … e faamatuu atu i tatou lava i le Atua, ma iu ai ina tonu e talia Lana auala nai lo o tatou lava ala. O le suega laualuga o lo tatou avea ai ma so’o, e maua i lo tatou naunautaiga e lafoai ma faamaamulu o tatou tagata tuai ma faamatuu atu o tatou loto ma o tatou agaga atoa i le Atua ina ia avea ai Lona finagalo mo tatou.”
O le faaogatusaina o o tatou loto ma le finagalo o le Atua e le o taimi uma e tuusao pe faigofie ai, ae e le tatau ona tatou faia lenei suiga na o i tatou lava. A o tatou faatinoina le faatuatua ia Iesu Keriso ma Lana Togiola, e mafai ona tatou ausia lo tatou gafatia paia ma avea ma tagata e finagalo o Ia ia avea ai i tatou (tagai 2 Korinito 5:17–19).
E pei ona molimmau mai Peresitene Russell M. Nelson (1924–2025): “O le faatuatua ia Iesu Keriso o le mana silisili lea ua avanoa mo i tatou i lenei olaga. E mafaia mea uma ia i latou o ē talitonu [tagai i le Mareko 9:23].”
Na aoao mai foi Peresitene Nelson e faapea, a oo ina “faamuamua le Atua” i o tatou olaga, “e tele na’ua faafitauli o le a le avea ma faafitauli!” O le a faaitiitia le faigata o a tatou faaiuga, o le a sili atu ona tatou faaaogaina o tatou taimi, ma e mafai ona faamaloloina o tatou loto momomo. Na Ia folafola mai, “A o e filifili e faamuamua le Atua i o outou olaga, o le a outou lagonaina mo outou lava o lo tatou Atua o “se Atua o vavega” [Mamona 9:11].”
Ioe, e manaomia le lototele e faamuamua ai le Alii nai lo le faalagolago i o tatou lava gafatia (tagai Salamo 118:8). Atonu e faapitoa lava le moni o lenei mea pe a tatou le mauaina tali uma po o le taimi tatou te talitonu ai atonu o le a i ai se ala sili atu e mulimuli ai nai lo le ala a le Atua. Ae o le taimi lava tatou te filifilia ai o Ia, o le mea moni o le a faigofie atu o tatou olaga. Aua a ogatusa o tatou loto ma le finagalo o le Alii, ua tatou lotogatasi ma Ia. Na te tuuina mai ia i tatou Lona malosi, lagolago, ma le mana. Ma e mafai ona tatou agai i luma ma le mautinoa faateleina, e pei lava ona sa faia e Maria, i le iloaina o le Atua, e leai se mea e faigata.