“O Le Tusi a Mamona ma le Vavega o le Eseta,” Liahona, Ape. 2026.
O Le Tusi a Mamona ma le Vavega o le Eseta
O le tala o le Eseta i le Tusi a Mamona ua faasino atu ai i tatou i tua atu o suiga i fafo ma agai atu i suiga i totonu ua ofoina mai e le Faaola.
O Keriso o loo Faaali Atu i le Itulagi i Sisifo, saunia e Arnold Friberg
Faamata e faape’i le ala a’e, tilotilo i fafo o le faamalama, ma vaai ua suia atoa le laufanua?
Ina ua mavae le maliu o Iesu Keriso, sa vaaia e tagata i Amerika le suia o o latou laufanua faaletino. O fevesia’iga na aofia ai se mafuie, matagi, afi, ma asiosio. Sa faaumatia aai uma, ma “sa suia foliga o le laueleele atoa” (3 Nifae 8:12). Sa ufitia e le pouliuli le laueleele mo aso e tolu, ma i le pouliuli sa faalogo ai tagata i le siufofoga o le Faaola: “Pe tou te le foi mai nei ea ia te au, ma salamo ia outou agasala, ma liua, ina ia Ou faamaloloina outou?” (3 Nifae 9:13).
Mulimuli ane, sa faapotopoto tagata i le malumalu ma “sa latou maofa ma taufaiofo o le tasi i le isi, ma faaali atu e le tasi i le isi suiga tetele ma ofoofogia ia ua oo mai” (3 Nifae 11:1). O le tele lava o lo’u olaga, sa ou manatu sa latou talanoa e uiga i suiga i le laufanua. E mafai ona ou vaai faalemafaufau i tagata o fai mai, “Oka! Na faafuasei lava ona i ai se mauga i lo’u tuafale!” po o le “Sa le masani ona i ai sa’u fanua i le matafaga, ae o lea ua iai!”
Ae atonu sa maofa tagata i se suiga e sili atu ona anoa na tupu—o se tasi sa sili atu ona “tele ma ofoofogia” nai lo suiga i fafo atu o le laufanua. A o latou “fetautalatalaai foi e uiga i lenei Iesu Keriso” (3 Nifae 11:2), atonu na latou manatuaina le valaaulia ia suia faaleagaga i Lana poloaiga ia “salamo, ma o mai ia te au” (tagai 3 Nifae 9:22).
Ona o le Toetu o le Faaola, o fanau uma a le Atua o e o mai i le lalolagi o le a maua se tino toetu. Peitai, e le lava le mauaina o le tino ola pea e ala i le Toetu o Keriso; tatou te mananao foi ia avea faapei o le Tama Faalelagi ma Iesu Keriso i totonu. Ua aoao mai le Tusi a Mamona e uiga i le suiga i totonu lea ua mafai ona maua ona o le Togiola.
Iloaina o Lona Paia
I le 3 Nifae 11, tatou te faitau ai na faalogoina e tagata se siufofoga mai le lagi. I le taimi muamua latou te lei malamalama i ai, ae ina ua uma ona latou gauai atoa atu i ai, sa iu ina latou iloaina le siufofoga o le Atua o tautino mai, “Faauta i lo’u Atalii Pele” (fuaiupu 7). E le na o le faailoaina atu o Iesu Keriso e le Tama Faalelagi; Sa Ia molimau atu, e pei lava ona Ia mafaia, e uiga i le paia o Keriso.
