Simona le Kurene, O Lē na Tauaveina le Satauro

Saunia e Shaun Stahle

Mekasini a le Ekalesia

E pei o Simona, atonu tatou te iloa o avega tatou te tauaveina i le usiusitai e avea ma mamalu silisili o o tatou olaga.

I se tasi o vaaiga sili ona faaletagata i le soifuaga o faataitaiga a le Faaola, na avea ai Simona le Kurene ma molimau vaaitino i “natura faigata o le alofa ma le faavauvau.”

I le taavilivili o le efuefu ma alaga na faatumulia ai magaala o Ierusalema i lena Aso Faraile maoae, sa toso ese ai Simona mai le motu o tagata ma faamalosia e amo le satauro o le ta’usalaina o Iesu le Nasareta. Sa sau Simona mai se aai i Aferika i Matu, e masalo o se Iutaia tuuto na faia se malaga mo le Paseka.

Ua tusifaamaumau e Mareko, “Ua alu ane le tasi tagata, o Simona le Kurene ua sau mai le vao, o le tama foi o ia o Alesana ma Rufo, ona latou faatauanau lea ia te ia, ina ia ave e ia o lona satauro,” (Mareko 15:21).

I le Nofoaga ma le Taimi Sa’o

Sa lei volenitia Simona. O ia, i tala uma, o se tagata ese. Ae peitai, sa filifilia o ia. I le vevesi o le solo o le Faasatauroga, a o tautevateva Iesu i le mamafa o le satauro, sa i ai Simona iina.

Ua tatou iloa sina vaega taua o Simona, ae e manaia le mafaufau faapea a o taupulepule e le lagi ia auiliiliga o le Togiola taua e faavavau a Iesu Keriso, o se tasi atonu ua “faitaulia faatasi ma e ua faatuatua” o le a filifilia e savali i tafatafa o le Faaola i le taimi e manaomia ai e Ia le fesoasoani.

E tusa ai ma le agaifanua a Roma, sa amoina e se tagata ta’usalaina lona satauro i le nofoaga o le fasiotiga. O le satauro—sa fausia mai i fafie masani, atonu o le olive po o le sukamoro—sa lei mamanuina ma le faaeteete ae i le agaleaga. Sa o se meafaigaluega o le maasiasi ma le oti, na tatope le faiga, na pau le aoga o le lagolagoina o le mamafa o mafatiaga o se tagata.

“Ma o lea, o Iesu, na tauaveina lona satauro, sa taitai atu i le ala matagofie i se nofoaga o le tanuga, o ulupoo, o le oti. E toafa fitafita Roma na o atu i ona autafa”—e faamaasiasi o ia ma faamata’u i isi. O se faailoga, sa tautau i le ua o le Faaola pe tauaveina e se fitafita, ma tautino atu Lana solitulafono sa i ai.

O Iesu, ua faatigainaina ma le le moe, sa le mafuatia le faavaivaia faaletino. O le mamafa o le satauro sa le na o le pau lea o Lana avega—na faatusaina i le faatumutumuga o le tiga i Ketesemane, faalataina, sauaina faalealofa, ma le faatauemu. O le vaivai ma le tiga faalemafaufau na uma ai Lona malosi faaletino.

Sa vaivai ma tautevateva o Ia. Ona le mafai lea ona toe faaauau atu o Ia.

I lena taimi, sa uunai faamalosi atu ai e fitafita le to’a ia Simona i le galuega. Sa le o ia o se vaega o le solo, ae sa pueina o ia ma faamalosia e amo le satauro o Iesu.

Faalumaina ma le Mamalu

O le amoina o le satauro o se tagata ta’usalaina o se faailoga lea o le faalumaina. E leai se Roma po o se Iutaia e ofo atu mo se galuega faapena. O faamatalaga uma o le faasatauroga na mamanuina ia faalumaluma. Ae na tauaveina e Simona le faamaasiasiga.

Faamata o a ni ona lagona sa i ai? Fenumia’i? Agaalofa? Pe na ia vaai i le pulatoa a le Faaola? Pe na ia lagonaina le paia o lena taimi?

I lena savaliga puupuu i Kolokota, sa laa atu ai Simona i le totonugalemu o le Puapuaga. Mata e mafai ona ia maua se aafiaga faapena ae le suia ai? Atonu na sau o ia i Ierusalema o se tagata malaga ae na alu ese o se molimau.

Sa latalata Simona i le Tamai Mamoe a le Atua i Ona toe itula. Sa pa’i o ia i le laau o le satauro. O mea na tutupu i lena aso semanu e matua moni lava ia te ia a o ia fesoasoani e amoina lena satauro agai atu i Kalevaria.

O i tatou foi, ua valaauina e tauave avega a le tasi ma le isi. Ua talosagaina foi i tatou e “ave [o tatou] satauro” ma savavali faatasi ma le Faaola (tagai Mataio 16:24), e tusa lava pe faigata le ala ma mamafa le avega. Ma e pei foi o Simona, atonu tatou te iloa ai o avega tatou te tauaveina i le usiusitai e avea ma mamalu silisili o o tatou olaga.

“Ina ia avea ma soo o Iesu Keriso, e tatau i le tagata ona amoina i nisi taimi se avega—o oe lava po o se isi tagata—ma alu i le mea o loo manaomia ai le ositaulaga ma e le maalofia ai mafatiaga,” o le saunoaga lea a Peresitene Jeffrey R. Holland, Peresitene o le Korama a Aposetolo e Toasefululua. Sa ia faaopoopo e faapea, “A o tatou aveina o tatou satauro ma mulimuli ia te Ia, semanu e matautia naua pe ana le avea le mamafa o tatou luitau ma mea ua atili ai ona tatou amanaia ma gauai atu i avega e tauamo e isi.”