Pedro: Nag-establisar og Sumbanan alang sa Moderno nga mga Propeta

Isip usa ka saksi sa Pagkabanhaw ni Jesukristo, si Pedro nagtinguha sa pagsilsil sa paglaom ngadto sa uban samtang nagpamatuod siya sa maulaong sakripisyo sa Manluluwas ug kadaogan ibabaw sa kamatayon. Siya mitudlo nga ang Dios Amahan “[naghatag] og bag-ong kinabuhi pinaagi sa pagbanhaw kang Jesu-Cristo. Naghatag kini kanato ug paglaom nga dili matarog” (1 Pedro 1:3).

Sa samang paagi, sa atong panahon, si Presidente Russell M. Nelson (1924–2025) mipamatuod bahin sa paglaom nga nagagikan ni Jesukristo ug bahin sa panginahanglan sa pagpakigbahin niana nga mensahe ngadto sa uban: “Ang matag usa sa mga anak sa Dios angayang makadawat sa oportunidad nga makadungog ug modawat sa makaayo, makatubos nga mensahe ni Jesukristo. Walay laing mensahe nga mas mahinungdanon sa atong kalipay—karon ug sa kahangtoran. Walay laing mensahe nga mas puno sa paglaom.”

Kalabot sa pagpakigbahin sa mensahe ni Jesukristo ngadto sa uban, ikonsiderar ang panan-awon ni Pedro bahin sa usa ka dakong panapton nga gihiktan sa upat ka eskina, napuno sa mga mananap nga molakat ug mokamang, ug mga langgam. Niini nga panan-awon, si Pedro gimandoan sa pag-ihaw ug pagkaon sa mga hayop. Apan, ang pagkaon niini usa ka salawayon ubos sa balaod ni Moises (tan-awa Levitico 11). Miingon si Pedro nga dili siya mokaon sa mga hayop, nagtawag niini nga “komon” ug “mahugaw” (Mga Buhat 10:14). Apan gikorehian siya sa Ginoo: “Ang tingog miingon kaniya pag-usab, “Ayaw isipa nga mahugaw ang bisan unsa nga gihinloan na sa Dios” (Mga Buhat 10:15).

Samtang namalandong si Pedro sa kahulogan sa panan-awon, adunay tulo ka tawo nga miabot sa iyang dapit. Gipadala sila ni Cornelio, usa ka relihiyoso nga Hentil, nga gisultihan sa usa ka anghel nga ipakuha si Pedro (tan-awa sa Mga Buhat 10:3–7). Sa samang paagi, ang Espiritu misulti ni Pedro nga mokuyog sa mga tawo ug dili magduhaduha (tan-awa sa Mga Buhat 10:19–20).

Apan, sa pagsulod sa balay sa usa ka Hentil, si Pedro mihugaw sa iyang kaugalingon sumala sa balaod sa Judio (tan-awa sa Mga Buhat 10:28). Apan agi kini og pagsunod sa iyang panan-awon ug ngadto sa Espiritu. Nagpasabot kini nga ang balaod ni Moises natuman pinaagi ni Kristo ug ang katubsanan madawat sa tanan, dili lamang sa mga Israelita.

“Tungod niini nga kasinatian ug pagpadayag ngadto kang Pedro, giusab sa Ginoo ang pamaagi sa Simbahan ug mipadayag og mas kompletong panabot sa doktrina ngadto sa Iyang mga disipulo,” mitudlo si Presidente D. Todd Christofferson, Ikaduhang Magtatambag sa Unang Kapangulohan. “Ug ang pagsangyaw sa ebanghelyo gipakatap ngadto sa tanang katawhan.”

Sa samang paagi, ang mga propeta sa ulahing mga adlaw mihimo og dinasig ug mapadayagon nga mga kausaban sa pagdala sa ebanghelyo ngadto sa tibuok kalibotan (tan-awa sa Mateo 24:14; Doktrina ug mga Pakigsaad 112:28). Naglakip kini sa kang Presidente Thomas S. Monson (1927–2018) nga pagpadali sa buhat niadtong 2012 pinaagi sa pagpaubos sa edad nga ang mga misyonaryo makahimo sa pagserbisyo. Ug sa 2023, si Presidente Nelson mipahibalo sa bag-o ug gipalambo nga bersiyon sa Isangyaw ang akong Ebanghelyo aron mas magiyahan ang misyonaryo nga buhat.

