Mai le Faanoanoa o le Eseta i le Taeao o le Eseta

Ata na tusia e Elia Sampo; e le mafai ona kopiina

Ina ua toeitiiti atoa le tolu tausaga talu ona ma auauna atu o ni taitai misiona i Kana, sa iu ina amata ona ma masani ai ma lo’u toalua o Ruta. Sa foliga lelei mea uma.

Ona faafuasei lea, ona oo ia Ruta se tiga matuitui i le pito i lalo o lona papatua. Ina ua ta’u mai sa o ni maa o le fatugao na tetelē tele na le mafai ona toulu ese mai, sa auina atu loa o ia i se vaalele i Johannesburg, Aferika i Saute. Ina ua maea se taotoga faamanuiaina, sa oo ina le tātā lona fatu ma maliu ai i totonu o le potu o taotoga.

E faapefea ona tupu lenei mea? Sa ma tuuina atu o ma tagata uma i la ma’ua misiona.

“E te ita ea i le Atua ona o lenei mea?” o le fesili lea a se tasi sa ma faigaluega faatasi i aso ua mavae.

“Leai, ou te le tuuaia le Atua,” sa ou tali atu ai. “Ou te le malamalama pe aisea na tupu ai lenei mea, ae e leai se tasi o i tatou e faasaoina mai le lototiga, e tusa lava pe o tatou taumafai e mulimuli i le faataitaiga a le Faaola o le ‘faia o mea lelei’ (Galuega 10:38). O le faamoemoe o le toetu ua sili atu ona patino, e sili atu ona moni ia te au. O le a le toe tutusa lava le Eseta.”

A o ou saili mo le mafanafana ma le taitaiga i upu o tusitusiga paia ma perofeta o aso nei, sa ou vaaia se sootaga i le va o le faagasologa o le faanoanoa o le Eseta ma le folafolaga o le taeaoo le Eseta. Sa ou maua upu na faamatalaina ai le mana o Iesu Keriso ma le folafolaga o lo tatou toetutu—o upu na fafagaina ai au faaleagaga ma tuuina mai ai se uiga fou i se mea sa tele lava ina le mautinoa muamua.

Na faamanatu mai ia te a’u e faapea “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea na maliu o Ia, na tanumia, ma toetu mai i le aso tolu, ma afio a’e i le lagi.”

Na aoao mai Elder Gary E. Stevenson o le Korama a Aposetolo e Toasefululua e faapea, ona o Iesu Keriso ma Lana Togiola:

• “Na suia ai mea uma.”

• “Ua sili atu ai ona lelei mea uma.”

• “Ua gafataulimma ai le olaga—aemaise i taimi o le tiga.”

• “Ua mafai ai mea uma.”

O lenei Eseta—ma Eseta uma—o le a ou faamanatuina le mana ma le folafolaga o se toetu mamalu mo a’u, mo Ruta, mo e pele ia te a’u, ma e oo lava i tagata ou te lei feiloai lava i ai. E le o tuua na o a’u pe tuuatoatasi, e ui lava i le maliu faafuasei o lo’u toalua pele.

O le a ma’ua toe vaai i le tasi ma le isi, manatua tala ma manatuaga, fefaasoaai vaaiga o le iloaina, ma faasoa atu aafiaga na ma oo i ai a o valavala. O le a tele mea ma te faamatala atu i le tasi ma le isi.