“Ol Wokman we Oli Stret Mo Gud—Ol Disaepol blong Jisas Kraes,” Liahona, Maj 2026.
Ol Woman blong Kavenan
Ol Wokman we Oli Stret Mo Gud—Ol Disaepol blong Jisas Kraes
Trifala parabol we i tijim fasin blong stap wan wokman mo i soem wan eksampol blong olsem wanem blong mekem fasin blong yumi blong stap wan disaepol blong Jisas Kraes i kam moa strong.
Ol Ten Yangfala Gel, i kam long Jorge Cocco
Stap letem laet blong Jisas Kraes i saen tru long fasin blong yumi blong stap olsem wan disaepol i bes wei blong karembak paoa—paoa long wan ples we oltaem i fulap. Taem yumi stap tekem pis mo laet blong Kraes i go long ol narawan, yumi fanem pis blong yumiwan long Hem.
From hemia, stap man blong putum pis long hom blong yuwan mo komuniti long ples we yu stap onlaen long hem. Stap help blong karemaot safaring long eria blong yuwan.
Stamba tingting blong Setan i blong oli tekem aksen long yumi. Wanem we i defren i we, plan ia blong stap glad, blong Papa, i givim long yumi janis blong tekem aksen, blong kam wokman blong mekem gud, blong givim pis mo blong givim hop.
Yumi save ansa long ol rong infomesen taem yumi stap serem ol stret infomesen we i leftemap tingting mo i givim hop, taem yumi kam ol man blong sapotem trutok be i no blong stap kasem infomesen nomo. Yumi save ansa long ol toktok we i no stret taem yumi stap fulumap wol wetem laet mo gud nius blong gospel blong Jisas Kraes.
Olsem we profet blong yumi we yumi lavem tumas, Presiden Russell M. Nelson, i bin talem se, oltaem ansa hem i Jisas Kraes: “Nomata wanem ol kwestin o problem we yu gat, oltaem ansa i stap long laef mo ol tijing blong Jisas Kraes.”
Presiden Nelson i bin invaetem yumi blong mekem fasin blong yumi blong stap wan disaepol blong Hem olsem fas mo nambawan samting.” Yumi mekem fasin blong yumi blong stap wan disaepol i kam moa strong taem yumi lan long mo abaot Jisas Kraes. Naoia, letem yumi faenemaot moa abaot ol tijing blong Sevya.
Ol Ten Yangfala Gel
Matiu 25 i gat insaed tri parabol we i gat mining. Faswan, parabol blong ol tan yangfala gel (luk long ol ves 1–13). Faef oli waes mo faef narawan oli no waes. Evri ten long olgeta oli stap long stret ples, mo stap wet long man blong mared mo wanwan long olgeta i kam wetem wan laet.
Taem we man blong mared—we i ripresentem Sevya—i kam long medel naet long aoa we oli no save, faef we oli no waes oli no gat inaf oel blong ol laet blong olgeta. Maet oli tingting se blong gat ekstra oel i no nid. O maet oli no bin ol waes wokman we oli save manejem gud oel we oli bin gat. Maet ol samting oli pulumaot tingting blong olgeta mo oli no bin rere inaf blong kipim laet blong olgeta i gohed blong laet.
Mo from hemia, blong ansa long rikwes blong olgeta blong go insaed long lafet blong mared, man blong mared i ansa, “Tru mi talem long yufala, mi mi no save yufala (Josef Smit Translesen, Matiu 25:11 [long Matiu 25:12, futnot a]). Long nara toktok, hemia i soem se tru long fasin blong olgeta blong rere mo blong stap ol waes wokman, ol faef waes yangfala gel oli bin save Hem.
Naesfala oel ia oli save luk olsem fasin blong jenisim laef blong olgetawan. Hemia i letem ol waes yangfala gel blong laetem ol laet blong olgeta mo go insaed long lafet blong mared wetem man blong mared. Oel ia oli no save serem wetem ol fren blong olgeta from se fasin jenisim laef i blong wanwan nomo—wanwan man mo woman. Yumi save mo mas holem laet blong yumi i go antap mo mekem mo pulum ol narawan i go long Jisas Kraes, be wanwan long yumi i gat responsabiliti blong jenisim laef blong yumiwan.
Olsem we Sevya i tokbaot, “Taswe, yutufala i mas stap fetful, stap prea oltaem, stap klinim laet blong yutufala, mo stap mekem i laet, mo yutufala i mas gat oel wetem yutufala, blong yutufala i rere long taem we Man we Bae I Mared i kam” (Doktrin mo Kavenan 33:17; oli ademap italik).
Ol Talen
Nambatu parabol oli tokbaot insaed long Matiu 25 hem i hemia blong ol talen (luk long ol ves 14–30). Long stori ia, masta ia, bae i mas travel i go longwe mo i givim ol talen long tri long ol wokman blong hem. Wan “talen” i ripresentem mane. Yumi save tingting long ol talen ia tu olsem ol presen, ol paoa mo ol blesing we i kam long Papa blong yumi long Heven. Long wan wokman masta i givim faef talen, long wan narawan hem i givim tu talen mo long namba tri, hem i givim wan talen. Afta, masta i go long wokbaot blong hem.
