“Stap Blesem Evri Famli long Wol,” Liahona, Maj 2026.
Stap Blesem Evri Famli long Wol
Sapos yumi folem mo serem plan ia blong Papa long Heven long ol famli, Hem bae i stap wetem yumi, givim sapot long yumi mo joenem yumi long wokbaot blong yumi i gobak long Hem.
Drim blong Jekob long Betel, i kam long J. Ken Spencer
I no longtaem i pas, Sista Uchtdorf mo mi mitufala i atendem baptaes blong wan long ol apu apu pikinini blong mitufala. Taem mitufala i stap wajem ol defdefren jeneresen oli stap selebretem baptaes wetem glad, mitufala i filim bigfala fasin blong talem tangkyu long Papa blong yumi long Heven from plan ia blong Hem blong sevem ol pikinini blong Hem. Mitufala i filim save hamas famli mo ol tabu kavenan oli impoten long Hem stat long stat.
Hamas hemia i impoten yumi save luk insaed long OlTesteman stori blong fetful Jekob, we i bin tekem wan longfala mo had rod blong faenem wan waef, mared long kavenan mo statem wan famli. Wan naet, Jekob i stop blong spel from i tudak, be i luk se i gat ol ston nomo blong mekem pilo long hem. Hem i mas taet tumas from se hem i gohed yet blong silip—mo hem i gat wan drim.
Wetem ol gol we oli klin inaf abaot kavenan mared mo famli we oli stap long maen blong hem, Jekob i bin luk “wan lada i stanap, we stamba blong hem i stap long graon, be en blong hem antap i kasem heven, mo i luk ol enjel oli stap long hem, we oli stap kamdaon, oli stap go antap.
“Nao hem i luk we Hae God i kamtru, i kam stanap klosap nomo long hem, mo i talem long hem se, Mi mi Hae God, mi God blong bubu blong yu Ebraham, mo blong papa blong yu Aesak” (Jenesis 28:12–13).
Afta, Lod i bin mekem sam impoten kavenan promes i go long Jekob—ol promes we Hem i bin mekem tu wetem papa blong Jekob, Aesak mo bubuman blong hem, Ebraham, we i tekem tu:
-
Ol promes ia se Jekob bae i kam papa blong “ol laen blong olgeta bambae oli kam plante we plante” (Jenesis 28:3; luk tu long ves 14).
-
Ol promes blong graon blong Jekob i blong ol laen blong hem (luk long Jenesis 28:4, 13).
-
Ol promes ia se tru long Jekob mo “laen blong hem bae Lod i blesem ol man blong olgeta narafala kantri long wol” (Jenesis 28:14; oli ademap italik).
From se eksperiens blong Jekob i tabu tumas i mekem se hem i talemaot se: “Tru, ples ya, Hae God i stap long hem. … “!Ples ya i tabu tumas! Ating ples ya, haos blong God ya. Hemia doa blong heven ya” (Jenesis 28:16–17). Mo afta, Jekob i putum nem blong eria ia Beth-el, we i minim “haos blong God” (Jenesis 28:19, futnot a).
Ol promes blesing we Jekob i bin kasem long drim blong hem, i mekem hem i nid blong mekem sam samting blong stap kam antap long ril laef. Olsem Ol Lata-dei Sent, hem i no had blong luk wan koneksen we i stap bitwin drim blong Jekob, ol kavenan blong Lod, mo haos blong Lod. Ol tempol oli moa olsem lada ia we Jekob i bin luk long drim blong hem. Ol tijing, ol odinens mo ol kavenan blong haos blong Lod oli joenem heven mo wol ia. Ol kavenan ia yumi save komperem wetem tufala aean we i holem lada blong stanap, we i tekem yumi kam kolosap moa long Lod. Mo tru long ol tabu seves we yumi stap givim insaed long ol tabu tempol, yumi stap blesem “evri famli long wol”—long taem bifo, naoia, mo long fiuja.
“!Hemia i wan gudfala aedia!”
Elda Bruce C. Hafen, wan foma memba blong Olgeta Seventi, long wantaem i bin kasem wan fon kol wei kam long edita blong wan nasonal nius magasin. Edita ia i wantem blong tokbaot wan buk we i jes kamaot mo i givimaot histri blong ol bilif abaot heven long ol defren relijin.
“Olgeta we oli raetem buk ia oli faenemaot se pablik i wantem save moa abaot heven—mo ol famli long heven,” Elda Hafen i raetem. Plante pipol oli biliv yet long laef afta long ded, lav we i no save finis, mo kam tugeta blong ol famli long heven, “plante Kristin jos oli no givim inaf ansa long bigfala tingting ia”—be i gat wan jos nomo we i save ful ansa : Jos Ia blong Jisas Kraes blong Ol Lata dei Sent.
