Napuno sa Paglaom ug Kalinaw

Paghulagway pinaagi ni Elia Sampò, dili mahimong pakopyahan

Samtang naminaw ko sa The Tabernacle Choir sa Temple Square nga nanganta “It Is Well with My Soul” atol sa Abril 2025 nga kinatibuk-ang komperensiya, ang Espiritu mituhop sa akong kasingkasing. Dili lang kadto musika—kadto usa ka lawom nga balaang pagtahod ug sinseridad sa pagkanta nga mipabati nako nga daw nagbarog sa atubangan sa Manluluwas. Nakahilak ko tungod sa katahom sa musika, nga mipahinumdom nako nga pinaagi ni Jesukristo ug sa Iyang Pag-ula, ako makabaton og kalinaw bisan pa sa akong mga panlimbasog.

Samtang nagtugtog ko sa mga himno sa mga panagtigom alang sa sakramento, kanunay nakong bation nga ang musika usa ka porma sa pag-ampo, usa ka paagi sa pagdapit sa Espiritu ug pagpakigsulti ngadto sa Dios. Apan sa pagkadungog niini nga himno nga gikanta sa choir sa hilabihan nga katahom, mibati ko og mas lawom nga koneksiyon niana nga kamatuoran. Daw ang musika, inubanan sa Espiritu, mibayaw sa akong kalag ug mipahinumdom nako sa gahom sa grasya sa Manluluwas sa akong kinabuhi.

“Kay ang akong kalag mahimuot sa awit sa kasingkasing; oo, ang awit sa mga matarong mao ang usa ka pag-ampo ngari kanako, ug pagatubagon kini sa usa ka panalangin diha sa ilang mga ulo” (Doktrina ug mga Pakigsaad 25:12).

Kini nga saad tinuod sa akong pamati. Pinaagi sa musika, atong ihalad ang atong mga kasingkasing ngadto sa Ginoo. Agi og balos, Iyang pun-on ang atong mga kalag og paglaom ug kalinaw. Samtang naminaw ko sa himno, napahinumdoman ko nga bisan unsa pa ang mga pagsulay nga atong atubangon—sa atong personal nga kinabuhi, atong mga relasyon, o atong mga panlimbasog sa pagtuo—makabaton kita og kalinaw pinaagi ni Kristo. Niadto nga mga gutlo, maayo ra gayod ang atong mga kalag.

Kini nga kasinatian nakapalawom sa akong gugma sa mga himno ug sa tahas nga mahimo niini sa atong espirituhanong kinabuhi. Dili lang kini mga kanta. Kini mga pag-ampo, mga mensahe sa paglaom, ug mga paagi sa pagdapit sa gugma sa Manluluwas ngari sa atong mga kasingkasing. Mapasalamaton ko sa paagi nga ang gahom sa musika makabayaw ug makalig-on nato, ilabi na sa higayon nga kita labing nagkinahanglan niini.