Wan OlTesteman Gaed blong Holemtaet Tabu Aedentiti

Bifo we Bifo Olgeta, Taem we Wol I No Stap Yet, Tok blong God I Stap, i kam long Eva Timothy, oli save mekem kopi blong yusum long Jos nomo

Bae mi giaman sapos mi talem long yu se mi neva kwestinim rol blong mi insaed long plan ia blong God.

?From wanem bae mi mekem olsem—taem mi no stret gud evriwan—blong mi pat insaed long plan ia blong Hem we i stret gud evriwan? Long wanem wei nao mi save stap klin inaf blong kasem ol seken janis we Papa long Heven i stap givim long bakegen mo bakegen? ?Olsem wanem nao bae Lod i trastem mi blong serem lav blong Hem wetem ol narawan taem we samtaem mi stap traehad blong filim lav ia miwan?

Sapos yu stap gat tingting ia tu, yu no stap yuwan.

Wan long ol bigfala plan blong enemi i blong atakem andastaning blong yumi abaot tabu aedentiti blong yumi. Elda Brian K. Taylor blong Olgeta Seventi i bin tijim se, “Bigfala wo ia, long saed blong tabu aedentiti blong yumi, i wan strong faet, from ol tul blong Setan we oli stap evri ples oli wantem prapa spolem gud bilif mo save blong yumi long saed blong rilesensip blong yumi wetem God.”

Laki nomo se Papa long Heven i bin tijim—mo gohed blong tijim—ol pikinini blong Hem abaot valiu blong olgeta. Stat long stat, ol pipol insaed long ol skripja maet oli traehad blong andastanem sam long ol semmak kwestin we ating yu mo mi i gat tedei.

Taem yu stadi long OlTesteman long yia ia, yu save lanem abaot tabu aedentiti blong yuwan taem yu yusum ol eksperiens blong ol pipol insaed long ol skripja long laef blong yuwan. Mo maet bae yu faenem ol ansa blong wan moa impoten kwestin long taem ia:

Hu ia Mi?

Adam mo Iv tufala i makem stat blong nid ia blong andastanem tabu aedentiti. Papa long Heven i krietem tufala folem pikja blong Hemwan, i givim long tufala responsabiliti blong lukaot gud long wol mo evri samting we i gat laef we oli stap long hem, mo komandem tufala blong tufala i kam plante, mo fulumap wol, (luk long Moses 2:26–28).

Olsem wan laen blong Adam mo Iv, yu save yusum ol semmak prinsipol ia blong aedentiti long yuwan. Yu, yu stret spirit pikinini blong God wetem tabu responsabiliti blong tekem aksen olsem wan waes wokman mo bildimap wan famli we i no save finis.

Taem Adam mo Iv tufala i kakae long frut blong tri blong save gud mo nogud, God i sakemaot tufala long Garen blong Iden. Nomata God sakemaot tufala aot long fes blong Hem, long saed blong bodi mo spirit, Hem i givim wan Sevya blong helpem tufala blong winim tugeta ded long saed blong bodi mo spirit tru long Atonmen blong Jisas Kraes.

Olsem Adam mo Iv, praes blong yu “i bigwan tumas long ae blong God” (Doktrin mo Ol Kavenan 18:10).

Stori blong Ebraham i go stret wetem tabu aedentiti. Lod i bin mekem wan promes blong risal we i no save finis long Ebraham:

“Mo aot long yu, bae mi mekem wan bigfala nesen, bambae mi blesem yu, mo bambae mi mekem we plante man oli savegud nem blong yu, blong yu bambae yu kam olsem rod blong mi blong mi blesem plante man:

“Olgeta we oli singaot long mi blong mi blesem yu, mi bambae mi blesem olgeta, be olgeta we oli singaot trabol i kam long yu, mi bambae mi mekem trabol i kam long olgeta: Mi bambae mi yusum yu blong blesem ol man blong olgeta narafala kantri long wol” (Jenesis 12:2–3).

Afta long plante yia blong stap wet wetem fet, Ebraham mo Sera tufala i kasem blesing blong gat pikinini boe blong tufala, Aesak. Afta, God i givim komanmen long Ebraham blong sakrifaesem Aesak we “ripresentem God mo Wan Stret Pikinini Ia Nomo blong hem” (Jekob 4:5). Taem we Ebraham i soem se hem i wantem blong mekem sakrifaes olsem, wan enjel blong Lod i stopem hem.

