“Magpraktis og Mas Dakong Gugma Niining Pasko sa Pagkabanhaw ug sa Matag Adlaw,” Liahona, Abr. 2026.
Kababayen-an sa Pakigsaad
Magpraktis og Mas Dakong Gugma Niining Pasko sa Pagkabanhaw ug sa Matag Adlaw
Ang kinabuhi ug maulaong sakripisyo ni Jesukristo nahimong labing mahinungdanong simbolo sa walay kinutoban nga gugma Niya ug sa atong Amahan sa Langit alang sa matag usa kanato.
Christ and the Children [Si Kristo ug ang mga Bata], ni Minerva Teichert
“Ang labing dakong gugma nga ikahatag sa usa ka tawo ngadto sa iyang mga higala mao ang paghatag sa kaugalingon niyang kinabuhi alang kanila” (Juan 15:13). Walay tawo nga mipakita og mas dakong gugma alang sa Iyang “mga higala”—mga anak nga babaye ug mga anak nga lalaki sa Dios—kaysa atong minahal nga Manluluwas, si Jesukristo. Walay mas halangdong ehemplo sa mas dakong gugma sa tibuok kalibotan. Ug kanang Iyang mas dakong gugma alang sa Iyang Amahan sa Langit ug alang sa matag usa kanato ang nakapahimo Niya sa paglahutay sa dili mahulagway nga pag-antos ug kamatayon ug sa ingon niana matuman ang walay kinutoban nga Pag-ula. Boluntaryo Niyang gitugyan ang Iyang kinabuhi alang sa matag usa kanato ug, ang pagbuhat sa ingon, nagpakita og walay kinutobang gugma.
Apan dili lamang sa Getsemani ug sa Kalbaryo nga ang atong Manluluwas mipakita nianang mas dakong gugma. Si Elder Tad R. Callister (1945–2025), nga nagserbisyo isip Kinatibuk-ang Awtoridad nga Seventy ug isip Kinatibuk-ang Presidente sa Sunday School, mitudlo: “Ang gugma sa Manluluwas dili usa ka gugma nga alang lamang sa mga matarong; dili kini matang sa gugma nga dili klaro; ni kini gipakita sa puno sa drama nga buhat sa pagsakripisyo ug wala nay lain pa. Sa sukwahi nga paagi, kini mao ang matag adlaw, matag oras, gani matag gutlo nga gugma! Gugma kini nga nagagikan sukad pa sa kinabuhi sa wala pa dinhi sa yuta ngadto sa kahangtoran. … Gugma kini nga mipanalangin sa gagmayng kabataan, miayo sa mga masakiton, ug mihatag og paglaom ngadto sa mga walay paglaom. Gugma kini nga gihatag ngadto sa matag indibidwal sa iyang pagka-siya ug nakatabang nila nga molambo sa espirituwal o sa moral nga paagi. Ang gugma gipakita sa matag aspeto sa iyang mortal nga kinabuhi. Ang gugma midagayday gikan sa matag lungag sa panit, matag hunahuna, matag buhat. Ingon sa natural ug makanunayon nga paagi samtang kita nagtinguha og hangin, siya nagtinguha sa pagpanalangin. Balikbalik niadtong mga gutlo sa pisikal nga kakutas ug sa dinalian nga ‘mga buluhaton siya anaa didto alang sa usa ka tawo—sa pagpaminaw, sa paghigugma, ug sa pagpanalangin. Ang Iyang tibuok kinabuhi usa ka tinigom nga mga buhat sa gugma, gitapos sa labing mahinungdanon sa tanan—iyang maulaong sakripisyo.”
Ang Halangdong Ehemplo
Si Jesukristo mao ang atong labing halangdon nga ehemplo sa mas dako nga gugma. Siya mitudlo nato pinaagi sa Iyang mga pulong ug mga buhat kon unsaon pagsunod sa Iyang ehemplo ug mahimong Iyang tinuod nga mga disipulo.
“Ingon nga ako nahigugma kaninyo, paghigugmaay usab kamo.
“Kon maghigugmaay kamo, mahibalo ang tanan nga kamo akong mga tinun-an” (Juan 13:34–35).
Kita adunay oportunidad sa matag adlaw sa atong kinabuhi nga mosunod sa ehemplo sa Manluluwas sa mas dakong gugma sa paagi sa atong pakighinabi ug pagtratar niadtong anaa sa atong palibot, lakip na niadtong kinsa tingali dili mabination nato. Sa atong pagdala sa Iyang ngalan ngari kanato ug sa pagsunod sa Iyang ehemplo sa pagtratar sa uban inubanan sa mas dakong gugma, atong mabati ang Iyang mas dakong gugma alang nato, nga mobayaw nato ug mousab nato aron sa kadugayan mahisama Kaniya.
Pasalamat alang sa Manluluwas
Hinaot nga atong handomon ang Pasko sa Pagkabanhaw sa matag Dominggo samtang maghinumdom sa atong minahal nga Manluluwas ug Manunubos—sa Iyang kinabuhi ug sa Iyang maulaong sakripisyo alang nato—pinaagi sa pag-andam ug pag-ambit sa mga simbolo niana nga sakripisyo pinaagi sa ordinansa sa sakramento. Hinaot nga atong mapakita Kaniya ang atong dakong pasalamat alang sa Iyang mahigugmaong sakripisyo alang nato pinaagi sa pagsunod sa Iyang ehemplo sa paghigugma ug pagpangalagad sa uban, bisan unsa pa ka dili komportable. Ug sama sa Iyang gihimo, tinguhaon nato kanunay ang pagbuhat sa kabubut-on sa atong Amahan (tan-awa sa Juan 6:38).
Mapasalamaton kaayo ko sa akong Manluluwas nga si Jesukristo. Ang Iyang kinabuhi ug maulaong sakripisyo nahimong ang labing dako nga simbolo sa walay kinutoban nga gugma Niya ug sa atong Amahan sa Langit alang sa matag usa kanato, uban sa makita nga mga simbolo niana nga gugma ug sakripisyo—ang mga timaan diha sa mga kamot, mga tiil, ug kilid sa Manluluwas—nagpabilin bisan human sa Iyang Pagkabanhaw (tan-awa Isaias 49:15–16). “Walay bisan kinsa nga may gugma nga labaw pa niini.” Hinaot nga atong ipakita ang mas dakong gugma alang Kaniya niining panahon sa Pasko sa Pagkabanhaw, ug sa kanunay, pinaagi sa pagpakita og mas dakong gugma alang sa uban (tan-awa sa Mateo 25:40).