O le Faaola o le Alo Ulumatua a le Atua i le agaga ma le Alo e Toatasi na Fanaua i la le tino (tagai Mataupu Faavae ma Feagaiga 93:21; Ioane 3:16). O se tasi lenei o mafuaaga taua e mafai ai e Ia ona faatino le Togiola lea e mafai ai ona tatou suia i totonu. A aunoa ma le Togiola a Iesu Keriso, o le a otometi lava ona ta’usalaina i tatou e a tatou mea sese ma agasala. Faatasi ai ma Lana Togiola, e le gata ina mafai ona faamamaina i tatou mai ia i latou ae faapea foi ona aoaoina mai ia i latou. Ona o Keriso e paia, e mafai ona Ia ofoina mai ia i tatou le alofa tunoa—fesoasoani faalelagi ma le faufautua—lea e mafai ona fesoasoani ia i tatou e ausia ai o tatou gafatia e faavavau.
Mauaina o se Molimau Patino ia Iesu Keriso ma Lana Perisitua
O suiga i totonu e amata pe a tatou faaalia le faatuatua ia Iesu Keriso ma Ana auauna faatagaina. O se tasi o mea muamua na faia e Keriso ina ua Ia faaali mai i Amerika anamua o le valaaulia lea o tagata, taitoatasi, e avea ma molimau o Lona Toetu. Sa latou vaai ma lagonaina faailoga o Lana taulaga togiola. (Tagai i le 3 Nifae 11:14–15.) Ona latou alalaga fiafia lea, “Osana!” (fuaiupu 17). O se tasi o faaliliuga o lenei upu o le “Sefe, tatou te tatalo.”
Sa tali atu le Faaola i la latou aioiga mo le faaolataga e ala i le valaauina o Nifae i luma ma tuuina atu ia te ia le mana ma le pule e papatiso ai (tagai fuaiupu 21). I lenei auala, sa Ia aoao mai ai o le faaolataga e oo mai e ala i sauniga e faatinoina e ala i le pule tatau o le perisitua.
Atonu e te fesili, “Ae e lei i ai i tagata Amerika le perisitua? Pe latou te lei faatinoina ea ni papatisoga faatagaina?” (Tagai Mosaea 18:8–17.) Ioe, ae e foliga mai sa i ai ia Iesu se faamoemoega taua i le tuuina atu faalauaitele o lena pule ia Nifae ma isi soo. Atonu sa manao o Ia e faamanino atu i luma o tagata uma ua i ai i nei tagata le pule e fai ai ma sui o Ia ma faatautaia sauniga o le faaolataga ma le faaeaga pe a afio ese o Ia. Atonu sa faapitoa le taua o lenei mea ona sa i ai ni finauga e uiga i le ala sa’o e papatiso ai (tagai 3 Nifae 11:28).
E ala i sauniga ma feagaiga o le perisitua, ua faaavanoa ai e le Tama Faalelagi faamanuiaga mo Ana fanau uma. O nei sauniga e fesoasoani i tagata e le gata ia manumalo ai i le lalolagi ae ia avea atili ai foi e faapei o le Tama Faalelagi ma Iesu Keriso.
Mauaina o Lona Mana e Ala i Lana Aoaoga Faavae
O le isi, o suiga i totonu e faalagolago lea i lo tatou mafai ona maua o le anoanoai o le mana o Keriso. I le atu Amerika, sa aoao atu ai e le Faaola ia tagata i Lana aoaoga faavae, ae patino lava i le aoaoga faavae na tuuina atu ia te Ia e le Tama Faalelagi (tagai 3 Nifae 11:31–32). E aofia ai le faatuatua i le Alii o Iesu Keriso, salamo, papatisoga, ma le mauaina o le Agaga Paia (tagai i fuaiupu 32–35). Afai tatou te atiae i luga o lenei faavae, e mafai ona tatou tumau e oo i le iuga, “ma o le a le manumalo faitotoa o seoli ia te i [tatou]” (fuaiupu 39).