Ang ubang dinasig nga mga kalamboan naglakip nianang sa pagsugod sa 2019, ang mga misyonaryo gitugotan sa pagpakigsulti sa ilang mga pamilya sa ilang sinemana nga adlaw sa pagpangandam, ug pagka-2020, si Presidente Nelson mitugot sa matag misyonaryo sa Simbahan nga makagamit sa smartphone, nga makatabang sa pagpalambo sa pagtudlo sa digital nga paagi samtang ang COVID-19 nga pandemya mikatap sa tibuok kalibotan.

Ang mga gibuhat ni Pedro sa pagtuman sa iyang mapadayagon nga panan-awon adunay mga pagsupak. Sa dihang ang kaigsoonan sa Simbahan kinsa nagsunod sa balaod sa pagtuli nakadungog nga si Pedro misulod sa balay ni Cornelio, sila nasuko kaniya. Apan gisaysay ni Pedro ngadto nila ang panan-awon ug ang Balaang Espiritu nag-uban sa mga Hentil ingon nga kini nag-uban sa mga Judeo nga midawat ni Kristo. (Tan-awa sa Mga Buhat 11:2–16.)

“Kon ang Dios naghatag sa mga dili Judeo sa samang gasa nga iyang gihatag kanato sa dihang mituo kita kang Ginoong Jesukristo, kinsa man ako nga mopugong sa Dios?” siya miingon (Mga Buhat 11:17).

Ingon nga si Pedro nagpabilin sa iyang kaligdong ngadto sa Dios, si Propeta Joseph Smith mihimo usab niana sa dihang nag-atubang og pagsupak sa gawas human sa pagsulti sa uban mahitungod sa Unang Panan-awon. “Nakakita ako og panan-awon; nasayod ako niini, ug nasayod ako nga ang Dios nasayod niini, ug dili ako makalimod niini, ni mangahas ako sa pagbuhat niini; gani nasayod ako nga sa pagbuhat sa ingon makasala ako sa Dios, ug mahimutang ubos sa panghimaraot” (Joseph Smith—Kasaysayan 1:25).

Uban sa Apostoles nga sila si Santigao ug Juan, si Pedro niini nga dispensasyon mipahiuli sa Melchizedek nga Pagkapari pinaagi ni Propeta Joseph Smith (tan-awa sa Doktrina ug mga Pakigsaad 27:12; 128:20). Kining mao nga pagkapari subay sa kapunongan sa Anak sa Dios gitugyan karon nganha sa takos nga mga lalaki nga mga miyembro, ang matag usa nagsubay sa linya sa pagkapari direkta ngadto ni Pedro ug sa kataposan ngadto ni Jesukristo.

Dugang pa, ang mga pulong ni Pedro nakaimpluwensya sa pagpadayag mahitungod sa kalibotan sa mga espiritu. Niadtong 1918, samtang nagtuon sa 1 Pedro, mga kapitulo 3 ug 4, si Presidente Joseph F. Smith (1838–1918) nakadawat og panan-awon. Naghunahuna siya mahitungod sa mga pulong nga gisulat ni Pedro kalabot sa kon sa unsang paagi nga “ang Anak sa Dios nagsangyaw didto sa bilanggoan sa mga espiritu,” (Doktrina ug mga Pakigsaad 138:28). Ug ang iyang mga mata nabuka ug ang iyang salabotan nalamdagan (tan-awa sa Doktrina ug mga Pakigsaad 138:29).