Insaed long Jos ia blong Sevya we i bin kambak, yumi gat ol tabu tempol. Yumi gat mared we i no save finis, wetem siling atoriti we i givim blesing i go moa bitim ded long saed blong bodi. Yumi gat promes ia blong wan fiuja we i no save finis wetem olgeta we yumi lavem insaed long ples we Papa mo Pikinini Tufala i stap long hem. Aot long evri samting ia we oli givim, olgeta we oli raet oli endem se aedia ia blong Ol Lata-dei Sent abaot heven i komplit fulwan—mo bae mi save ademap se, hem i wan we i givim moa glad.
“!Hemia i wan gudfala aedia!” Elda Hafen i talem. “Plante pipol tedei oli wantem tumas blong gat famli we i no save finis, mo [gospel ia blong Jisas Kraes we i kambak] i mekem tingting ia i kamtru bitim eni nara grup blong ol aedia [o ol bilif blong ol nara relijin. Mi wantem sapos ful wol i save harem ol pikinini blong [yumi] oli singsing long glad niu ia se: ‘Ol famli oli save stap tugeta blong oltaem.’”
Ol famli oli no wan sosol sistem we oli arenjem nomo. Oli paten blong heven we i no save finis. Oli “stamba samting long plan blong Krieta, blong ol pikinini blong Hem oli save gobak stap long ples blong olgeta kasem taem we i no save finis.” Olsem we Presiden Russell M. Nelson i bin tijim yumi: “[Lod] i krietem wol [blong mekem se] yumi save kasem ol bodi blong mit mo bun mo gat ol famli. Hem i stanemap Jos Ia blong Hem blong mekem se ol famli oli save mo go stap wetem God blong taem we i no save finis. Hem i givim ol tempol blong mekem se ol famli oli save stap tugeta blong oltaem.”
Be intres blong yumi long ol strong famli i no nomo abaot ples we bae oli kasem we i no save finis. Famli i gat wan impoten pat insaed long fasin blong stap glad blong yumi long wol ia. Papa blong yumi long Heven, we i save stret evriwan wanem nao bae i givim glad naoia mo blong taem we i no save finis, Hem i sendem ol pikinini blong Hem i kam insaed long ol famli—nomata se oli no stret gud evriwan—mo i invaetem yumi blong bildim mo lukaot gud ol strong famli. Yes, “kam handikap, ded o ol narafala situesen, i save mekem yumi jenis.” Be i no gat wan samting i save tekemples blong ol impoten mo tabu responsabiliti blong hasban mo waef, papa mo mama.
Wan stadi long “ol famli we i gat stret papa mo mama we tufala i gat strong rilesensip” i gohed blong soem se famli i impoten tumas blong holemtaet“ol dip rilesensip blong lav we i joenem olgeta mo wanem oli filing long olgeta wanwan.” Hem i “stamba ples we oli save developem strong filing long olgeta wanwan, ples we oli save stretem olgeta mo ples we oli savegud olgeta wanwan.”
Olgeta We Oli Wok Strong Wetem Strong Tingting blong Protektem Famli
Yes hemia i no sud sapraesem yumi se wan samting we i impoten olsem long plan ia blong God bae i save fesem samting we i kam agensem. Setan i neva bin stap olsem fren blong famli, mo ol hadwok blong hem naoia oli kam moa hariap “from we hem i save se i gat smol taem nomo blong hem i stap yet” (Revelesen 12:12). Olsem Presiden M. Russell Ballard (1928–2023), Akting Presiden blong Kworom blong Olgeta Twelef Aposol i bin talem, “Setan i save se wei we i moa gud blong stopem wok blong Lod i blong daonem wok blong famli mo blong karemaot ol tabu fasin insaed long hom.”
Wetem save we yumi gat abaot famli blong God we i no save finis, plan ia blong Hem long ol pikinini blong Hem, mo tabu mining blong ol famli rilesensip, yumi mas stap long medel blong wol olsem olgeta we oli stap protektem famli blong olgeta.
?Olsem wanem nao yumi mekem hemia?
Presiden Dallin H. Oaks, Fas Kaonsela long Fas Presidensi i givim kaonsel ia: “se famli ofisol toktok … i Lod we i talemaot bigwan bakegen ol trutok blong gospel we yumi nidim blong sapotem yumi tru long ol jalenj tedei abaot famli.”
Long ol wanwan laef blong yumi, yumi save mekem ol “smol mo ol simpol samting” (Alma 37:6) we oli save mekem ol famli rilesensip oli kam moa strong. Hemia i tekem tu, taem yumi stap folem ol prinsipol blong ol famli we i gat sakses mo mared aotlaen insaed long famli ofisol toktok ia: “Fet, prea, fasin blong sakem sin, fasin blong stap fogiv, respek, lav, fasin blong kea, wok, mo ol samting o pleplei we oli gud.” Nomata long famli situesen blong yumi naoia, yumi save soem tru long ol aksen blong yumi se ol famli rilesensip oli impoten long yumi blong taem we i no save finis.