E ala i le aoaoga faavae a Keriso, e mafai ai ona tatou maua Lona mana, ma e mafai ona Ia suia o tatou lava natura. A aunoa ma le faatuatua ma le salamo, o le a itiiti se manao e sui. A aunoa ma le papatisoga ma le meaalofa o le Agaga Paia, o le a faatapulaa le mana e suia ai. A aunoa ma le mataupu faavae o le tumau e oo i le iuga, o le suiga i lo tatou laufanua i totonu o le a faavavau ona le moni ma lē tumau, e aunoa ma se taimi e magoto ifo ai i le taele o o tatou loto ma avea ma se vaega o le tagata ua avea ai i tatou.
Faatasi ma Ia
Po o le a lava le tele o le alolofa o le Tama Faalelagi ma Iesu Keriso ia i tatou ma mananao e faamanuia ma fesoasoani mai ia i tatou, o le a Laua le faamalosia i tatou e sui. O le ola ai i le aoaoga faavae a Keriso o le auala lea tatou te faaaogaina ai lo tatou faitalia e valaaulia ai i La’ua e auai faatasi ma i tatou i le faia o o La’ua lava uiga paia ma tatou.
Ina ua asiasi atu Iesu Keriso i tagata i Amerika anamua, sa Ia tuuina atu se lauga e pei o le Lauga i luga o le Mauga o loo tusi faamaumauina i le Tusi Paia ae faatasi ai ma ni eseesega taua. Mo se faataitaiga, o le Tusi a Mamona o loo aofia ai aoaoga faaopoopo a le Faaola e le o i ai mai la tatou Tusi Paia o i ai nei. O nei aoaoga e taulai atu ai i tatou i uluai mataupu faavae ma sauniga o le talalelei: faatuatua ia Iesu Keriso, salamo, papatisoga, ma le mauaina o le Agaga Paia. (Tagai 3 Nifae 12:1–2). E fesoasoani lenei mea e tuuina atu ai se matalalaga e tagai ai i faaamuia o loo mulimuli mai o se mea e sili atu nai lo se faaputuga o fautuaga lelei.
Na ta’ua e Peresitene Harold B. Lee (1899–1973) le Lauga i luga o le Mauga, lea e amata i Faaamuia, “o se faaaliga o uiga o [Keriso] lava ia … po o se mea e ono ta’ua o se ‘talaaga o le soifuaga.’” O se valaaulia mai ia Keriso e auai faatasi ma Ia i le faagasologa o le mauaina o Ona uiga faaleatua. I le faa-Eleni, o le upu amuia o lona uiga o le “faamanuiaina” po o le “fiafia.” Peitai, pe a mafaufau i le fesootaiga o Faaamuia i le Salamo, e mafai foi e le upu ona fautuaina mai le “paia” po o le “faaeaina.”
A uma ona filifili le faatuatua ia Iesu Keriso ma osia feagaiga, “amuia e matitiva i le agaga o e o mai ia [Keriso]” (3 Nifae 12:3). Pe a tatou matitiva i le agaga, tatou te iloa e umi se auala tatou te o i ai seia oo ina avea i tatou e faapei o le Atua, ma ua tatou filifilia Iesu Keriso o lo tatou Faataitaiga ma le Faiaoga Atoatoa e fesoasoani ia i tatou ia oo atu iina. Pe a tatou le atoatoa, tatou te faanoanoa ona o a tatou agasala ma filifili e salamo (tagai fuaiupu 4). Tatou te faaalia le agamalu a o tatou o mai faatasi soo e faalatalata atu ia te Ia e ala i le tagofia o le faamanatuga. E fesoasoani le faamanatuga ia i tatou e faamalosia ai la tatou sootaga faalefeagaiga ma le Tama Faalelagi ma Iesu Keriso, ma faaauau ai pea ona talia lo La’ua malosi ma faatosinaga i o tatou olaga. (Tagai i le fuaiupu e 5.)
