Ang Basahon ni Mormon ug ang Milagro sa Pasko sa Pagkabanhaw

Diha sa 3 Nephi 11, atong mabasa nga ang mga tawo nakadungog og usa ka tingog gikan sa langit. Sa sinugdanan wala sila makasabot niini, apan human nga ilang gihatag ang ilang tibuok nga pagtagad, sa kataposan ilang nailhan ang tingog sa Dios nga namahayag, “Tan-awa ang akong Hinigugmang Anak” (bersikulo 7). Ang Langitnong Amahan wala lamang mopaila ni Jesukristo; Siya nagpamatuod, ingon nga Siya lamang ang makahimo, bahin sa kabalaan ni Kristo.

Ang Manluluwas mao ang Unang Natawo sa Dios sa espiritu ug ang Bugtong nga Anak diha sa unod (tan-awa sa Doktrina ug mga Pakigsaad 93:21; Juan 3:16). Mao kini ang usa sa importante nga mga rason kon nganong makahimo Siya sa Pag-ula nga nakahimong posible sa atong kausaban sa kahiladman. Kon wala ang Pag-ula ni Jesukristo, kita awtomatik nga ipanghimaraot tungod sa atong mga sayop ug mga sala. Pinaagi sa Iyang Pag-ula, kita dili lamang malimpyohan gikan niini apan makakat-on usab gikan niini. Tungod kay si Kristo balaan, Siya makatanyag nato og grasya—balaanong tabang ug pagtudlo—nga makatabang nato nga makab-ot ang atong mahangtorong potensiyal.

Ang kausaban sa kahiladman nagsugod sa higayon nga kita nagpakita og pagtuo diha ni Jesukristo ug sa Iyang gitugotan nga mga sulugoon. Usa sa unang mga butang nga gihimo ni Kristo sa dihang nagpakita Siya sa karaang Amerika mao ang pagdapit sa mga tawo, sa tinagsa-tagsa, nga mahimong mga saksi sa Iyang Pagkabanhaw. Matag usa nila nakakita ug nakahikap sa mga timaan sa Iyang maulaong sakripisyo. (Tan-awa sa 3 Nephi 11:14–15.) Ug unya sa kalipay sila misinggit, “Hosanna!” (bersikulo 17). Usa ka hubad niini nga pulong mao “Luwasa, palihog.”

Ang Manluluwas mitubag sa ilang pangamuyo alang sa kaluwasan pinaagi sa pagtawag ni Nephi nga paduolon sa atubangan ug sa paghatag niya og gahom ug awtoridad sa pagbunyag (tan-awa sa bersikulo 21). Niini nga paagi, Siya mitudlo nga ang kaluwasan moabot pinaagi sa mga ordinansa nga gipahigayon sa tukma nga awtoridad sa pagkapari.

Tingali mangutana kamo, “Apan di ba ang mga tawo sa Amerika aduna nay pagkapari? Di ba nagpahigayon na sila og awtorisado nga mga pagbunyag?” (Tan-awa sa Mosiah 18:8–17.) Oo, apan murag si Jesus adunay importante nga katuyoan sa paghatag niana nga awtoridad atubangan sa kadaghanan ngadto ni Nephi ug sa ubang mga disipulo. Tingali gusto Niya nga maklaro sa atubangan sa tanan nga kini nga mga indibidwal adunay awtoridad sa pagrepresentar Kaniya ug sa pagpangalagad sa mga ordinansa sa kaluwasan ug kahimayaan kon Siya mawala na. Tingali importante kaayo kini tungod kay adunay pipila ka panagbingkil mahitungod sa husto nga paagi sa pagbunyag (tan-awa sa 3 Nephi 11:28).

Pinaagi sa mga ordinansa sa pagkapari ug mga paikigsaad, ang Langitnong Amahan mihimo nga ang mga panalangin mapuslan sa Iyang tanang anak. Kini nga mga ordinansa makatabang sa mga tawo dili lamang sa pagbuntog sa kalibotan apan usab sa pagkahimong mas mahisama sa Langitnong Amahan ug ni Jesukristo.

