Andam nga Kasingkasing ni Maria: Sa Unsang Paagi nga ang Pagtuo Makahimo sa Imposible nga Posible

Ang kaandam ni Maria sa pagdawat sa kabubut-on sa Dios wala makahimo niya nga gawasnon gikan sa pagsulay, kasakit, o kasagmuyo. Gani, nag-atubang siya og bag-ong mga hagit isip inahan sa Mesiyas, lakip na niadtong gabii sa pagkatawo sa Manluluwas. Bahin niana nga gutlo, si Presidente Jeffrey R. Holland sa Korum sa Napulog Duha ka Apostoles mitudlo:

“Ikaduha lamang ngadto sa bata mismo, si Maria mao ang labing mahinungdanong tawo, ang halangdong rayna, inahan sa mga inahan—naghupot sa labing sentro nga bahin niining labing dako sa tanang kulbahinam nga mga gutlo. Ug … gawas sa iyang minahal nga bana, siya nag-inusara gayod siya.

“Naghunahuna ko kon kining batan-ong babaye, nga makabaton og anak sa iyang kaugalingon, dinhi nanamkon sa iyang unang anak, tingali nangandoy nga ang iyang inahan, o iyaan, o iyang igsoong babaye, o higala, anaa duol kaniya sa iyang pagbati. …

“Apan wala kadto mahitabo. Uban lamang sa walay kasinatian nga tabang ni Jose, siya nanganak sa iyang unang anak nga lalaki, miputos kaniya sa gamayng panapton nga iyang gituyo og dala sa panaw, ug tingali mipahigda niya sa unlan nga dagami.”

Ang mga hagit ni Maria nagpadayon isip usa ka batan-ong inahan sa dihang siya ug si Jose kinahanglang mobiya sa ilang pinuy-anan paingon sa Ehipto aron mapanalipdan nga kinabuhi ni Jesus. Siya nakakat-on usab kon unsay ipasabot sa pagpadako og usa ka Anak nga adunay balaanong misyon nga daw paspas nga nakapahingkod Niya ug gigahinan sa daghan Niya nga panahon isip usa ka hamtong (tan-awa sa Mateo 12:46–50).

Isip Iyang inahan, si Maria adunay kahigayonan nga masuod ni Jesus ug nakakita Kaniya nga naghimo og daw imposible nga mga butang. Siya nakakita Kaniya nga nagtudlo sa banggiitan nga kalalakin-an didto sa templo sa dihang Siya 12 anyos pa lang (tan-awa sa Lucas 2:41–51; Hubad ni Joseph Smith, Lucas 2:46). Siya nasayod nga siya mahimong motawag Kaniya alang sa milagro (tan-awa sa Juan 2:1–11). Ug siya anaa uban Kaniya didto sa krus samtang Siya mipadayon sa paghimo sa imposible nga posible pinaagi sa pag-antos alang sa tanang sala, kagul-anan, ug kalisdanan sa tanang katawhan (tan-awa sa Juan 19:25–27).

Ug mao nga, ang mga pulong sa anghel nga si Gabriel nga “alang sa Dios walay dili mahimo” adunay bag-ong kahulogan. Ang Dios dili lamang makadala og bag-ong kinabuhi nganha sa kalibotan, apan makadala Siya og kinabuhi ngadto sa kalibotan pinaagi sa maulaong sakripisyon ni Jesukristo.

Ang kaandam ni Maria sa pagdawat sa kabubut-on sa Dios, nga nagtugot niya nga makab-ot ang iyang balaanong potensiyal, makita diha sa kaugalingong kaandam ni Jesus sa pagdawat sa kabubut-on sa Iyang Amahan, nga nagtugot Kaniya sa pagtuman sa Iyang balaanong misyon isip usa ka Manluluwas. Isip resulta sa kamapainubsanon ni Jesus, ang daw imposible nga mga butang—lakip ang Iyang kadaogan ibabaw sa kamatayon pinaagi sa Pagkabanhaw—nahitabo, nagpahinumdom nato nga kon kita nagtinguha sa pagkab-ot sa atong potensiyal ug mohimo nga ang imposible mahitabo sa atong kinabuhi, kita kinahanglang motugyan sa atong kabubut-on ngadto sa Dios.

Si Elder Ulisses Soares sa Korum sa Napulog Duha ka Apostoles mitudlo: “Nagkinahanglan og isog ug andam nga kasingkasing … sa pagtugyan sa atong kaugalingon ngadto sa Dios, ug dayon sa kataposan mohukom sa pagsagop sa Iyang paagi kay sa atong kaugalingon. Ang kinalisdang pagsulay sa atong pagkadisipulo makita sa atong kaandam nga itugyan ug wagtangon ang karaan natong kaugalingon ug motugyan sa atong kasingkasing ug atong tibuok kalag ngadto sa Dios aron maatoa ang Iyang kabubut-on.”

Ang pagpahiuyon sa atong kabubut-on ngadto sa kabubut-on sa Dios dili ingong kadali o kasayon, apan dili kinahanglan nga himoon kini nga kausaban nga kita ra. Kon kita mopakita og pagtuo diha ni Jesukristo ug sa Iyang Pag-ula, atong makab-ot ang atong balaanong potensiyal ug mahimong usa ka tawo nga Siya gusto nga kita mamahimo (tan-awa sa 2 Mga Taga-Corinto 5:17–19).

Si Presidente Russell M. Nelson (1924–2025) mipamatuod: “Ang hugot nga pagtuo diha kang Jesukristo mao ang kinadak-ang gahom nga atong magamit niini nga kinabuhi. Ang tanan nga butang mahimo ngadto kanila nga magatuo [tan-awa sa Marcos 9:23].”

Si Presidente Nelson mitudlo usab nga kon ang atong “labing dakong tinguha mao ang pagpatigbabaw sa Dios labaw sa tanan” sa atong kinabuhi, “daghan kaayong mga isyu ang mahimong walay hinungdan!” Ang atong mga desisyon dili na kaayo lisod, mas tarongon nato paggamit ang atong panahon, ug ang atong nasubo nga mga kasingkasing mamaayo. Siya misaad, “Samtang mopili kamo nga ipatigbabaw ang Dios labaw sa tanan diha sa inyong kinabuhi, inyong masinati alang sa inyong kaugalingon nga ang atong Dios ‘usa ka Dios sa mga milagro’ [Mormon 9:11].”

Siyempre, nagkinahanglan kini og kaisog aron ipatigbabaw ang Dios labaw sa tanan imbes magsalig sa atong kaugalingong mga kapabilidad (tan-awa sa Salmo 118:8). Tinuod kini ilabi na kon kita wala sa tanang tubag o kon kita nagtuo nga basin adunay mas maayong dalan nga subayon kaysa dalan sa Dios. Apan kon kita mopili Kaniya, ang atong kinabuhi sa pagkatinuod mahimong mas sayon. Tungod kay kon ang atong kabubut-on nahiuyon sa kabubut-on sa Ginoo, kita mahiusa uban Kaniya. Siya mohatag nato og kalig-on, suporta, ug gahom. Ug kita makapadayon uban sa milambo nga pagsalig, sama sa gihimo ni Maria, nasayod nga alang sa Dios, walay dili mahimo.