Afta yumi ridim:

“Hae God i talem se, ‘Long nem blong mi, mi mi promes se bambae mi blesem yu bigwan. Pikinini ya blong yu i wan nomo we yu yu gat, be yu yu no holemtaet hem, yu rere nomo blong letem hem i ded. Mo from we yu yu mekem olsem:

“Mi mi promes long yu se olgeta we bambae oli kamaot biaen long yu, bambae oli plante we plante. Bambae oli plante olsem ol sta long skae, mo olsem sanbij daon long solwota. Olgeta ya bambae oli stap winim ol enemi blong olgeta;

“Bambae ol man blong ol narafala kantri oli save prea long mi blong mi blesem olgeta, olsem we bambae mi blesem olgeta ya. Be bambae mi mi mekem i gud tumas long olgeta we bambae oli kamaot biaen long yu, from fasin ya we yu yu mekem tede, we yu obei long tok ya blong mi” (Jenesis 22:16–18).

Stori ia we i gat bigfala paoa i tijim se evriwan we oli mekem mo kipim ol kavenan wetem Papa long Heven, oli save kasem ol promes blesing blong famli laen blong Ebraham. Olsem wan pikinini blong kavenan, yu save kasem ol promes blesing blong kavenan blong Ebraham taem we yu stap hang strong long promes we yu mekem wetem Lod tru long ol kavenan blong baptaes o tempol.

Hega—slef blong Sera mo mama blong Ismael—i tijim bigfala paoa blong yumi we i gud tumas blong stap strong. Afta we Aesak i bon, pikinini boe blong Ebraham mo Sera, Ebraham i saenemaot Hega mo Ismael i go aot long draeples (luk long Jenesis 21:9–14).

Lod i luk safaring mo krae blong hem we i kam wetem tru hat from laef blong Ismael, Lod i sendem wan enjel blong givim kamfot long hem mo talem: “?Hega, from wanem yu yu trabol olsem? !Yu no harem nogud! God i harem finis boe ya blong yu we i stap krae. Yu girap. Yu go leftemap hem, yu mekem hem i harem gud bakegen. Bambae mi mekem we ol pikinini we bambae oli kamaot biaen long hem, oli kam plante we plante, oli kam wan strongfala laen” (Jenesis 21:17–18).

Iven taem we Hega i filim se hem i stap hemwan fulwan long draeples, Papa long Heven i no lego hem. Hem i kasem proteksen mo riwod from fet mo fasin blong hem blong wok strong wetem strong tingting.

Olsem Hega, maet yu stap filim se yu stap traehad yuwan long wan draeples yuwan. Be yu yu gat bigfala valiu long Papa blong yu long Heven. Maet yu stap traehad yuwan long wan draeples blong wan sotfala taem, be Hem i no fogetem yu. Hem i stap mekem yu rere from ol bigfala samting we i blong stap bildimap kingdom blong Hem.

Papa long Heven i bin singaotem Moses blong karemaot Ol Man Isrel we oli stap olsem ol slef long Ijip blong oli kam fri. Hem i mekem plante merikel we long en, i lidim olgeta blong ronwe (luk long Eksodas 7; 14).

Nomata se hem i gat sakses long asaenmen blong hem, Moses i no gat tras oltaem long hemwan long paoa blong hem blong mekem olsem we Papa long Heven i askem hem blong mekem. Taem we Moses i talem ol filing blong hem se hem i no inaf, Lod i ansa se, “Mi bambae mi stap wetem yu. Mo taem yu tekem olgeta oli aot finis long Ijip oli kam, bambae yufala i mas kam mekem wosip long mi long hil ya ” (Eksodas 3:12).

Moses i akseptem aedentiti blong hem olsem wan pikinini blong God mo kasem paoa blong Papa long Heven blong mekem ol merikel blong Hem. Olsem Moses, yu save kasem paoa blong mekem wok blong God taem yu hang strong long rilesensip blong yu we i no save finis, wetem Papa long Heven.

From hemia, ?yu, yu huia?

Naoia i taem blong yu blong faenemaot ansa blong yuwan.

Lukaotem ol skripja blong faenem ol ansa long ol kwestin blong yu mo bae yu faenem. Papa long Heven i wantem yu blong andastanem stret huia yu blong mekem se yu save lavem yuwan olsem we Hem i lavem yu.

Save ia blong tabu aedentiti blong yu we i no save finis, i stap raon ia nomo—from hemia, ?yu stap wet long wanem?