Sunod, ang kausaban sa kahiladman nagdepende sa atong paggamit sa mas labaw nga kaabunda sa gahom ni Kristo. Didto sa mga Amerika, ang Manluluwas mitudlo sa mga tawo sa Iyang doktrina, labi na sa doktrina nga gihatag ngadto Kaniya gikan sa Langitnong Amahan (tan-awa sa 3 Nephi 11:31–32). Naglakip kini sa pagtuo diha ni Ginoong Jesukristo, paghinulsol, bunyag, ug pagadawat sa Espiritu Santo (tan-awa sa mga bersikulo 32–35). Kon kita natukod ibabaw niini nga pundasyon, kita makalahutay ngadto sa kataposan, “ug ang mga ganghaan sa impyerno dili modaog batok [kanato]” (bersikulo 39).

Pinaagi sa doktrina ni Kristo, makagamit kita sa Iyang gahom, ug Siya makausab sa atong mga kinaiya. Kon walay pagtuo ug paghinulsol,adunay gamay lamang nga tinguha sa pag-usab. Kon walay bunyag ug gasa sa Espiritu Santo, limitado lamang ang gahom sa pag-usab. Kon wala ang baroganan sa paglahutay hangtod sa kataposan, ang kausaban sa atong kahiladman nga mga kinaiya hangtod sa kahangtoran mahimong taphaw ug temporaryo lamang, walay panahon nga matisok sa atong mga kasingkasing ug mahimong kabahin kon si kinsa kita.

Bisan unsa pa ka dako sa gugma sa Langitnong Amahan ug ni Jesukristo kanato ug gusto nga mopanalangin ug motabang nato, Sila dili mopugos kanato nga mag-usab. Ang pagsunod sa doktrina ni Kristo makita kon giunsa nato paggamit ang atong moral nga kabubut-on sa pagdapit Kanila nga moapil uban kanato sa paghimo nga ang Ilang balaanong nga mga kinaiya mabatonan nato.

Sa dihang si Jesukristo mibisita sa mga tawo sa karaang Amerika, Siya mihatag og diskurso sama sa Wali sa Bukid nga narekord diha sa Biblia apan uban sa pipila ka dagkong mga kalainan. Pananglitan, ang Basahon ni Mormon naglakip sa dugang nga mga pagtulun-an bahin sa Manluluwas nga wala sa atong kasamtangang Biblia. Kini nga mga pagtulun-an nagtutok sa unang mga baroganan ug mga ordinansa sa ebanghelyo: pagtuo diha ni Jesukristo, paghinulsol, bunyag, ug pagdawat sa Espiritu Santo. (Tan-awa sa 3 Nephi 12:1–2.) Nakatabang kini sa paghatag og konteksto sa pagtan-aw sa mga kabulahanan nga nagsunod isip usa ka butang nga labaw pa kaysa koleksiyon sa maayo nga tambag.

Si Presidente Harold B. Lee (1899–1973) mitawag sa Wali sa Bukid, nga gisugdan sa mga Kabulahanan, “usa ka pagpadayag sa kaugalingong kinaiya ni [Kristo] … o sa unsay giingon nga ‘istorya sa kinabuhi.’” Kini ang pagdapit ni Kristo nga moapil uban Kaniya sa proseso sa pagdawat sa Iyang diosnong mga kinaiya. Sa Griyego, ang pulong bulahan nagpasabot nga “swerte” o “malipayon.” Hinuon, kon ang koneksiyon sa mga Kabulahanan ngadto sa Mga Salmo ikonsiderar, ang pulong mahimo usab nga magsugyot og “balaan” o “nahimaya.”

Human sa pagpili sa pagtuo diha ni Jesukristo ug paghimo sa mga pakigsaad, “bulahan ang mga kabos sa espiritu nga moduol [kang Kristo]” (3 Nephi 12:3). Kon kita kabos sa espiritu, kita mahibalo nga kita taas pa og padulngan hangtod nga kita mahimong sama sa Dios, ug kita mopili ni Jesukristo isip atong Ehemplo ug Hingpit nga Magtutudlo nga motabang nato nga maabot didto. Kon kita masayop, kita magbangotan tungod sa atong mga sala ug mopili nga maghinulsol (tan-awa sa bersikulo 4). Kita mopakita og kaaghop samtang kita magtigom kanunay aron magpaduol ngadto Kaniya pinaagi sa pag-ambit sa sakramento. Ang sakramento makatabang nato nga malig-on ang atong relasyon sa pakigsaad uban sa Langitnong Amahan ug ni Jesukristo, padayon sa paghangop sa Ilang kalig-on ug impluwensya ngari sa atong kinabuhi. (Tan-awa bersikulo 5.)

