Simon nga taga-Cirene, Kinsa Mipas-an sa Krus

Si Simon wala moboluntaryo. Siya, sa tanang asoy, taga-gawas. Ug sa gihapon, siya gipili. Diha sa kagubot sa prosesyon sa Paglansang sa Krus, sa dihang si Jesus nadagma tungod sa kabug-at sa krus, anaa si Simon.

Gamay ra ang atong nahibaloan bahin ni Simon, apan nindot hunahunaon nga samtang ang langit nagpasiugda sa mga detalye sa mahinungdanon sa kahangtoran nga Pag-ula ni Jesukristo, ang usa ka tawo nga tingali “kauban sa mga tumutuo” napili sa paglakaw tupad sa Manluluwas sa Iyang gutlo sa panginahanglan.

Sumala sa Romano nga kustombre, ang usa ka gihukman nga tawo mao ang mopas-an sa iyang krus ngadto sa dapit nga patyanan. Ang krus—sapnot nga pagkahimo gikan sa komon nga kahoy, tingali gikan sa oliba o sikomoro—wala gigama sa mainampingong paagi apan sa kabangis. Usa kini ka himan sa kaulawan ug kamatayon, gihimo og dalidali, igo lang nga makasuporta sa gibug-aton sa pag-antos sa tawo.

“Ug mao nga si Jesus, nga nagpas-an sa iyang krus, gidala ngadto sa makasubo nga panaw paingon sa dapit sa lubnganan, sa kalabera, sa kamatayon. Upat ka Romano nga mga sundalo mitupad Kaniya”—sa pagbiaybiay niya ug sa pagpanghadlok sa uban. Usa ka karatula, gibitay sa liog sa Manluluwas o gidala sa usa ka sundalo, nagpahayag sa gituohan nga Iyang sala.

Si Jesus, gikastigo na ug walay tulog, luya na gayod kaayo sa pisikal. Ang kabug-at sa krus dili lamang mao ang Iyang gipas-an—nagrepresentar kini sa kataposang ang-ang sa iyang paghingutas didto sa Getsemani, pagluib, kapintas, ug pagyubit. Ang kakapoy ug mental nga kasakit nakahurot sa kalig-on sa Iyang lawas.

Siya naluya ug nadagma. Unya dili na Siya makapadayon sa paglakaw.

Nianang higayona, ang walay pailob nga mga sundalo mitukmod ni Simon sa pagserbisyo. Dili siya apil sa nagprosesyon, apan gibira siya ug gipugos sa pagpas-an sa krus ni Jesus.

Ang pagpas-an sa krus sa gihukman nga tawo usa ka timaan sa pagpakaulaw. Walay Romano o Judeo ang moboluntaryo alang niana nga buluhaton. Ang matag detalye sa paglansang sa krus gihimo aron sa pagpakaulaw. Apan si Simon midawat sa pagpakaulaw.

Unsa kaha ang iyang gibatit? Kalibog? Kaluoy? Nagkatinan-away ba sila sa Manluluwas? Gibati ba niya ang kasagrado niana nga gutlo?

Nianang mubo nga paglakaw paingon sa Golgota, si Simon nakasulod sa labing mahinungdanon sa Pasyon. Nakabaton ba siya niana nga kasinatian ug wala mausab niini? Tingali miadto siya sa Jerusalem isip usa ka magpapanaw apan mibiya isip usa ka saksi.

Si Simon anaa sa duol sa Kordero sa Dios sa Iyang kataposang mga takna. Nakahikap siya sa kahoy nga krus. Ang mga panghitabo niana nga adlaw tingali tinuod kaayo alang niya kay siya mitabang sa pagpas-an sa krus paingon sa Kalbaryo.

Kita, usab, gitawag aron sa pagpas-an sa mga palas-anon sa usag usa. Kita, usab, gihangyo nga “pas-anon ang [atong] krus” ug molakaw uban sa Manluluwas (tan-awa sa Mateo 16:24), bisan kon lisod ang dalan ug bug-at ang palas-anon. Ug sama ni Simon, unta atong makita nga ang mga palas-anon nga atong gipas-an diha sa pagkamasulundon mahimong labing dako nga pasidungog sa atong kinabuhi.

“Aron mahimong usa ka sumusunod ni Jesukristo, ang tawo usahay gikinahanglan nga mopas-an og palas-onon—imong kaugalingon o sa uban—ug moadto kon diin ang sakripisyo gikinahanglan ug ang pag-antos dili kalikayan,” miingon si Presidente Jeffrey R. Holland, Presidente sa Korum sa Napulog Duha ka Apostoles. Siya midugang, “Samtang kita mopas-an sa atong mga krus ug mosunod Kaniya, mahimong trahedya tinuod kon ang gibug-aton sa atong mga hagit dili makahimo kanatong mas masinabtanon ug mabination sa mga kalisod nga gipas-an sa uban.”