“Fesoasoani mo o Tatou Lototiga,” Liahona, Ape. 2026.
O Leo o le Au Paia o Aso e Gata Ai
Fesoasoani mo o Tatou Lototiga
O le Togiola a Iesu Keriso e mafai ona fesoasoani ia i tatou i mea uma, e tusa lava pe na ta’useseina i tatou.
Ata na tusia e Elia Sampo; e le mafai ona kopiina
Ina ua ou maitaga i la’u tama lona fa, sa matou manaomia se taavale fou. Sa ou maua se taavale i luga o le initoneti, ae sa ou popole i se faatauga tele faapea. Sa ou fesili atu mo se fautuaga mai ni uo atamamai. Sa ta’u mai e tagata uma ia te au o se filifiliga lelei tele, o lea sa ou lagona ai le to’a.
Sa manaomia ona lafoina mai le taavale, o lea sa matou faatalitali ai. I le aso sa tatau ona taunuu mai ai le taavale, sa matou iloa ai na leai se taavale na aumaia!
Sa faaseseina i matou. Sa ou te’i ma olopalaina. Ua leai se matou tupe.
O aso na sosoo ai, pau le mea na mafai ona ou faia o le toe vaai faalemafaufau lea o le aafiaga. Sa matuai ou le fiafia lava ma sa ou tauivi e avea ma se tina ma se avā lelei. Na leai so’u malosi. Sa taia a’u i se tulaga faaletonu ma iloa ai e tatau ona ou sui. O lea, sa ou tatalo ai ma ole atu i le Tama Faalelagi e aveese le avega mai o’u tauau.
Ina ua mavae ni nai itula, sa ou lagona le māmā. Ma mulimuli ane, sa ou le toe lagonaina le mamafa o le avega. Ou te lei ita pe le fiafia. Sa ou lagonaina na o le filemu. Sa ou iloaina o lenei lagona o le toafimalie na oo mai ona o le Togiola a Iesu Keriso.
Ina ua mavae ni nai masina, sa matou maua se tupe mai se faalapotopotoga a le pitonuu sa matou auai ai. O le aofaiga tonu lea na leiloa. Mo i matou, sa o se vavega lena mea.
Ua ou aoaoina e le tatau lava ona ou amoina a’u avega na o a’u. Ua silafia e Iesu Keriso o’u lagona. Sa mafatia o Ia i “tiga ma puapuaga ma faaosoosoga o ituaiga eseese uma” (Alema 7:11). E tatau ona tatou faatagaina o Ia i o tatou olaga ina ia mafai ona Ia fesoasoani mai ia i tatou.
Na aoao mai Peresitene Russell M. Nelson (1924–2025): “E leai se tapulaa o le gafatia o le Faaola e fesoasoani ai ia te oe. O Ona mafatiaga e lemafaamatalaina i Ketesemane ma luga i Kalevario sa faia mo oe! O Lana Taulaga e le i’u e mo oe!”
E finagalo Iesu Keriso e fesoasoani ia i tatou i o tatou lototiga, po o le a lava. E le o tuua na o i tatou. E i ai pea o Ia iina mo i tatou (tagai Mataio 28:20).