Sunod, ang Manluluwas mitudlo, “Bulahan silang tanan nga gigutom ug giuhaw sa pagkamatarong, kay sila mapuno sa Espiritu Santo” (bersikulo 6). Ang Espiritu Santo mao ang tigbalaan, “ang mensahero sa grasya diin ang dugo ni Kristo magamit aron sa pagkuha sa atong mga sala ug mobalaan nato (tan-awa sa 2 Nephi 31:17).” Uban sa Iyang kanunay nga pakig-uban, kita mahimong maluluy-on ug putli ang kasingkasing sama ni Kristo. Ang Espiritu Santo motabang nato nga mahimong mga tigpasiugda sa kalinaw nga makalahutay sa pagpanggukod sama sa gihimo ni Kristo. (Tan-awa sa 3 Nephi 12:7–11.)

Ang Espiritu Santo makatabang nato nga mausab ang atong kinaiya ug makabayaw sa atong mga tinguha ug mga kadasig ngadto sa mas taas nga lebel. Ang mas ubos nga balaod, usa ka balaod sa pagpangandam, miingon, “Dili kamo mopatay,” (3 Nephi 12:21). Ang Manluluwas miingon nga kita kinahanglang dili gani masuko sa atong igsoon (tan-awa sa bersikulo 22). Ang mas ubos nga balaod miingon, “Dili kamo manapaw” (bersikulo 27). Ang Ginoo nag-ingon nga kita kinahanglang dili gani motugot nga ang kahigal mosulod sa atong mga kasingkasing (tan-awa sa mga bersikulo 28–29). “Ang karaan nga butang milabay na, ug ang tanan nga butang nahimo nga bag-o,” miingon ang Manluluwas. “Busa manghinaot ako nga kamo mahimo nga hingpit gani sama nga ako, o ang inyong Amahan nga anaa sa langit hingpit” (mga bersikulo 47–48).

Ang pagkahingpit mao ang kausaban sa kahiladman nga atong gitinguha, apan murag imposible hangtod nga atong hinumdoman ang pulong nga hingpit sa Griyego kay teleios, nga nagpasabot nga “kompleto,” “tibuok,” o “hingpit nga napalambo.” Atong makita nga diha sa Basahon ni Mormon, si Jesus wala motawag sa Iyang Kaugalingon og hingpit hangtod human sa Iyang Pagkabanhaw. Sa Iyang kaluoy, Siya mihatag usab kanato og gasa sa panahon aron magkat-on ug motubo aron mahimong tibuok ug hingpit nga napalambo.

Diha sa Basahon ni Mormon, atong makita kanang milagro sa kinabuhi sa mga tawo human sa pagbisita sa Manluluwas. Silang “[tanan] nakabig ngadto sa Ginoo, sa ibabaw sa tibuok yuta, sa mga Nephita ug mga Lamanita, ug walay mga panagbingkil ug mga panaglalis taliwala kanila, ug matag tawo makiangayon nga nagtinagdanay sa usag usa.” (4 Nephi 1:2). “[Ang] gugma sa Dios … anaa sa mga kasingkasing sa katawhan. … Ug sa pagkatinuod wala nay mas malipayon pa nga katawhan” (mga bersikulo 15–16). Kini nga mga sumusunod ni Jesukristo mihimo sa unsay Iyang gitudlo, ug—paglabay sa panahon—sila nausab pinaagi sa Iyang grasya. Ang katilingban sa Zion nga ilang gipuy-an dul-an sa 200 ka tuig nagpakita nato nga pinaagi ni Kristo, ang positibo nga mga kausaban posible.

Panahon sa Pasko sa Pagkabanhaw, kita nagsaulog sa Pagkabanhaw ni Kristo ug sa saad nga gitanyag niini nga kita usab mabanhaw uban sa nahingpit ug nahimaya nga mga lawas. Ang istorya sa Pasko sa Pagkabanhaw diha sa Basahon ni Mormon nagpunting nato lapas pa sa mga kausaban sa gawas ug ngadto sa mga kausaban sa kahiladman nga gitanyag sa Manluluwas. Ang Basahon ni Mormon lain nga tugon ni Jesukristo ug may kalabotan sa atong mahangtorong mga posibilidad ug potensiyal tungod Kaniya.