Gikan sa Pagbangotan sa Pasko sa Pagkabanhaw ngadto sa Kabuntagon sa Pasko sa Pagkabanhaw

Paghulagway pinaagi ni Elia Sampò, dili mahimong pakopyahan

Human sa pagserbisyo hapit tulo ka tuig isip mga lider sa misyon sa Ghana, ang akong asawa, si Ruth, ug ako sa kataposan nagsugod na sa paghimo og butang sa sayon nga paagi. Ang tanan ingon og maayo ra.

Dayon, sa wala damha, si Ruth mibati og hilabihan ka sakit sa iyang likod sa ubos. Human nahiling nga adunay mga bato sa kidney nga dako ra kaayo aron mogawas, gibiyahe siya paingon sa Johannesburg, South Africa. Human sa malamposon nga operasyon, giatake siya sa kasingkasing ug namatay sa kwarto sa operahanan.

Nganong nahitabo man kini? Gihatag namo tanan sa among misyon.

“Nasuko ka ba sa Dios tungod niini?” usa ka kanhi kauban sa trabaho nangutana.

“Wala, wala ko momahay sa Dios,” mitubag ko. “Wala ko makasabot nganong nahitabo kini, apan walay usa nato ang dili makasinati og kasakit, bisan kon naningkamot kita sa pagsunod sa ehemplo sa Manluluwas nga miadto ug ‘naghimog mga maayong butang’ (Mga Buhat 10:38). Ang paglaom sa pagkabanhaw sa pagkakaron mas personal, mas tinuod ngari nako. Ang Pasko sa Pagkabanhaw dili na gayod maparehas pag-usab.”

Samtang nangita ko og kahupayan ug giya sa mga pulong sa mga kasulatan ug sa moderno nga mga propeta, nakita nako ang koneksiyon tali sa proseso sa pagbangotan sa Pasko sa Pagkabanhaw ug sa saad sa kabuntagon sa Pasko sa Pagkabanhaw. Akong nakit-an ang mga pulong nga naghulagway sa gahom ni Jesukristo ug sa saad sa atong pagkabanhaw—mga pulong nga nag-amuma nako sa espirituhanon nga paagi ug naghatag nako og bag-ong kahulogan sa usa ka butang nga kaniadto dili kaayo klaro.

Napahinumdoman ko nga “ang sukaranan nga mga baroganan sa atong relihiyon mao ang pagpamatuod sa Apostoles ug mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit.”

Si Elder Gary E. Stevenson sa Korum sa Napulog Duha ka Apostoles mitudlo nga tungod ni Jesukristo ug sa Iyang Pag-ula:

• “Ang tanan nausab.”

• “Mas maayo ang tanan.”

• “Makaya ang kinabuhi—ilabi na sa masakit nga mga higayon.”

• “Posible ang tanan.”

Niining Pasko sa Pagkabanhaw—ug sa matag Pasko sa Pagkabanhaw—ako magsaulog sa gahom ug sa saad sa mahimayaong pagkabanhaw alang nako, ni Ruth, sa mga minahal, ug gani sa mga tawo nga wala gayod nako mahimamat. Wala ko mag-inusara ni naguol, bisan sa wala damha nga pagkawala sa akong minahal nga asawa.

Magkita ra kami pag-usab, maghinumdom sa mga istorya ug mga handomanan, magpasiplatay, ug mopakigbahin sa mga kasinatian nga among nasinati samtang nagkalagyo. Daghan kaayog angay nga istoryahan.