Nalimpyohan pinaagi sa Kahayag

Paghulagway pinaagi ni Elia Sampò, dili mahimong pakopyahan

Kon mopahigayon og mga ordinansa sa templo, ang mga temple worker morekord sa matag usa ug markahan og tsek gamit ang pula nga lapis diha sa kard sa ngalan. Usa ka adlaw, human sa pagpahigayon sa ordinansa, gibutang nako ang lapis sa sulod sa bulsa sa akong puti nga suit jacket. Sa pagbalik sa opisina, akong gikuha ang lapis.

Unya, sa dihang akong gilabhan ang jacket, namansahan kini og pula! Akong nadiskobrehan nga ang tumoy sa pula nga lapis naputol diha sa bulsa sa jacket. Wala ko magtuo nga ang gamayng piraso sa lead makahimo og ingon niana nga kadaot.

Giingnan ko sa akong asawa nga ang jacket naguba, apan nakadesisyon ko nga sulayan ang pagbutang og bleach sa pula nga mansa. Apan sa dihang gikuha nako ang jacket gikan sa bleach solution, nahimong yellow ang kolor niini.

Nag-ampo ko, “Langitnong Amahan, unsay akong buhaton karon?” Sa akong hunahuna, nakita nako ang napug-aw nga pula nga traktor sa akong uyoan, nga anaa ra gibuwad sa adlaw. Nahinumdom ko nga ang adlaw mopug-aw kasagaran sa mga kolor. Mao nga, akong gibutang ang akong jacket sa sanag sa adlaw, mainampingong gibantang ang nag-yellow nga bahin ngadto hayag. Makapahingangha, human sa daghang mga adlaw, nahimo kining puti pag-usab.

Ang adlaw, nga naghayag sa kangitngit, mihimo sa akong suit jacket nga maputi pag-usab. Ang Anak, kinsa naghayag sa kalibotan (tan-awa sa Doktrina ug mga Pakigsaad 88:6–13; Juan 8:12), makalimpyo nato pag-usab. Sama sa gipahayag sa Ginoo pinaagi ni Isaias, “Bisag unsa ka pula ang inyong sala, maputi kini kaayo; bisan pa kinig dagtom-pula, maputi kini sama sa balhibo sa karnero” (Isaias 1:18).

Si Alma mipasabot niini nga baroganan: “Walay usa ka tawo nga maluwas gawas kon ang iyang mga sapot mahugasan nga puti; oo, ang iyang mga sapot kinahanglan nga mahugasan hangtod nga malimpyo kini gikan sa tanan nga mansa, pinaagi sa dugo kaniya nga gipamulong sa atong mga amahan, kinsa moanhi aron sa pagtubos sa iyang katawhan gikan sa ilang mga sala” (Alma 5:21).

Kita adunay balaanong kahigayonan sa paghinulsol ug mahimong limpyo pinaagi sa Pag-ula ni Jesukristo. Kon kita maghinulsol, Iyang tangtangon ang mansa sa sala o bisan unsa nga butang nga makababag sa atong espirituhanong paglambo.

Ang Pasko sa Pagkabanhaw usa ka espesyal nga oportunidad sa paghinumdom sa makalimpyo nga gahom ni Kristo nga moimpluwensya sa atong kinabuhi. Ingon nga ang adlaw nakapaputi pag-usab sa akong suit jacket, atong saulogon ang kamatuoran nga ang maulaong sakripisyo sa Anak sa Dios mohimo sa atong mga sala nga maputi sama sa balhibo sa karnero.