Olsem “ol responsibol sitisen” insaed long ol komuniti blong yumi, yumi save “soem ol prinsipol ia we i blong mekem famli i kam strong moa.”
Yumi ol lata-dei kavenan pipol blong Lod. Yumi yumi ol pipol we yumi kam afta mo bae yumi kasem ol promes ia we Lod i bin mekem wetem Ebraham, Aesak mo Jekob—ol promes we i gat evri samting blong mekem wetem ol famli. Ol promes ia oli kam wetem tabu singaot ia blong blesem “evri famli long wol.” Mo wan impoten wei we yumi mekem hemia i blong stap laef, protektem mo stap serem trutok ia we i no save finis se “God i odenem famli” mo se “Ol tabu odinens mo ol kavenan we oli stap insaed long ol tabu tempol oli mekem rod i klia long wanwan man o woman i save gobak long ples blong God mo ol famli oli save joen tugeta kasem taem we i no save finis.”
“Mi Stap Wetem Yu”
Taem we Sista Uchtdorf mo mi i wajem ol memba blong famli blong mitufala oli mekem ol tabu kavenan wetem Papa long Heven we i no save finis, i gat lav, mo hat blong mitufala i fulap wetem glad mo tangkyu. Mitufala i no glad long ol pikinini blong mitufala nomo be tu, long ol papa mo mama blong mitufala mo ol papa mo mama blong olgeta. Mitufala i tingting hevi wetem bigfala lav long olsem wanem ol kavenan blong gospel oli joenem yumi i go long ol jeneresen. Hem i wan eksperiens we i semmak olsem hemia blong stap luk “wan lada i stanap, … be en blong hem antap i kasem heven, mo i luk ol enjel oli stap long hem, we oli stap kamdaon, oli stap go antap” (Jenesis 28:12).
Ol blesing we Lod i promesem long Jekob long drim blong hem, i givim i go long evri kavenan pikinini blong Hem—we i tekem tu yu mo mi. Olsem we Lod i bin mekem blong Jekob, Hem bae i ansarem yumi long “taem blong trabol blong [yumi], ” (Jenesis 35:3) sapos yumi jusum Hem.
“From luk,” Lod i talem, “Long evri ples we bambae yu pas long hem, mi bambae mi stap wetem yu, … Bambae mi no save lego yu” (Jenesis 28:15).
Olsem Jekob, yumi evriwan i gat wan draeples blong krosem. Samtaem yumi luk se ol promes blesing oli stap longwe tumas. Taem ol series problem o ol jalenj oli kam, maet yumi kwestinem lav blong Lod. Iven maet yumi filim se God i lego yumi. Nomata ol bes efot blong yumi blong stap olsem wan disaepol, yumi filim se yumi no stap kasem ol blesing we yumi stap hop from.
Ol brata mo sista, ol dia fren, rod blong kavenan hem i wan rod blong glad, nomata wanwan taem bae i gat ol mak blong wota blong ae. Sapos yu filim se sam pat blong plan ia blong stap glad oli no hapen long laef blong yu naoia, plis trastem se Lod i save gud yu mo bae i blesem yu long stret taem blong Hem, folem waes tingting blong Hem.
Fet long Jisas Kraes mo ol promes blong Hem oli givim insperesen long yumi blong lukluk i go fored mo i no gobak biaen. From se tru long Hem, fiuja blong yumi i no mas stap olsem prisena from eni samting we i bin hapen long bifo o i stap blokem tingting blong yumi naoia. Yes yumi evriwan, o bae yumi stap, kasem kil o harem nogud long wan wei o narawan. Be yumi biliv long Man we I Stap Givim Hiling. Yumi trastem Hem—bigwan, i tru, yumi hang strong long ol promes blong Hem fulwan “mo bilivim olgeta,” iven “ol samting ya oli stap longwe yet long olgeta” (Hibrus 11:13).
“Mi rimaenem yufala se, long taem mo wei blong Lod, bae i nogat wan blesing we bae oli no givim long Ol fetful Sent blong Hem we oli fetful,” Presiden Nelson i talem. “Lod bae i jajem mo i givim praes long wanwan man mo woman folem wanem hat blong olgeta i filim mo wantem, mo wok blong olgeta tu.”
Mi promes se taem yumi folem mo serem plan ia blong Papa blong yumi long Heven long ol famli, Hem bae i stap wetem yumi, givim sapot long yumi mo joenem yumi long rod blong yumi. Hem bae i neva lego yumi stap yumiwan, speseli taem we ol hadtaem oli kam long yumi o long olgeta we yumi lavem. Hem bae i karem yumi, leftemap yumi mo karem yumi i kam long promes graon blong wan glad we i fulwan wetem Hem, wetem Pikinini blong Hem, Jisas Kraes, mo wetem ol famli blong yumi—blong taem we i no save finis.