Ilabi na alang sa mga Bag-ong Minyo
Ang Garbo Ba Nagpugong Kanimo sa Pagkahimong Mahigugmaon nga Kapikas?
Ang garbo mahimong makita sa maliputon nga mga paagi sa inyong kaminyoon, apan adunay yanong mga butang nga imong mabuhat aron malikayan kining makapasakit sa inyong relasyon.
"Usa ako ka talagsaong asawa nga nahigugma nga walay kondisyon."
Hapit kada adlaw ko nga magsulat niini nga kapahayag. Usa kini ka butang nga gusto ko nga mamahimo.
Mao nga sa dihang ang akong bana mihatag sa iyang pagpamatuod sa Dominggo sa puasa human sa among unang anibersaryo ug mahigugmaong miingon, “Lisod ang kaminyoon,” naulaw ko.
Masabtan gyod nga ang kaminyoon dili sayon sa tanang panahon. Naglakip kini og duha ka dili perpekto nga mga tawo nga naghiusa sa usa ka matahom ug walay kataposan nga panaghiusa ug kalit nga nag-atubang sa usag usa nga mga lahi og kinaiya ug batasan.
Dili pa kami dugay nga naminyo sa akong bana, apan atol niining sayo nga panahon sa pagmaneho sa kinabuhi nga magkauban, kanunay akong gipahinumdoman sa tambag sa Dios ngadto kang Emma Smith: “Ipadayon ang espiritu sa kaaghop, ug pagmatngon sa garbo. Himoa nga ang imong kalag mahimuot sa imong bana, ug sa himaya nga moabot kaniya” (Doktrina ug mga Pakigsaad 25:14).
Ayaw Tugoti nga Moabot ang Garbo Taliwala Kaninyo
Si Presidente Ezra Taft Benson (1899–1994) mitudlo nga ang garbo mahimong makita isip “paghunahuna lang sa kaugalingon, pagkamapahitas-on, pagkahambogero, pagkaarogante, o pagkatigpalabaw.” Apan ang kinauyokan sa sala mao ang “pagdumot sa Dios ug pagdumot ngadto sa atong isigkatawo. Ang pagdumot nagpasabot og ‘kalagot sa, masukolon, o matang sa pagsupak.”
Kining kahulogan sa garbo—bisan og dili ko gusto moangkon niini—nakapaamgo nako nga ako garboso, kon hunahunaon nga kanunay akong supak sa akong bana. Bisan sa gagmay nga mga desisyon mahimong mosangpot sa mainit nga mga diskusyon nga sa kataposan makapasakit sa among pagbati.
Pananglitan, nakahunahuna ko sa akong kaugalingon, “Gikapoy ko, mao nga siya na lang ang magluto sa panihapon karong gabii,” nga wala gikonsiderar nga ang akong bana lagmit parehas ka kapoy—o mas kapoy pa—kay kanako. Kini nga panghunahuna kasagaran mosangpot sa kontest nga “kinsa ang mas gikapoy”, nga makapalagot lang kanamong duha—ug gigutom gihapon.
Gihigugma gyod nako ang akong bana, apan tungod kay tawo ra man mi, walay usa namo nga perpekto. Pareho ming nagbuhat sa among labing maayo, pero adunay mga higayon nga among gitugotan ang garbo nga mopataliwala kanamo.
Padayon diha sa Espiritu sa Pagkamapainubsanon
Busa unsaon nato pagbuntog ang garbo?
Sa tambag sa Dios ngadto kang Emma Smith, gisugyot Niya nga ang tambal sa garbo mao ang “espiritu sa kaaghop.”
Si Elder David A. Bednar sa Korum sa Napulog Duha ka Apostoles mitudlo, “Ang kaaghop usa ka hiyas nga mapalambo pinaagi sa tinguha, sa matarong nga paggamit sa moral nga kabubut-on, ug sa pagtinguha kanunay nga magbaton sa kapasayloan sa atong mga sala.”
Sa usa ka kaminyoon, ang kaaghop mahimong sama sa kalma nga pagpaminaw sa istorya sa usag-usa, pag-angkon ug pagpangayo dayon og pasaylo kon nakahimo og sayop, mahinay sa pagkasuko, ug pagkadali mopasaylo.
Usa ka butang nga nakatabang sa akong bana ug kanako atol sa mga panaglalis nga panag-istoryahanay mao ang paggahin og panahon sa pagkalma ug pagtugot sa Espiritu nga mouban kanamo. Ang pagpaubos sa among kaugalingon ug pagbuhat sa among labing maayo aron magtinabangay—imbis nga magkontrahanay—makahimo og dakong kalainan.
Himoa Nga Ang Imong Kalag Mahimuot sa Imong Kapikas
Usa ka Dominggo, usa ka sakop sa among kapangulohan sa stake ug ang iyang asawa nagtudlo kanamo mahitungod sa “pagkontrolar sa kagubot” sa among mga kaminyoon. Usa sa mga butang nga ilang giawhag kanamo nga buhaton mao ang pagpahayag og gugma alang sa usag usa matag adlaw.
Sa susamang paagi, si Presidente Russell M. Nelson (1924–2025) mitambag, “‘Kon adunay mga butang nga mahiyason, matahom, o maayo og dungog o dalaygon’ [Mga Artikulo sa Hugot nga Pagtuo 1:13] nga atong masulti mahitungod sa laing tawo—sa dayag o sa tago—kana mao unta ang atong sumbanan sa komunikasyon.”
Kini magamit ilabi na sa relasyon sa kaminyoon.
Hatag og atensiyon sa mga butang nga nahitabo sa imong kapikas, ug mahimo kang ilang labing dako nga tigpaluyo. Paglipay diha kanila ug sa ilang mga nahimo. Sulti og maayo bahin kanila sa ilang atubangan ug ngadto sa uban. Basin imong makaplagan nga kining gagmay nga mga aksiyon mosangpot sa mas dakong gugma!
Karon, walay adlaw nga molabay nga dili ko mosulti sa akong bana nga gihigugma ko siya, ug mao usab ang iyang gibuhat ngari kanako. Kon mas kanunay kaming mopahayag sa among gugma sa usag usa, mas minos ang panagbingkil ug garbo sa among relasyon.
Salig ni Jesukristo
Sa imong panaw sa pagbuntog sa garbo ug mahimong labing maayong bana o asawa nga ikaw mamahimo, salig kang Jesukristo. Gamita ang gasa sa Iyang Pag-ula aron sa pagtabang kanimo samtang ikaw maghinulsol ug maningkamot sa pag-ugmad og dugang nga gugma sa inyong kaminyoon.
Sama sa gitudlo ni Mormon, “Ang kapasayloan sa mga sala magdala og kaaghop, ug kamapainubsanon sa kasingkasing; ug tungod sa kaaghop ug kamapainubsanon sa kasingkasing moabot ang pagduaw sa Espiritu Santo, kini nga Maghuhupay mopuno sa paglaom ug hingpit nga gugma” (Moroni 8:26).).
Ang akong pagsalig kang Kristo nakahimo kanako sa pagsulti nga mas buotan, daling mopasaylo, ug mohigugma og maayo sa akong relasyon sa akong bana.
Ang pagtukod og usa ka malungtaron ug mahigugmaon nga kaminyoon nagkinahanglan og paningkamot ug panahon. Daghan pa kog angay makat-onan. Apan nasayod ko nga uban ni Kristo, mahimo akong mahigugmaon nga asawa nga akong gusto!