“Poncio Pilato: ‘Kay Unsa bay Kamatuoran?,’” Liahona, Abr. 2026.
Sila Nakaila sa Manluluwas
Poncio Pilato: “Kay Unsa bay Kamatuoran?”
Ang dakong bahin sa pagsunod ni Kristo karon mao ang pagpangutana “Kay unsa bay kamatuoran?” ug ang pagpangita aron makaplagan kini.
Paghulagway pinaagi ni Laura Serra, dili mahimong pakopyahan
Si Poncio Pilato usa ka tawo nga nangutana og daghang pangutana.
Ngadto sa Manluluwas, si Pilato nangutana:
“Ikaw ba ang Hari sa mga Judeo?” (Mateo 27:11).
“Dili ka ba motubag kanako? Wala ka ba mahibalo nga ako may gahom sa pagbuhi kanimo ug sa pagpalansang kanimo sa krus?” (Juan 19:10).
Ngadto sa mga tawo diha sa kasaulogan, si Pilato nangutana:
“Kinsa may inyong gusto nga akong buhian? Si Barabas ba o si Jesus nga ginganlag Mesiyas?” (Mateo 27:17).
“Unsa may iyang sala?” (Mateo 27:23).
“Gusto ba ninyong ipalansang ko sa krus ang inyong hari?” (Juan 19:15).
Sa iyang mubo nga pagpakita diha sa Bag-ong Tugon, kadaghanan sa nakarekord nga mga pulong ni Pilato mga pangutana. Siya usa ka tawo nga naningkamot nga makasabot: Ngano man nga ang mga Judeo gusto nga ilansang sa krus kini nga tawo nga iyang nakita nga “walay sala”? (Juan 18:38). Nganong mas gipili man nila nga buhian si Barabas, usa ka kawatan ug mamumuno? Ug nganong kini nga tawo nga giakusahan, si Jesukristo, dili mobakwi sa Iyang mga pulong o mosulti aron depensahan ang Iyang kaugalingon?
Sa laing pagkasulti, sama sa gipangutana ni Pilato sa Manluluwas, “Kay unsa bay kamatuoran?” (Juan 18:38).
Desisyon ni Pilato
Sa kataposan, si Pilato midesisyon nga ang kamatuoran dili mahinungdanon kon mopasulabi ang opinyon sa kadaghanan. Sa dihang iyang nakita nga dili siya makapangatarongan sa katawhan, mihunong siya sa pagpangutana. Siya “nanghunaw atubangan sa mga tawo ug miingon, “Wala akoy labot sa dugo niining tawhana! Inyo kining gusto” (Mateo 27:24).
Si Pilato ingon og wala mouyon sa opinyon sa mga manggugubot bahin sa Manluluwas. Sa kataposan nga pagsulay aron ipakita sa katawhan sa Jerusalem nga wala siyay nakitang sala diha ni Jesus, si Pilato midala Kaniya sa kataposang higayon. “Busa migula si Jesus nga nagsul-ob sa purongpurong nga tunokon ug sa bisti nga dagtom-pula. Unya miingon si Pilato kanila, “Ania siya!” (Juan 19:5).
Si Pilato misulat sa ulohan “Jesus nga taga-Nazaret, ang Hari sa mga Judio,” aron ibutang sa krus ni Kristo, ug mibalibad nga usbon kini (Juan 19:19–22). Sa dihang si Jose nga taga-Arimatea mihangyo alang sa lawas ni Jesus, si Pilato mitugot nga ihatag kini kaniya (tan-awa sa Marcos 15:43–45).
Wala kita makahibalo sa eksakto nga mga motibo ni Pilato, apan ingon og mituo siya nga si Jesus dili usa ka kriminal. Nahibalo siya nga si Kristo gidala ngadto niya tungod sa kasina (tan-awa sa Mateo 27:18). Wala usab gayod kita mahibalo kon unsay iyang gihunahuna bahin sa Anak sa Dios, apan si Pilato ingon og nahibalo nga adunay butang nga lahi mahitungod Kaniya.
Ug sa gihapon, iyang gitugyan ang Manluluwas nga ilansang sa krus.
Unsaon Nato Pagtubag?
Daghan kita og makat-onan sa panlimbasog ni Pilato. Ang dakong bahin sa pagsunod ni Kristo karon mao ang pagpangutana “Kay unsa bay kamatuoran?” ug ang pagpangita aron makaplagan kini. Ang inadlaw nga bahin sa atong pagkadisipulo mao ang pagpaningkamot sa pagpaminaw sa Iyang Espiritu ibabaw sa lanog nga mga tingog sa kalibotan, niadtong atong makasugat sa personal ug sa online.
Si Pilato nangita sa kamatuoran, apan wala niya makita nga anaa ra kini sa iyang atubangan—si Jesukristo, “ang dalan, ang kamatuoran, ug ang kinabuhi” (Juan 14:6). Siya wala “makakita sa tawo” kon si kinsa gayod Siya.
Si Elder Dieter F. Uchtdorf sa Korum sa Napulog Duha ka Apostoles mipamatuod, “Ang labing importante nga adlaw sa inyo ug sa akong kinabuhi mao ang adlaw sa dihang nakakat-on kita nga “motan-aw sa tawo”; sa dihang ato Siyang nakita kon si kinsa gayod Siya; sa dihang miambit kita sa tibuok natong kasingkasing ug hunahuna bahin sa Iyang maulaong gahom; sa dihang uban sa gibag-o nga kadasig ug kalig-on, mipasalig kita nga mosunod Kaniya.”
Diha sa istorya ni Poncio Pilato, atong makita ang duha ka imbitasyon alang sa atong kaugalingong pagkadisipulo: pagpangita sa kamatuoran bahin sa pagkabalaan ni Jesukristo, ug kon makaplagan na nato ang atong tubag, dili gayod isalikway kana nga kamatuoran.
Kon kita nakaila ni Jesukristo—kon kita nakakita gayod Kaniya—kita “mahibalo sa kamatuoran ug ang kamatuoran maghatag [nato] og kagawasan” (Juan 8:32).