Kini balaanong gipadayag ngadto ni Presidente Smith nga si Kristo atol sa tulo ka adlaw nga ang Iyang lawas anaa sa lubnganan mibisita sa kalibotan sa mga espiritu. Didto, ang Manluluwas miorganisar sa Iyang Simbahan taliwala sa mga matarong nga namatay na. Ug sila nagpadayon sa pagtudlo ngadto sa uban diha sa kalibotan sa mga espiritu. Sa ingon niana, ang ebanghelyo gisangyaw ngadto sa mga patay (tan-awa sa Doktrina ug mga Pakigsaad 138:30), naghatag nila og kahigayonan sa pagdawat sa kaluwasan ug kahimayaan nga gitanyag pinaagi ni Kristo. Kini gipasiugdahan karon sa mga miyembro nga nakadawat sa mga ordinansa pinaagi sa pag-proxy alang sa mga patay diha sa mga templo sa ulahing mga adlaw.

Si Pedro mipahibalo nato kon ngano nga kining mahinungdanon nga buhat anaa alang sa tanan: “Ang Dios walay pinalabi” (Mga Buhat 10:34). Siya usab mipadayag kon ngano nga ang ebanghelyo kinahanglang isangyaw ngadto sa mga patay: “nga sila unta mahukman sumala sa mga tawo diha sa unod, apan mabuhi sumala sa Dios diha sa espiritu” (1 Pedro 4:6).

Ang mga propeta sa ulahing mga adlaw nagtudlo usab og katubsanan sa mga patay ug sa atong mga tahas sa ulahing mga adlaw niini nga buhat. “Ang mga yawe sa pagkapari naghatag nato sa awtoridad sa paghatag sa tanang panalangin nga gisaad ngadto ni Abraham ngadto sa matag lalaki ug babaye nga nagtuman sa pakigsaad,” miingon si Presidente Nelson. “Ang buhat sa templo makapahimo niining talagsaong mga panalangin nga maanaa alang sa tanang anak sa Dios, bisan pa asa o kanus-a sila nabuhi, o nagpuyo karon.”

Sama ni Pedro, ang mga propeta sa gipahiuli nga Simbahan ni Kristo nagpadayon sa paghimo sa mga kausaban sumala sa giya sa Ginoo. Naglakip kini sa kang Presidente Nelson nga pagpalapad sa mga palisiya aron sa pagtugot sa mga batan-ong babaye ug mga batan-ong lalaki sa pagserbisyo isip mga saksi diha sa mga bunyaganan sa templo, ug sa pagtugot sa mga babaye ug mga lalaki sa pagserbisyo isip mga saksi sa pagselyo diha sa mga ordinansa sa pagselyo diha sa templo.

Naglakip kini sa kang Presidente Nelson sa 2018 nga pagpasabot pag-usab sa gihatag sa Ginoo nga ngalan sa Iyang Simbahan, Ang Simbahan ni Jesukristo sa mga Santos sa Ulahing mga Adlaw. Naglakip kini sa iyang pagpahibalo nga dili na ipadayon ang mga kapangulohan sa Young Men pagka-2020, naghimo sa mga bishop—usa ka katungdanan sa Aaronic nga Pagkapari—nga mas makigtambayayong ngadto sa mga batan-ong lalaki nga naghupot ug nagdumala sa mga katungdanan diha sa Aaronic nga Pagkapari.

Agi og dugang, ang propetikanhong mga paningkamot nakapadali sa buhat sa pagtukod og mas daghang templo, aron ang katawhan sa Dios mapundok sa duha ka habig sa tabil. Gatosan ka templo sa tibuok kalibotan ang gigamit, gitukod, o giplano.

Sa mga dispensasyon, gikan ni Pedro ngadto ni Joseph Smith ngadto ni Presidente Dallin H. Oaks, ang mga propeta milihok uban sa pagtuo sa pagpalig-on sa Iyang gingharian, sa pagsaksi nga si Jesus mao ang Kristo, ug sa pagpundok sa tanang anak sa Dios sa duha ka habig sa tabil. Sama sa gihimo ni Pedro sa karaang mga panahon, ang mga propeta ug apostoles karon nagpadayon sa pagsunod ni Jesukristo ug nangulo sa Iyang Simbahan pinaagi sa pagpadayag.