Na sosoo ai, sa aoao mai le Faaola, “Ma amuia i latou uma o e e fia aai ma fia feinu i le amiotonu, aua o le a faatumuina i latou i le Agaga Paia” (fuaiupu 6). O le Agaga Paia o le faapaia, “o le avefeau o le alofa tunoa lea e faaaoga ai le toto o Keriso e aveese ai a tatou agasala ma faapaia ai i tatou (tagai 2 Nifae 31:17).” Faatasi ai ma Lana mafutaga faifai pea, tatou te alofa mutimutivale ai ma loto mama e pei o Keriso. O le a fesoasoani le Agaga Paia ia i tatou ia avea ma e faatupuina le filemu o e e mafai ona onosaia sauaga e pei lava ona sa faia e Keriso. (Tagai i le 3 Nifae 12:7–11.)
E mafai ona fesoasoani le Agaga Paia ia i tatou e suia a tatou amioga ma siitia o tatou manaoga ma uunaiga i se tulaga maualuga atu. O le tulafono maualalo, o se tulafono sauniuni, na fai mai, ”Aua e te fasioti tagata” (3 Nifae 12:21). Na fetalai mai le Faaola e le tatau ona tatou feita i o tatou uso (tagai fuaiupu 22). Na faapea mai le tulafono maualalo, “Aua e te mulilua” (fuaiupu 27). Na fetalai mai le Alii e le tatau ona tatou faatagaina le tuinanau e ulu mai i o tatou loto (tagai fuaiupu 28–29). “Ua faatea atu mea tuai, ma ua faafouina mea uma,” na fetalai mai ai le Faaola. “O lea ou te manao ia outou atoatoa e pei lava o aʼu, po o lo outou Tamā o le o i le lagi e atoatoa” (fuaiupu 47-48).
Talisapaia o Lana Meaalofa o le Taimi
O le atoatoaga o le suiga i totonu tatou te sailia, ae e foliga mai e le mafai sei vagana ua tatou manatua o le upu atoatoa i le faa-Eleni o le teleios, o lona uiga o le “uma,” “atoa,” po o le “atiina ae atoatoa.” O le sope tele o lona uiga “i se mea mamao.” Tatou te maua i upu e pei o le telephone, television, ma le telescope— o fesootaiga ma le vaaiga i se mea mamao. Ua tatou iloa i le Tusi a Mamona, e lei ta’ua e Iesu o Ia lava ua atoatoa seia mavae Lona Toetu. I Lona alofa mutimutivale, ua Ia tuuina mai ai foi ia i tatou le meaalofa o le taimi e aoao ai ma tuputupu ae ina ia atoatoa ma atiina ae atoatoa.
I le Tusi a Mamona, e mafai ona tatou vaaia lena vavega i olaga o tagata ina ua mavae le asiasiga a le Faaola. Sa “liua tagata uma i le Alii, i le laueleele atoa, … ma sa leai ni finauga ma ni feteenaiga i totonu ia te i latou, ma sa faamaoni tagata taitasi uma o le tasi i le isi” (4 Nifae 1:2). “O le alofa o le Atua sa mau i loto o tagata. … Ma e moni e le mafai ona i ai o ni tagata e sili atu ona fiafia” (fuaiupu 15–16). Sa faaaoga e nei soo o Iesu Keriso mea sa Ia aoao atu, ma—i le aluga o taimi—sa suia i latou e ala i Lona alofa tunoa. O le sosaiete a Siona lea na latou ola ai mo le toeitiiti 200 tausaga ua faaali mai ai ia i tatou e ala mai ia Keriso, e mafai ai suiga lelei.
I le Eseta, tatou te faamanatu ai le Toetu o Keriso ma le folafolaga o loo ofoina mai ai o le a tatou toetutu foi ma ni tino atoatoa ma faamamaluina. O le tala o le Eseta i le Tusi a Mamona ua faasino atu ai i tatou i tua atu o suiga i fafo ma agai atu i suiga i totonu ua ofoina mai e le Faaola. O le Tusi a Mamona o se tasi molimau ia Iesu Keriso ma o tatou avanoa ma gafatia e faavavau ona o Ia.