Ang Mensahe sa Pasko sa Pagkabanhaw sa Daang Tugon

Ang mga tumutuo sa panahon sa Bag-ong Tugon aduna gihapon sa samang teksto sa Daang Tugon nga anaa nato karon. Pinaagi sa mga imahe, mga matang, ug mga panig-ingnan, nagtudlo kini kanato og mahinungdanong kamatuoran ug nagpunting kanato ngadto sa Manluluwas. Pananglitan, ang panagna ni Isaias mahitungod sa Nag-antos nga Sulugoon (tan-awa sa Isaias 53) lisod kaayong ipasabot isip bisan unsa nga butang kondili usa ka panagna bahin ni Jesus. Sa dihang ang disipulo nga si Felipe nakahimamat og usa ka tawo nga taga-Etiopia nga nagbasa niana nga teksto, si Felipe nangutana:

“Nakasabot ka ba sa imong gibasa?

“Ug siya mitubag, “Unsaon nako pagkasabot gawas kon adunay magtudlo kanako? …

“Ang bahin sa kasulatan nga iyang gibasa mao kini: “Sama sa karnero nga gidala ngadto sa ihawan, o sa nating karnero nga hilom sa atubangan sa nagputol sa iyang buhok, wala usab niya bukha ang iyang ba-ba.”

Ang taga-Etiopia nangutana:

“Sultihi ako kon kinsa ang gihisgotan sa propeta niining bahina sa kasulatan. Ang iya bang kaugalingon o lain ba?

“Busa gisaysayan siya ni Felipe sa maayong balita mahitungod kang Jesus sugod gayod niining bahina sa kasulatan.” (Mga Buhat 8:30–32, 34–35).

Gibasa ni Abinadi ang mao gihapon nga teksto ni Isaias ngadto sa bangis nga mga tigpaminaw nga dili makakita ni Jesus diha sa Daang Tugon. Human sa pagbasa niini, siya mitapos, “Ang Dios mismo sa iyang kaugalingon manaog taliwala sa katawhan, ug motubos sa iyang katawhan.” (Mosiah 15:1).

Ang mensahe ni Kristo sa pagkatinuod anaa gayod sa Daang Tugon. Niining nindot nga basahon sa kasulatan, ang pagtuo ug paghinulsol mahinungdanon sa pagkatawo ug kinaiya sa Dios sa Israel. Ang Iyang kapasidad sa pagluwas mao ang usa sa labing halangdon nga kinaiya sa Iyang kabalaan, ug ang pagtuo diha sa Iyang abilidad sa pagluwas sa Iyang katawhan gikan sa matag kaaway nagtudlo og pagtuo diha sa Iyang kapasidad sa pagluwas gikan sa labing dagko nga mga kaaway—sala ug kamatayon. Ang kamainantoson ug kaandam ni Jehova sa pagdawat sa naghinulsol nga mga makasasala nagpakita sa Iyang kinaiya. Ang paghinulsol nahimong posible tungod kay ang Iyang bukton sa kaluoy gituyhad gayod ngadto niadtong kinsa mibiya sa ilang mga sala ug miduol ngadto Kaniya. Sa ingon niana ang mga tigsimba nga mga Israelita nga wala makaila ni Jesukristo nakasabot sa pagtuo ug paghinulsol ug nagtan-aw niini isip mga pundasyon sa ilang relasyon ngadto sa usa ka maluluy-on nga Dios—bisan kon sila wala masayod sa kinatibuk-ang mga detalye sa ilang kaluwasan.

Ang pagsimba diha sa templo sa Israel nagtudlo sa Kristiyano nga ebanghelyo, tungod kay ang mahinungdanong pag-ula ug nagsunod nga kapasayloan mao ang labing sentro sa mga sakripisyo diha sa templo. Ang karaang matinud-anon nga mga Israelita nasayod nga dili sila makaluwas sa ilang kaugalingon gikan sa sala apan nagkinahanglan nga mosalig sa tabang sa Dios sa pagluwas nila sa espirituwal nga paagi. Si Jesus, Iyang mga propeta sa Basahon ni Mormon, ug ang mga magsusulat sa Bag-ong Tugon mipadayag nga si Kristo mismo mao ang kordero sa Dios nga isakripisyo, apan ang mahinungdanong mga baroganan gipahibalo na diha sa balaod ni Moises. Ug ang Mesiyas sa Israel mao si Jehova mismo, usa ka butang nga dili kanunay klaro diha sa Daang Tugon apan nasabtan sa mga sumusunod ni Jesus diha sa Basahon ni Mormon ug sa Bag-ong Tugon. Ang hanglangdong mga tawo nga nagpaabot sa usa ka moluwas nga Mesiyas nagpaabot sa pag-anhi ni Jesus, ug daghan ang nakaila Kaniya sa dihang Siya mianhi.

Pinaagi sa pagtudlo sa gugma ug kaluoy ni Jehova ug paghatag og pagpamatuod bahin Kaniya, ang tanang propeta sa Daang tugon nagpamatuod ni Kristo, sama sa giingon sa Basahon ni Mormon nga gihimo nila kini (tan-awa sa Jacob 4:4–5; 7:11). Kadtong nakakita pinaagi sa mata sa pagtuo nagtan-aw ni Jehova isip mao ang sentro tanan nilang matarong nga mga tinguha ug mga debosyon. Kadtong natudloan, sama sa lalaki nga taga-Etiopia, o kansang mga mata naabli, sama sa mga disipulo nga anaa sa dalan paingon sa Emmaus, nianang higayona nakasabot gayod nga si Jesus sa Nazaret mao ang ilang Mesiyas ug ang walay lama nga halad sa Dios alang kanila. Ang usa niana nga disipulo, si Juan Bautista, nakahimo sa pagpamatuod sa pagkakita niya ni Jesus, “Tan-awa mao kana ang Kordero sa Dios, ang nagakuha sa sala sa kalibotan” (Juan 1:29).