“Tabang alang sa Atong Kaguol,” Liahona, Abr. 2026.
Mga Tingog sa mga Santos sa Ulahing mga Adlaw
Tabang alang sa Atong Kaguol
Ang Pag-ula ni Jesukristo makatabang nato sa tanang butang, bisan kon kita ang nahimoan og sayop.
Paghulagway pinaagi ni Elia Sampò, dili mahimong pakopyahan
Sa dihang nagmabdos ko sa akong ikaupat nga anak, nagkinahanglan kami og bag-ong sakyanan. Nakakita ko og usa diha sa online, apan nakuyawan sa dakong kantidad sa pagpailt. Nangayo ko og tambag sa maalamon nga mga higala. Ang tanan misulti nako nga maayo kadto nga pagpili, mao nga kompyansa ra ko.
Ang sakyanan kinahanglan nga ipadala ngari namo, mao nga naghulat kami. Sa adlaw nga ang sakyanan moabot na unta, among nahibaloan nga walay sakyanan nga moabot!
Giilad mi. Nakugang ko ug nahugno. Wala na ang among kwarta.
Sa sunod nga mga adlaw, ang mahimo ra nako mao ang pagsigeg hunahuna sa kasinatian. Hilabihan ang akong kasagmuyo nga naglisod ko nga mahimong buotan nga inahan ug asawa. Wala na ang akong kadasig. Miabot ko sa punto nga dili na makapadayon ug nasayod nga kinahanglan ko nga mag-usab. Mao nga, nag-ampo ko ug mihangyo sa Langitnong Amahan nga kuhaon ang kabug-at nga akong gipas-an.
Human sa pipila ka oras, mas migaan ang akong pamati. Ug kadugayan, wala na ko mobati og kabug-at. Wala na ko masuko o masagmuyo. Kalinaw lamang ang akong gibati. Akong naamgohan nga kining pagbati sa kakalma miabot tungod sa Pag-ula ni Jesukristo.
Human sa pipila ka bulan, nakadawat kami og kwarta gikan sa organisasyon sa mga silingan diin kami nahisakop. Eksakto gayod kini nga kantidad sa nawala namo. Alang namo, kadto usa ka milagro!
Akong nakat-onan nga dili ko kinahanglang mopas-an sa akong mga palas-anon nga mag-inusara. Si Jesukristo nasayod sa unsay akong gibati. Iyang giantos ang “mga sakit ug mga kasakit ug mga pagtintal sa matag matang” (Alma 7:11). Kinahanglan nga pasudlon nato Siya sa atong kinabuhi aron makatabang Siya kanato.
Si Presidente Russell M. Nelson (1924–2025) mitudlo: “Walay kinutoban ang kapasidad sa Manluluwas sa pagtabang kaninyo. Ang Iyang dili matugkad nga pag-antos sa Getsemani ug sa Kalbaryo para kaninyo! Ang Iyang walay kinutoban nga Pag-ula kadto para kaninyo!”
Si Jesukristo gusto nga motabang nato sa atong kaguol, bisan unsa man kini. Wala kita mag-inusara. Anaa Siya kanunay alang nato (tan-awa sa Mateo 28:20).