Taem hem i kambak, hem i faenemaot se tufala wokman we hem i bin givim faef mo tu talen long tufala, tufala i bin fetful mo kam ol wokman we oli save manejem gud mo mekem profit mo tufala i bin mekem gud yus long ol talen blong tufala, mekem se tufala i dabolem valiu blong ol talen ia. Mo from se tufala i bin stap fetful moa, masta i givim moa long olgeta, mo talemaot se, “!Ei, yu yu mekem wan gudfala wok! Yu yu wan gudfala man we yu lukaot gud long ol wok blong mi. From we yu bin lukaot gud long smol bisnis ya we mi putum long han blong yu, bambae mi putumap yu blong yu lukaot long plante bisnis. Yu kam joen long lafet blong mi” (ves 21).
Wanem we i defren i we, wokman ia we i gat wan talen i berem—maet from se i gat ol samting we i pulumaot tingting blong hem mo hem i pusumbak dei blong mekem wok. O maet hem i wari tumas blong save statem o hem i fraet se bae hem i no mekem gud. Maet hem i komperem hemwan long tufala nara wokman mo ol tu tingting blong hem i mekem hem i stop blong stap traem. Hem i no rere from taem we masta bae i kambak, hem i no eksperiensem glad ia blong stap olsem wan fetful wokman we i gat responsabiliti, mo hem i lusum talen blong hem.
Parabol blong ol ten yangfala gel mo parabol blong ol talen ia, tufala i semmak. Tugeta i tokbaot plante se yumi wanwan i gat responsabiliti blong yumiwan long saed blong jenisim laef blong yumi mo mas rere long yumiwan blong kasem presen blong Lod we i blong kam olsem wan god—mo se yumi gat wan responsabiliti blong mo yumi akaontebol yumiwan long ol talen mo ol presen we yumi bin kasem.
Gudfala Man blong Lukaot long Sipsip
Laswan, Matiu 25 i tokbaot stori blong olgeta we oli gat “tras long fored blong God,” oli tokbaot olgeta olsem ol Gudfala Man blong Lukaot long Sipsip, we oli stap long raet saed blong Hem, we oli stap glad long lafet blong mared wetem Hem, mo oli gat blesing blong stap olsem man we rul ova long plante samting (luk long ol ves 31–40). Lod bae i talem long olgeta:
“From we taem mi mi hanggri, yufala i givim kakae long mi, mo taem we mi mi tosta, yufala i givim wota long mi. Taem mi mi strenja, yufala i tekem mi mi go long haos blong yufala:
“Mo taem we mi mi neked, yufala i givim klos long mi: Taem we mi mi sik, yufala i lukaot gud long mi: Taem we mi mi stap long kalabus, yufala i kam luk mi” (Matiu 25:35–36).
Olsem ol disaepol blong Hem, yumi rere long yumiwan from taem blong Seken Kaming blong Hem mo mo yumi stap fetful mo eksasaesem responsabiliti blong mekem gud ova long olgeta samting we Lod i blesem yumi wetem. Fasin blong gat sore, bigfala lav, klin fasin mo fasin blong stap wan fetful wokman oli mekem yumi kwalifae i no blong stap nomo wetem Hem afta, be tu, blong gat tras long fored blong God. Olsem we Momon i bin tijim, long olgeta we oli fulap wetem bigfala lav—klin lav blong Kraes—hemia “bae i gud long [olgeta]” long las dei. Bae oli olsem Sevya, bae oli luk Hem olsem we Hem i stap mo bae oli fulap wetem hop mo kam klin iven olsem we Hem i klin. (Luk long Moronae 7:47–48). Presiden Nelson i bin talemaot se, “Bigfala lav mo klin fasin i openem rod blong gat tras long fored blong God!”
Man blong Lukaot long Sipsip—I Jenis IV, i kam long Jorge Cocco
Ol disaepol blong Jisas Kraes oli kea long olgeta we oli stap long nid.
Evri trifala parabol ia oli tijim yumi blong stap ol wokman we i gat responsabiliti blong jenisim laef blong yumiwan; blong ol presen, ol talen mo ol samting we i blong yumi we Lod i blesem yumi wetem; mo blong ol neba blong yumi we oli hanggri, oli nogat hom, oli stap harem nogud mo oli taet.
Oli tijim olsem wanem ol disaepol blong Kraes oli mas rere from ol hadtaem we bae i kam bifo Seken Kaming blong Sevya. !Hemia i ol taem we yumi stap laef long hem! Yumi mas gohed blong mekem laet blong yumi blong jenisim laef i stap stap laet gud mo stap letem i saen, taem yumi stap ysum mo mekem i kam bigwan ol talen blong yumi mo stap kea long olgeta we oli stap long nid. Hem i blong gat wetem yumi bigfala lav we i klin lav blong Kraes.